• Йеңилиқлар
• 14 Маусым, 2013

Муһим һөҗҗәтләр имзаланди

Бу күнләрдә Қазақстан Президенти Нурсултан Назарбаев рәсмий сәпәр билән Өзбәкстанда болуватиду. Өзбәкстан — Қазақстанниң асасий шериклириниң бири. Сәясий җәһәттин бизниң әллиримиз заманивий хәлиқара мунасивәтләр системисида толуқ һоқуқлуқ вә җавапкәр субъектлардин һесаплинип, Евразия кәңлигидә алаһидә орунни егиләйду. Һәр икки җумһурийәт ядро қуралини тарқатмаслиқ тәртивини күчәйтиш мәсилисидә бирлишип күч чиқириватиду. Мәркизий Азия регионида ядро қуралидин бош зонини вуҗутқа кәлтүрүш бойичә уйғунлаштурулған иш-һәрикәтләрни әмәлгә ашуруватиду. Икки мәмликәт рәһбәрлириниң учришишлири мәмликәтләр оттурисидики алақиларни тәрәққий әткүзүштин ташқири регионал вә хәлиқара сәясәтниң әң муһим мәсилилири бойичә умумий қарарларни издәп-тепишқа имканийәт яратмақта. Шундақла рәсмий Астана билән Ташкәнт БМТ, ШҺТ, МДҺ, ЕБҺТ охшаш хәлиқара вә регионал тәшкилатларда зич өзара һәрикәт қилмақта. Умумән, иккитәрәплимә мунасивәтләр саһасида жигирмә жилда қолға кәлтүрүлгән иҗабий нәтиҗиләр, алий вә һөкүмәтләрара дәриҗидики өзара алақиларниң җошқунлуғи мәмликәтләр оттурисидики алақиларни техиму тәрәққий әткүзүш һәм чоңқурлитиш үчүн мустәһкәм асас яратти. Нурсултан Назарбаевниң Өзбәкстанға қилған бу қетимқи рәсмий сәпири даирисидиму икки мәмликәт оттурисидики һәмкарлиқ тоғрилиқ һөҗҗәтләр имзаланди. Мәсилән, Президентлар Нурсултан Назарбаев вә Ислам Кәримов бирләшкән билдүрүшни имзалиди. Униңда яхши хошнидарчилиқ вә өзара пайда асасида Қазақстан билән Өзбәкстан оттурисидики әнъәнивий достлуқ мунасивәтләрни техиму мустәһкәмләшкә болған интилиш өз әксини тапти.Шундақла Қазақстан Җумһурийитиниң Өзбәкстандики вә Өзбәкстан Җумһурийитиниң Қазақстандики дипломатик вакаләтханилириниң беналирини селиш үчүн өзара йәр участкилирини бериш тоғрилиқ һөкүмәтләрара келишим, башқиму бирқатар муһим бирләшкән һөҗҗәтләр имзаланди.