• Йеңилиқлар
• 21 Маусым, 2013

Стратегиялик шерикликниң йеңи дәриҗиси

Гезитимизниң өткән санида хәвәр қилғинимиздәк, Дөләт рәһбири Нурсултан Назарбаев 13-14-июнь күнлири Өзбәкстан Җумһурийитидә рәсмий сәпәрдә болди. Икки мәмликәт Президенти оттурисида өткүзүлгән музакириләр нәтиҗисидә бирқатар дөләтләрара вә һөкүмәтләрара келишимләр имзаланди. Президентлар музакириләр йәкүнини бирләшкән брифингта чиқарди. Қазақстан Җумһурийити Президентиниң тәкитлишичә, рәсмий сәпәр даирисидә имзаланған һөҗҗәтләр Қазақстан — Өзбәкстан мунасивәтлиридә йеңи сәһипини ачиду. Бирләшкән мәтбуат конференциясидә Президентлар музакириләрниң бирқатар муһим тәрәплиригә тәпсилий тохталди. Җүмлидин униңда чегариларара дәриялар тоғрилиқму сөз болди. Нурсултан Назарбаевниң сөзичә, чегариларара дәриялар проблемиси пәқәт бизниң регионимиздила моҗут әмәс. Мәсилән, Дунай дәриясиниң бойида 17 дөләт орунлашқан болуп, улар конвенция қобул қилди вә суни бирлишип, нәтиҗидарлиқ пайдилиниватиду. Транспорт ихтидарини тәрәққий әткүзүш музакириләрдә орун алған йәнә бир муһим мавзу болди. — Биз Өзбәкстанниң мәмликәт ичидә вә җәнупқа қарап транспорт магистралини тәрәққий әткүзүватқанлиғини билимиз, — дәп тәкитлиди Қазақстан Президенти. — Бу биз үчүн наһайити қизиқарлиқ. Биз Өзбәкстан товариниң Ақтав портиға келишигә мәнпийәтдар, — деди у. Тәрәпләр музакириләрдә әкис әткән башқиму мәсилиләргә тохталди. Андин кейин Ислам Кәримов Нурсултан Назарбаевқа тәклипни қобул қилип, Өзбәкстанға кәлгәнлиги үчүн миннәтдарлиқ билдүрди. Өзбәкстан Президенти мәзкүр сәпәрниң икки дөләт оттурисидики мунасивәтләрни чоңқурлитиш үчүн муһим стратегиялик әһмийәткә егә екәнлигини қәйт қилди. Президентларниң тәкитлишичә, Қазақстан билән Өзбәкстан оттурисидики иккитәрәплимә мунасивәтләр мустәһкәм мәдәний-тарихий алақиларға асаслиниду. Бу факт жилдин-жилға әмәлиятта әкис әтмәктә. Мәсилән, сәпәр давамида Ташкәнттә Қазақстан әлчиханисиниң йеңи бенаси вә Абай ядикарлиғи ечилди. Уларни тәнтәнилик ечиш мәрасими рәсмий сәпәрниң хуласиси болди. — Қазақлар билән өзбәкләрниң йеқинлиғи вә туққанчилиғи қедимий тарихқа егә. Бүгүн биз әҗдатлиримиз арман қилған суверен дөләтләрдин болуп һесаплинимиз. Мунасивәтлиримиз тамамән йеңи дәриҗигә чиқти, — деди Нурсултан Назарбаев вә Ташкәнттә қазақ хәлқиниң улуқ шаири вә мутәпәккүри Абай ядикарлиғиниң ечилиши мәмликәтлиримизниң өзара мунасивәтлириниң изчил тәрәққий етиватқанлиғиниң испати екәнлигини қәйт қилди. Өзбәкстан пайтәхтидә Қазақстан әлчиханисиниң йеңи бенасиниң ечилишиму иккитәрәплимә һәмкарлиқниң күчийиватқанлиғидин далаләт бериду. Астанада вә Ташкәнттә йеңи дипломатик вакаләтханилар қурулушини башлаш тоғрилиқ келишим 2010-жили қолға кәлтүрүлгән еди. Қазақстан Президентиниң тапшурмиси бойичә мәмликитимиз әлчиханисиниң бенаси Өзбәкстан пайтәхтиниң өзигә хас услубиға мувапиқ Шәриқ мемарчилиғи усулида селинди. Нурсултан Назарбаев жиғилғанларниң һәммисини қош мәйрәм билән тәбриклиди вә буниң икки дөләтниң достлуқ һәм қериндашлиқ әнъәнилирини күчәйтишкә садиқ болуп келиватқанлиғиниң испати екәнлигини тәкитлиди. Өзбәкстан Президенти Ислам Кәримовму икки қериндаш хәлиқ достлуғиниң бузулмайдиғанлиғиға ишәнчә билдүрди вә Абай ядикарлиғиниң һәм әлчиханиниң йеңи бенасиниң ечилиши билән Өзбәкстан пайтәхтиниң техиму гөзәл болидиғанлиғини тәкитлиди. Ислам Кәримов Нурсултан Назарбаевниң қоллап-қувәтлиши билән Астанадиму Әлишер Наваий ядикарлиғиниң ечилидиғанлиғиға ишәнчә билдүрди. Ядикарлиқ вә әлчихана бенасини ечиш мәрасими аяқлашқандин кейин Президентлар «Шейхантахур» комплексини зиярәт қилип, Шейх Хавенди Тахур билән қазақ хәлқиниң көрнәклик җәмийәт әрбаби, шаир вә мутәпәккүр Төле биниң мәқбәрисини көздин кәчүрди.