• Йеңилиқлар
• 07 Маусым, 2013

Җасарити мунасип баһаланди

Өсмүр чағлиридила һәрхил спорт секциялиригә паал қатнишип, җисманий чиниққан Һезимҗан Илиясов Әмгәкчиқазақ наһийәси Достлуқ йезисидики мәктәпни тамамлиғандин кейин, әмгәк паалийитини Алмутидики от өчириш мәһкимилириниң биридә башлиған еди. Қәдди-қамити келишкән, җасуранә қияпәтлик бу жигит өзиниң тәртип-интизами, әдәп-әхлақи, ишиға мәсъулийәтлик билән қариши түпәйли аз вақит өтмәйла, коллектив арисида аброй-ишәнчигә егә болди. Адәттики иш күнлириниң бири. Һезимҗан әндила новәтчиликни өткүзүш тәрәддутини қиливатқанда, пультқа хәвәр кәлди. У әһвални билиш үчүн операторлар бөлмисигә қандақ йетип кәлгинини туймай қалди. Улар өрт чиққан җайниң адресини елип, дәрһал йолға чиқти. Өрт чиққан җайға йетип кәлгәндә 5 — 10 адәм челәк билән отқа су чечивататти. Лекин, худди чөчәкләрдики әҗдиһаниң тилидәк лавулдап йениватқан от барғансири овҗ алмақта. Һезимҗан вәзийәтни чақмақ тезлигидә көңлидин өткүздидә, команда әзалириға бир немиләрни ейтқан бойи өйгә қарап жүгәрди. Аилә әзалири чуқиришип, немә қиларини билмәй, жиға-зерә қиливатқанда, өйгә кирип, ашханидин газ баллонини көтирип чиққан у һойлиға чиқипла жиқилди. Өрт өчирилди. Лекин Һезимҗан көйүк азавидин бир айдәк ағриқханида даваланди. Һаятини хәтәргә тикип, бир аилә әзалирини өлүмдин қутулдуруп қалған Һезимҗан Илиясовниң бу җасарити мунасип баһалинип, йеқинда униңға Қазақстан Җумһурийити Пәвқуладдә вәзийәтләр министрлиги тәрипидин тәсис қилинған «Төтенше жағдайдағы ерлігі үшін» медали тапшурулди. Өз новитидә бизму бу қәйсәр жигиткә мукапитиң мубарәк болсун, әл үчүн қилған хизмитиң һемишәм йемишлик болсун, демәкчимиз.

Мәһәмәтҗан  ҺАПИЗОВ.

Әмгәкчиқазақ наһийәси.