• Йеңилиқлар
• 27 Ақпан, 2012

Прокуратура «дүгләк үстәл» уюштурди

Кейинки пәйтләрдә қәрәллик нәширләр билән җумһурийәтлик телевидение көрситишлиридә елимиздики мәктәп, колледж вә алий оқуш орунлирида билим еливатқан оқуғучи вә студентларниң хулқи-мүҗәзи, өз ара мунасивитидин әхбарат беридиған хәвәрләр көпләп орун алмақта. Әпсуски, уларда асасән билим очақлирида тәһсил көрүватқан яшлиримизниң җинайәт элементлири қисмида яки уларниң тәсири астида болуватқанлиғи ейтилмақта. Һөкүмәт бу әһвалға қарши бир қатар чариләрни көрүватсиму, һазирчә, вәзийәт шу петичә қеливатиду. Җай-җайларда орун еливатқан бу әһвал җәмийәтниму тәшвишләндүрмәктә. Өткәндә Уйғур наһийәлик прокуратура хадимлири тәрипидин уюштурулған «дүгләк үстәлгә» қатнашқан наһийәлик ички сәясәт бөлүминиң, «Нур Отан» ХДП наһийәлик шөбисиниң вәкиллири, наһийәниң баш имами, Чонҗа йезисидики билим очақлири рәһбәрлири билән муәллимләр коллективи, жуқарқи синиплар оқуғучилири вә участкилиқ инспекторлар мошу мәсилини муһакимә қилди. Муһакимә давамида камаләт йешиға йәтмигән өсмүрләрниң һоқуқ бузуш йолиға чүшүп қелишиниң алдини елиш, уларниң бу қәдәмгә беришиға сәвәп болуватқан әһвалларни ениқлап, һаятимизда орун еливатқан мошу хил көрүнүшләргә қарши турушқа қабил тегишлик чариләрни вә әмәлий ишларни көрүш тоғрилиқ ой-пикирләр оттуриға қоюлди. Шундақла билим дәргаһлириға вәзийәтни назарәт астиға елип, ейтилған илләткә қарши күришишни йолға қоюш тәвсийә қилинди.

Махмут ИСРАПИЛОВ.

Уйғур наһийәси.