• Йеңилиқлар
• 07 Маусым, 2013

Гөдәкләр шатлиққа бөләнгән күн

1-июнь — Хәлиқара балиларни һимайә қилиш күни Уйғур наһийәсидиму тәнтәнилик нишанланди. Мәрикә һарписида наһийә һакиминиң қарариға бенаән, «Биз — сениң балилириң, Қазақстан! Биз йеңи аләмдә өмүр сүримиз» мавзуси даирисидә көләмлик чарә-тәдбирләр уюштурулуп, униң жуқури дәриҗидә өткүзүлүшигә наһийәдики дөләтлик мәһкимиләр, җәмийәтлик бирләшмиләр билән тәшкилатлар вә тиҗарәтчиләр иштрак қилди.Наһийәниң он төрт йеза округидин тәклип қилинған 320 бала Чонҗидики истираһәт беғиға орунлаштурулған аттракционлар хизмитидин һәқсиз пайдиланди. 70 балини йезидики кафелар ғоҗайинлири һәқсиз тамақландурди. Шундақла 710 гөдәккә 330 миң тәңгилик соға тапшурулса, наһийәдики мүмкинчилиги чәкләнгән 215 бала һәқсиз тамақландурулуп, уларға 210 миң тәңгилик соға тапшурулди. Җүмлидин Ғалҗат, Шуңқар, Кәтмән, Чоң Ақсу, Долата, Таштиқарису вә Чонҗа йезилиридики 29 нака балиму соғисиз қалмиди. Дайим хәйри-еһсанлиқ ишлар қайнимида жүргән чонҗилиқ тиҗарәтчи Тәлъәт Абдуллаев 250 нәпәр қара көзни өзиниң истираһәт беғида һәқсиз тамақландурди. Бу күни аттракцион оюнлири билән көлдики қолвақлар әшу наресидиләр ихтиярида болди. Балиларни һимайә қилиш күни наһийәлик «Қамқор» маарип саһаси хадимлири кәспий иттипақиниң уюштуруши билән 30 оқуғучи Сартоқай ерәнлигигә, 30 оқуғучи «Назугум» өңкүригә бир күнлүк сәяһәткә чиқти. Шундақла житим вә тәминати төвән аилиләрдә тәрбийилиниватқан 33 бала Панфилов наһийәсидики «Көктал» санаторийисиға йолланма алди. Мәрикә күни наһийәлик Мәдәнийәт өйидә «Балилар — бизниң келәчигимиз» мавзуси астида мәйрәмлик концерт уюштурулди. 550 бала «Мән өмүр сүрүватқан аләм» мавзусида асфальтқа сүрәт селиш байқаш-көрүгигә иштрак қилип, униңда ғалип чиққанларға 200 миң тәңгилик соғилар тапшурулди. Шундақла у күни «Аләмгә шәпқәтлик билән» мавзусида мүмкинчилиги чәкләнгән балилар иҗадийитиниң көргәзмиси билән «Чиниқсаң — қавул болисән» мавзусида спорт мусабиқилири уюштурулуп, униңға наһийә бойичә 900гә йеқин оқуғучи  қатнашти.

    Махмут ИСРАПИЛОВ.

    Уйғур наһийәси.