- Йеңилиқлар
- 27 Ақпан, 2012
Ениқ вәзипиләр жүкләнди
Мошу йеқинда өткән Уйғур наһийәлик һакимийәтниң мәҗлисидә 2011-жилниң иҗтимаий-ихтисадий тәрәққиятиниң нәтиҗилири вә 2012-жили мошу йөнилиш бойичә әмәлгә ашурулидиған иш-чариләр реҗилири һәққидә наһийә һакиминиң орунбасари Шөһрәт Нурахуновниң әхбарити тиңшалди.
Униң тәкитлишичә, 2011-жили наһийәдә, йеза егилиги, санаәт, оттура вә кичик тиҗарәт саһалириниң асасий йөнилишлири бойичә турақлиқ илгириләш көрсәткүчлириниң сақланғанлиғини көримиз. Мәсилән, йеза егилиги мәһсулатлирини йетиштүрүш көләми, 2010-жилға нисбәтән 1 миллиард 943 миллион тәңгигә өскән. Бюджет селиқ вә башқиму төләмләр һесавиға 110,4 пайизға орунлинип, кирим 1 миллиард 357 миллион тәңгини тәшкил қилди. Йәрлик бюджет ғәзниси 1 миллиард 88 миллион тәңгигә бейип, бюджет чиқими 99,8 пайиз өзләштүрүлди.
Бүгүнки күндә йеза егилиги саһасиниң тәрәққияти үчүн деханчилиқ, бағвәнчилик, топа вә өсүмлүкни қоғдаш йөнилишлири бойичә планланған иш-реҗиләрниң тегишлик һөҗҗәтлирини рәсмийләштүргән дехан егиликлиригә һөкүмәт ярдәм пул беришни башлиди.
Мәҗлис давамида елимиз Президенти Н.Назарбаевниң Қазақстан хәлқигә йоллиған Мәктүби муһакимә қилинип, наһийә һакими Көйүмчан Өмәров Дөләт рәһбириниң Мәктүптә ейтқан көрсәтмилиригә тохтилип, мошу йөнилишләр бойичә һели орун еливатқан камчилиқларни тәһлил қилди. Кәлгүсидә уларниң қайтиланмаслиғи үчүн барлиқ мүмкинчиликләрдин толуқ пайдилиниш керәклигини ейтти вә орунбасарлириға йезилиқ округлар һакимлири билән җәмийәтлик тәшкилатлар һәмкарлиғида аһали арисида Президент Мәктүбини тәрғип қилиш вәзиписини жүклиди.
Махмут ИСРАПИЛОВ.
Уйғур наһийәси.658 рет
көрсетілді0
пікір