• Спорт
• 03 Қыркүйек, 2020

Һаятқа болған ирадиси ғалип чиқти

Мәшүр САСИҚОВ,
«Уйғур авази»

29-август күни Украининиң пайтәхти Киев шәһиридә спортниң Street Lifting түри бойичә дуния чемпионати болуп өтти. Street Lifting – бу спортниң күчни әң көп тәләп қилидиған түри болуп, икки һәрикәтни өз ичигә алиду: турникта тартилиш вә бруста күч билән көтирилиш (отжимание) қилиш. Бу һәр икки мәшиқ спортчиниң белиға еғирлиқни күчәйтидиған пота бағланған һалда әмәлгә ашурулиду.
Мана мошундақ тинимсиз мәшиқләрни вә спортқа дегән зор иштияқни тәләп қилидиған спортниң түри билән узун жиллар шуғуллинип келиватқан уйғур жигити, үч мәртә Қазақстан чемпиони – Рамил Аблизов бу қетим ушбу чемпионатта иккинчи орунни егилиди. Елимизниң шәнини қоғдаш мәхситидә Украиниға атланған алтә спортчиниң бири — Рамил атлетлар арисида алаһидә һүнәр көрситип, судьяларниң жуқури баһасиға еришти. Рамил чемпионатқа тәйярлиқни хелила бурун башлиған. Шу түпәйли у спортниң бу түридә башқилар һәтта әмәлгә ашурушқа җүръәт қилалмиған бирнәччә элементлар арқилиқ һәқиқий воркаутер (турник билән брусниң маһирлири шундақ атилиду – М.С.) екәнлигини толуқ испатлиди.
Рамилниң утуғидин хәвәр тепип, униң тоғрилиқ мақалә йезиштин илгири Интернеттин азирақ мәлумат елиш үчүн уни варақлашқа кириштим. Дәсләп униң You Tubeтики шәхсий канилидики әхбаратлар билән видеоларға көз жүгәрттим. Һәйран қаларлиғи шуки, Рамил спортқа тәсадипи келип қалғанларға охшимайду. Мәлум болушичә, у кичигидә бәл омуртқисиниң дәрдини убданла тартқан көрүниду. Тәңтушлири турникларда у ян, бу ян есилип, һәрхил һәрикәтләрни қилғинида, униңда уларға болған қизғиниш пәйда болиду. Вақит өтүп, уму турникни өзигә дост тутқанлиғи түпәйли, биртәрәптин, ағриғидин бирәтола қутулған болса, иккинчидин, бәдән қурулушида тониғусиз өзгиришләр йүз беришкә башлайду һәм униңға бешичила киришип кетиду. Нәтиҗидә турушлуқ җайидики бәш-он балиниң беши қошулуп, улар һойлидики турникқа әтә-ахшими “арам” бәрмәйду.
Рамилниң канилида қалдурулған пикир-комментарийлардин шундақ хуласә чиқиришқа болидуки, у роһий чүшкүнлүкләргә берилмәй, өзиниң ағриғини йеңипла қалмастин, әксичә, қол йәткүзгән утуқлирини башқилар билән бөлүшүватқан ирадиси мустәһкәм шәхс. Һә, һазирқи заманда биздә бу толиму йетишмәйдиған хисләтләрниң биридур. Ейтишларға қариғанда, инсанниң әшәддий дүшмини, роһий чүшкүнлүккә баш егиш һесаплинидекән. Комментарийлар муәллиплири Рамил Аблизовниң әйнә шу дүшмәнни өзиниң тиришчанлиғи, һаятқа болған чәксиз муһәббити арқилиқ ғәлибә қазанғанлиғиға апирин ейтмақта.
Бизму һәммимизниң бешини көккә йәткүзүп, дуния чемпионатида мукапатлиқ орунға еришкән қериндишимизни сәмимий тәбрикләп, униң келәчәктә техиму егиз чоққилардин көрүнүшигә тиләкдашмиз.