• Әхбаратлар еқими
• 25 Қаңтар, 2023

Йәттә партия қатнишиду

Мәркизий сайлам комиссиясиниң рәиси Нурлан Әбдиров идарә мәҗлисидә сәясий партияләрниң партиявий тизимлар бойичә сайлинидиған Парламент Мәҗлиси вә мәслиһәтләр сайлимиға қатнишидиғанлиғини ейтип өтти. 
Нурлан Әбдиров комиссия әзалириниң алдин-ала тегишлик һөҗҗәтләр билән тонушуп чиққанлиғини хәвәр қилди. 
– Биз уларни үгинип чиқтуқ, бу һөҗҗәтләрни бизгә Әдлийә министрлиги бәрди, биллә қарап чиқтуқ. Сәясий партияләрни Парламент Мәҗлисиниң сайлимиға қатнишиши тоғрилиқ йәттә тохтам қобул қилиш зөрүр, – деди Нурлан Әбдиров. 
Нәтиҗидә Мәркизий сайлам комиссияси әзалири Ақжол Қазақстан демократик партиясини, Аmanat партиясини, Ауыл Хәлиқ-демократик партиясини, Байтақ Қазақстан йешиллар партияси, Умуммиллий социал-демократик партиясини, Қазақстан Хәлиқ партиясини, Respublica партиясини сайламға қатнишиш һоқуқини бәрди. 
Бирақ партияләрни мәслиһәтләр депутатлириниң сайлимиға қоюп бериш сәл қийинирақ. 
Мәсилән, Мәркизий сайлам комиссияси рәисиниң тәкитлишичә, Байтак партиясиниң тегишлик қурулумлуқ бөлүнмилириниң йоқ болушиға бағлиқ пәқәт Атырав, Қариғанда вә Қизилорда вилайәтлиридила мәслиһәтләр сайлимиға қатнишалайду. 
Respublica партиясиниң тегишлик қурулумлуқ бөлүнмилириниң йоқ болушиға бағлиқ у мәслиһәтләр сайлимиға қатнишалмайду. 
– Намзатларни көрситиш 20-январьда башланди, у 8-февральғичә давам қилиду. Әгәр Байтақ вә Respublica партиялири мошу вақит ичидә регионларда өз шөбилири вә вакаләтханилирини ечип, уларни ройхәттин өткүзүп үлгәрсә, мәслиһәтләр депутатлиринң сайлимиға қатнишишқа рухсәт елиш имканийитигә егә болиду, – дәп тәкитлиди Мәркизий сайлам комиссиясиниң рәиси Нурлан Әбдиров. 
Аваз бериш нәтиҗиси бойичә Ак жол партияси, Amanat» партияси, Ауыл Хәлиқ-демократик партияси, Умуммиллий социал-демократик партияси вә Қазақстан Хәлиқ партияси мәслиһәтләр сайлимиға қоюп берилди.