• Әхбаратлар еқими
• 02 Мамыр, 2024

Күчимиз - бирликтә

Мәлумки, Қазақстан хәлқи Асамблеясиниң новәттики сессияси елимиздики пәвқуладдә әһвалға мунасивәтлик онлайн форматида өтти. Мән униңға Панфилов наһийәлик мәслиһәтниң депутати, Жетису вилайәтлик Уйғур этномәдәнийәт мәркизиниң рәиси сүпитидә Талдиқорған шәһиридә қатнаштим. 
Елимиз Президенти Қасым-Жомарт Тоқаев өз нутқида ҚХА достлуқни, бирликни мустәһкәмләйдиған әң чоң надир институт екәнлигини тәкитләп, новәттики сессияниң маһийитигә тохталди. Һәқиқәтәнму елимиз хәлқи наһайити бир муһим вәзийәтни баштин кәчүрүватиду. Қанчиму шәһәр вә йезилар су ташқини зәрдавини чекип, турғунлар баш-панасиз қелип, төрт түлүк чиқимға учриди. Мана мошундақ бир қийин вәзийәттә қазақстанлиқлар күчиниң бирликтә екәнлигини испатлап, бир-биригә ярдәм қолини сунмақта. Көпмилләтлик җумһурийәт хәлқиниң милләтләрара разимәнлиги билән достлуғиниң мустәһкәмлиги түпәйли бу синақтинму сүрүнмәй өтидиғанлиғимизни тәкитлигән Дөләт рәһбири әндики жили ҚХА қурулғиниға 30 жил толидиғанлиғини ейтип өтти. Шундақ екән, униң паалийитини биз хәлиққә тәшвиқат қилип, чүшәндүрүп, хәлиқләр достлуғи билән бирлигини мустәһкәмләйдиған иш-чариләрни уюштурушимиз һаҗәт.
– Һөкүмәт Қазақстан хәлқи Ассамблеясиниң қурулғининиң 30 жиллиғини атап өтидиған иш-чариләрниң реҗисини тәйярлайду. У дөләтлик органлар, сәясий партияләр, җәмийәтлик тәшкилатлар, илим-пән вә мәдәнийәт хадимлири, җәмийәт әрбаплири қатнишидиған чариләр болушиға тегиш, – деди Қасым-Жомарт Тоқаев өз сөзидә. 
Президентниң сессиядә сөзлигән нутқи бизниң келәчигимизгә көрсәтмә, алға қойған мәхсәтлиримиз болуши лазим. Чүнки бирлик болған йәрдә биз утуқ-муваппәқийәткә йетимиз. Елимиз бешиға күн чүшсиму, пәқәт бирлик вә достлуғимиз билән йеңимиз. Чүнки һәқиқәтәнму күчимиз бирликтә. Дөләт рәһбириниң һәрбир көрсәтмисини әмәлгә ашуруш үчүн җай-җайларда чарә-тәдбирләрни елип баримиз. Улар милләтларара разимәнлик вә әзәлдин келиватқан қериндашлиқ риштилиримизни әкис әттүридиған болиду. Болупму көпмилләтлик Жетису вилайити, Яркәнт тәвәси хәлқи билән бирликтә елип баридиған ишларни мәслиһәтләшкән һалда әмәлгә ашуридиған болимиз.
 
Турғанҗан ЗАЙИТОВ, 
ҚХА әзаси

Жетису вилайити,
Панфилов наһийәси