• Йеңилиқлар
• 21 Маусым, 2013

Дуниявий дәриҗидики театр

Бүгүн пайтәхттә йеңи «Астана Опера» театри рәсмий ечилиду. Пайтәхтниң йеңи рәмзигә айлинидиған мошу надир мәдәнийәт объекти тоғрилиқ Қазақстан җумһурийити мәдәнийәт вә әхбарат министри Мухтар Қул-Мухаммед 18-июль күни өткән Һөкүмәт мәҗлисидә тәпсилий мәлумат бәрди. — Шуни ишәшлик тәкитләймәнки, мемарчилиқ услуби бойичә классикилиқ, ички безилиши бойичә заманивий театр болған «Астана Опера» пайтәхтимиз рәмзлириниң бири болупла қалмай, бәлки астаналиқлар билән шәһәр меһманлириниң әң сөйүмлүк театриға айлиниду, — дәп билдүрди министр. Театр Муқан Төлебаевниң «Биржан-Сара» миллий опериси билән ечилиду. Пайтәхт күнини нишанлаш даирисидә болса, театр мухлислири Петр Чайковскийниң «Уйқилиқ пәри» балетини тамашә қилиду. Дуниявий премьера болса октябрьда өткүзүлиду — Вердиниң «Аттила» опериси дәсләпки қетим Қазақстан сәһнисидә қоюлиду. Мухтар Қул-Мухаммед барлиқ спектакльларға пәқәт қазақстанлиқ опера вә балет сәнъити маһирлириниң, асасән яшларниң җәлип қилинғанлиғини алаһидә тилға алди. «Астана Операниң» тамашибинлар зали 1250 орунлуқ болуп, у тақасиман шәкилгә егә. Бенада шундақла йәнә қошумчә сәккиз зал, он бир репетиция бөлмиси, 250 орунлуқ камерилиқ музыка зали, мәтбуат зали вә башқа мәхсәтләргә молҗаланған бөлмиләр бар. Мәдәнийәт вә әхбарат министри Министрлар кабинетиниң барлиқ әзалирини театрниң ечилиш мәрасимиға тәклип қилип, билетларни кассидин елишқа болидиғанлиғини әсләтти. Мәҗлистин кейин Мухтар Абрар оғли журналистларға «Астана Опера» билетлириниң анчила қиммәт әмәс — оттура һесапта 1000 — 1500, студентлар үчүн 500 тәңгә екәнлигини хәвәр қилди.