• Хәйрихаһлиқ
• 21 Маусым, 2013

Сехи қоллуқ инсан

Аримизда шундақ адәмләр барки, улар өзгиләргә яр-йөләк болушни алий һиммәт дәп чүшиниду. Алиқини очуқ, көңли кәң Пазилҗан Мәмәт әйнә шундақ инсанлар җүмлисидиндур. Йеқинда у Уйғур наһийәсигә қәдәм тәшрип қилип, мәктәпниң йешидики житим балиларниң  кәйпиятини хелила көтирип қойди. Бу күни Пазилҗан ака Чонҗа йезисидики мәктәпләрниң оттуз оқуғучисиға қишлиқ вә спорт кийимлирини соға қилди. Балилар үзидики иллиқ тәбәссүмини көрүп, уму әшу балилар охшаш шатлиққа бөләнди. — Сәбиләрниң шат күлкисини көрсәм, өзәмни бәхитлик һис қилимән, — дәйду Пазилҗан Мәмәт. — Чүнки мәнму житимлиқниң дәрдини көп тартқан адәм. Мону тәңшәлмигән заманда житим  балилар аз әмәс. Көңли йерим әшу гөдәкләрниң бешини сийпап, ғәмхорлуқ қилиш соваплиқ иш болуп һесаплиниду. Пазилҗан Мәмәт әсли ШУАРлиқ болуп, Ғулҗа шәһиридики оттура мәктәпни тамамлиғандин кейин Текәс вә Үрүмчи шәһәрлиридики дохтурларни тәйярлайдиған алий билим юртида тәһсил көргән. Хәлиқ  тибабәтчилиги билән шуғуллинишқа башлиған яш дохтур 1986-жили Беҗин шәһиридики жуқури дәриҗилик дохтурларниң билимини мукәммәлләштүрүш курсида оқуйду. Кәспи бойичә сүпәтлик билим вә мол тәҗрибә топлиған Пазилҗан Ғулҗида «Қайнақ булақ» шәхсий шипаханисини ачиду. Аилисидә алтә пәрзәнтни тәрбийиләватқанлиғиға қаримай, Пазилҗан өз дарамитиниң мәлум қисмини хәйрихаһлиқ ишларға сәрип қилишни һечқачан әстин чиқарған әмәс. У  һеликәм Ғулҗида икки йүздин ошуқ житим-йесир балиларға һамийлиқ қилип кәлмәктә. Пазилҗан Мәмәтниң Қазақстанда паалийәт елип бериватқиниға хелә вақит бопту. Астана шәһиридики дохтурханиларниң биридә у бемарларни хәлиқ тибабәтчилиги усули билән давалайдекән. Мәлумки, мустәқилликниң дәсләпки жиллирида орун алған ихтисадий қийинчилиқлар көплигән аилиләрниң һулини чайқавәтти. Шуниң ақивитидә тирик житимларниң сани көпәйди. Пәрзәнтлириниң тәғдиригә бепәрва қариған ата-аниларниң беғәмлиги кишини һәйран қалдуриду. Мошу әһвални көргән Пазилҗан ака Алмута, Яркәнт шәһәрлири билән Челәк вә Чонҗа йезилирида мошундақ хәйрихаһлиқ акциялирини турақлиқ өткүзүп кәлмәктә. Бу хәйрихаһлиқ чарә-тәдбирдә наһийәлик маарип бөлүминиң башлиғи Венера Сейдахметова, наһийәлик спорт вә тәнтәрбийә бөлүминиң башлиғи Турсун Һетахунов вә жигитбеши Әркин Ташмәтов сахавәтлик инсан, сехи қоллуқ Пазилҗан Мәмәткә өз миннәтдарлиғини изһар қилип, униң ишиға утуқ тилиди. Бу тиләккә бизму қошулуп, униңға «Сехи қоллириңиз дәрт көрмисун», дегүмиз келиду. Маһарәт ИМИРОВА. Уйғур наһийәси. СҮРӘТТӘ: Пазилҗан Мәмәт балилар арисида.