• Йеңилиқлар
  • 31 Мамыр, 2013

Уйғур сәһнисигә «Баһар» кәлди

Буниңдин төрт жил илгири Алмута шәһириниң Достлуқ мәһәллисидики А.Розибақиев намидики 153-мәктәп-гимназиягә педагог-хореограф болуп ишқа орунлашқан Баһар Зордунова мәзкүр билим дәргаһидики сәнъәткә иштияқ бағлап өсүватқан балиларни уссулға үгитишни қолға алған еди. Шуниңдин кейин бир айниң ичидила уссул үгинишни халиғучиларниң сани 80гә йетиду. Шуңлашқа мәшиқләндүрүш пәйтидә улар мәктәп-гимназияниң мәҗлисләр залиниң сәһнисигә патмай қалди. Буни бир күни мәзкүр билим дәргаһиниң мудири Шавкәт Өмәров көрүп, һаяҗанланғанлиғидин: «Гимназиягә баһар кәпту», дегән екән. Мана шуниңдин кейин гимназия йенидики бу уссулчилар ансамблиниң нами «Баһар» болуп қалди. Тәдбирчан мудир балиларниң әркин мәшиқлиниши үчүн гимназиядин алаһидә бөлмә аҗритип бәрди. Чүнки. Шавкәт Нияз оғли «Баһар» ансамблиниң пәқәт өзлириниң билим дәргаһи биләнла чәклинип қалмай, җумһурийәтлик конкурсларға иштрак қилишини халатти. Һәқиқәтәнму мудир ойлиғандәк болди. Бәш яштин 16 яшқичә болған оқуғучилардин тәркип тапқан «Баһар» уссулчилар ансамбли дәсләпки қетим җумһурийәтлик «Күншуақ» конкурсиға қатнишип, І орунни елишқа муйәссәр болди. Шуниңдин кейин «Рауан» намлиқ җумһурийәтлик байқашта баш мукапат — Гран-прини утувалди. Көп өтмәй, «Айналайын» намлиқ җумһурийәтлик бәйгидә «Баһар» йәнә алдинқи орунларниң бирини егилиди. Мундақ утуқлар, әлвәттә, мәзкүр ансамбльниң рәһбири Баһар Зордунованиң иҗадий издиниши түпәйли қолға кәлтүрүлди десәк, хаталашмаймиз. Йеқинда биз қуруқ гәптин көрә, әмәлий ишни яқтуридиған Баһар Абдумүлүк қизини сөһбәткә җәлип қилған едуқ. — Атам рәмити сазәндә еди, — дәйду Баһар сөһбәт ара. — У пат-патла маңа «Уйғурлар сәнъәткә йеқин хәлиқ, мән сизниң уссулчи болушиңизни арман қилимән», дәтти. Һелиму есимда, өйдә вақтимиз яр бәрсила, дадам саз чалатти, мән болсам, уссул ойнаттим. Әпсус, у бу һаяттин әтигән кәтти. Мән һазир униң арминини орунлашқа тиришиватимән. Икки алий билим дәргаһида тәһсил көрдүм. Биринчиси, ЖенПИниң хореография факультети, иккинчиси, Үрүмчидики уссулчиларни тәйярлайдиған сәнъәт академияси. Гимназиягә ишқа кәлгәндин кейин, уссул ойнап, нахша ейтишқа қизиқидиған балиларни көрүп, дадамниң «Биз, уйғурлар, сәнъәткә йеқин», дегән гепи ядимға кәлди. Шуңлашқа мән талантлиқ балиларни чоң сәһнигә елип чиқишқа бар күч-ғәйритимни сәрип қиливатимән. Йеқинда Баһар Зордунова Уйғур театрида уйғур тамашибинлириға «Баһар соғиси» намлиқ концерт программисини һавалә қилди. Сәһнидә 5 яшлиқ қизчақлар тенимәй-тәнтиримәй миллий уссуллиримизни иҗра қилғанда, тамашибинлар орунлиридин туруп,  гүлдүрас чаваклири арқилиқ  уларға һөрмәт көрсәтти. Әнди  жуқарқи синипниң қизлири болса, сәһнигә қәдимкидәкла яришип қапту. Шуңлашқа бу гимназиягила әмәс, бәлки уйғур сәнъитигә кәлгән «Баһар» дәп ейтсақ, артуқ болмайду. Бәхтишат СОПИЕВ.

517 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы