• Әхбаратлар еқими
• 07 Маусым, 2013

Миң адәмлик оркестр

Өткән жүмә күни Атырав шәһиридә улуқ Қурманғазыниң туғулғининиң 190 жиллиғиға беғишланған Җумһурийәтлик күй фестивали өтти. Тәкитләш керәкки, бу фестивальда тәркивидә миң адәм бар оркестр Қурманғазыниң он төрт күйини орунлиди. Елимизда илгири-кейин миң адәм бир вақитта нәқ мошундақ концерт қоймиған. Мәзкүр оркестрниң тәркивигә Астана вә Алмута шәһәрлиридин, Қарағанда, Қизилорда, Қостанай, Ақтөбә, Ғәрбий Қазақстан вә Маңғышлақ регионлиридин сәнъәткарлар тәклип қилинди. Оркестр бу күни Қурманғазыниң хәлиқ ичидә көп таралған «Саранжап», «Алатау», «Балбырауын», «Сарыарқа» вә башқиму күйлирини орунлиди. Фестиваль даирисидә шундақла Қурманғазыниң күйлирини домбрида орунлайдиған айрим күйчиләр арисидиму конкурс өтти. Фестиваль йәкүни бойичә, мошу мусабиқиға қатнашқан барлиқ сәнъәткарларға мәхсус сертификатлар тапшурулди.   Диний билим берилиду Алмута вилайитидә деструктив сектиларниң тәсиридин зәрдап чәккән гражданларға ярдәм қилиш мәркизини ечиш көздә тутулмақта. Бу тоғрилиқ диний ишлар бойичә регионал департаментиниң мудири Жумағул Әлимбеков вилайәт һакимийити йенидики диний бирләшмиләр билән алақә бағлаш кеңишиниң мәҗлисидә билдүрди. Йәрлик һакимийәт орунлириниң мәлуматлири бойичә, регионда 535 диний бирләшмә, җүмлидин 393 мечит, 45 православие, 11 рим-католик вә 84 протестант чиркоси, шундақла әнъәнивий         әмәс йөнилиштики икки тәшкилат паалийәт елип бериватиду. Билим, мәдәнийәт, иш билән тәминләш вә иҗтимаий программиларни уйғунлаштуруш башқармилириға 1-июльғичә китапханиларда диний әдәбиятларниң бар яки йоқ екәнлигини тәкшүрүш тапшурулди. Деструктив идеяләрни тәрғип қилидиған китаплар тартивелиниду. Жумағул Әлимбековниң тәкитлишичә, һазир Мисир, Сәүдия Әрәпстани, Түркия, Йәмән, Қирғизстан диний оқуш орунлиридин қазақстанлиқ студентларниң қайтип келиш җәрияни кетип бариду. Уларниң һәммиси әнди өз елида оқуйду, шуниңға бағлиқ җумһурийәттә мәдрисә, семинария, диний институтларни көпәйтиш зөрүрийити пәйда болмақта. Пат-йеқинда Чемолғандики мечит йенида мәдрисә паалийитини башлайду, Талдиқорғандики Жетысу дөләт университетида имамларниң билимини ашуруш курси ечилиду.