• Йеңилиқлар
• 27 Ақпан, 2012

Кәңәйтилгән мәҗлис өткүзүлди

Дүшәнбә күни Алмутидики Достлуқ өйидә җумһурийәтлик Уйғур этномәдәнийәт мәркизиниң (ҖУЭМ) кәңәйтилгән мәҗлиси болуп өтти. Униңға мәзкүр җәмийәтлик тәшкилатниң башқарма әзалиридин ташқири бир қатар зиялилар һәм җамаәтчилик ишлириниң активистлири қатнашти. Жиғинни ҖУЭМниң рәиси Әхмәтҗан Шардинов киришмә сөз билән ечип, әң алди билән бийил Қазақстан хәлқи Ассамблеясиниң әзалиғиға сайланған башқарма әзалири Абдурешит Мәхсүтов билән Әхтирим Әхмәтовани көпчилик намидин тәбриклиди. Натиқ шуниңдин кейин асасий мәсилигә көчүп, Дөләт рәһбири Нурсултан Әбиш оғли Назарбаевниң қазақстанлиқларға йоллиған бийилқи Мәктүбиниң мәзмун-маһийитигә тохталди вә уни әмәлгә ашуруш йолида һәммимизниң бир яқидин — баш, бир йәңдин қол чиқирип һәрикәт қилишимиз лазимлиғини алаһидә тәкитлиди. Әхмәтҗан Бәкрим оғли, шундақла Мәктүптә қәйт қилинған кадрлар корпусиға намзатлар бойичә тәклипләрни тәйярлаш мәсилисигә алаһидә тохтилип, ҖУЭМниң новәттики рәһбирий лавазимиға лайиқ шәхсләр сүпитидә мәркәз рәисиниң биринчи орунбасари, Қазақстан хәлқи Ассамблеясиниң әзаси Асимҗан Злавдиновни, «АЗМК-Темірбетон» җавапкәрлиги чәкләнгән йолдашлиғи мудириниң орунбасари Мурат Хизмәтовни һәм сәясәтшунас Шаһимәрдан Нурумовни тәвсийә қилди. Башқарма әзалириниң аваз бериши нәтиҗисидә уларниң намзатлири бир еғиздин бәкитилди. Кейин сөз новитини алған ҖУЭМниң иҗраий рәиси Рабик Исмайилов мәркәз тәрипидин өткән жили әмәлгә ашурулған ишлар һәққидә ейтип, униң 2012-жилға бәлгүләнгән иш реҗиси билән тонуштурди. Ахирида Әхмәтҗан Бәһрим оғли көпчиликни қизиқтурған һәр хил соалларға җавап берип, башқарма әзалирини мәркәз ишини җанландурушта паалийәтчанлиқ көрситишкә чақирди.

Ершат ӘСМӘТОВ.

Алмута шәһири.