• Әхбаратлар еқими
• 25 Қаңтар, 2023

Ахирқи қоңғурақ 1-июньда челиниду

Қазақстан мәктәплиридә Ахирқи қоңғурақ мәрасими 1-июньда өткүзүлиду. 
Бу тоғрилиқ Қазақстан Җумһурийити Маарип министрлиги Оттура билим бериш комитетиниң рәиси Гүлмира Кәримова хәвәр қилди. 
– Қазақстан мәктәплиридә оқуш жилиниң узақлиғи 36 һәптини тәшкил қилиду. Әнъәнә бойичә оқуш жили 1-сентябрьда башлиниду. Бийилдин башлап биздә оқуш жили 31-майда аяқлишиду. 31-май – оқуш күни, дәрисләрдин башқа балиларниң яш алаһидилиги һесапқа елинип, синиптин ташқири чарә-тәдбирләр өткүзүлиду, – дәп қошумчә қилди Гүлмира Кәримова.
Комитет рәисиниң тәкитлишичә, 1-июньда оқуғучилар рәсмий түрдә язлиқ дәм елишқа чиқиду. 1-июнь – Хәлиқара балиларни қоғдаш күни. Мошу мәйрәм билән бирқатарда мәктәпләрдә Ахирқи қоңғурақ мәрасимлири өткүзүлиду. 
Тәтил вақти илгәркидәк қалиду, йәни оқуш күнлири көпәймәйду вә тәтил вақтиму қисқармайду. Қазақстанлиқ мәктәп оқуғучилири барлиғи болуп жилиға 170 күн оқуп, 195 күн дәм алиду. 
2022-жилниң август ейида Маарип министрлиги Қазақстанда оқуш жилини узартиш тоғрилиқ қарарни тәстиқлиди – әнди оқуш жили 31-майда аяқлишиду. 
2023-жили 18-январьда Amanat партиясидин сайланған депутат Аманжол Алтай Қазақстан мәктәплиридә Ахирқи қоңғурақ мәрасимини 31-майдин башқа күнгә йөткәшни тәклип қилди. Гәп шуниңдики, 31-май Қазақстанда – Сәясий тәқип вә ачарчилиқ қурванлирини хатириләш күни. 
Депутат 31-май күни һәрбир ата-ана аилидә үлгә-ибрәтлик сөһбәтләрни жүргүзүши керәк екәнлигини қошумчә қилди. Униң пикричә, муәллимләр вә диний мәһкимиләр хизмәтчилириму шундақ қилиши лазим. Бу күни министрлар вә һакимларниң жиғинлириму қурван болғанларни хатириләш билән башлиниши керәк.