• Әхбаратлар еқими
• 02 Мамыр, 2024

Мәхситимиз – рошән

Ассамблея бәзи адәмләр ейтип жүргәндәк, сүнъий тәшкилат әмәслигигә тохталған Дөләт рәһбири бүгүнки күндә мәзкүр қурулум конституциялик мәртивигә егә муһим җәмийәтлик орган екәнлигини қәйт қилди. Президент еғир синақ һәм ховупларға қаримастин, елимиз стратегиялик мәхсәт-вәзипилиридин баш тартмайдиғанлиғиға диққәт ағдурди. Дөләт рәһбириниң қәйт қилишичә, аз вақит ичидә жүргүзүлгән сәясий ислаһатлар нәтиҗисидә һакимийәтниң барлиқ тармиғи адәмниң қануний мәнпийитини, һоқуқи билән әркинлигини һимайә қилишқа вә уни йүксәлдүрүшкә асасланған йеңи система бойичә паалийәт жүргүзди. Әндики вәзипә — адаләтлик, инклюзивлиқ, прагматизм қаидилиригә асасланған вә хәлиқниң турмуш-әһвалини яхшилашни көзләйдиған йеңи ихтисат үлгисигә көчүш.
– Биз күч-қувитимизни бириктүрүш арқилиқла йеңи утуқларға қол йәткүзүп, сәясәттә, ихтисатта, мәдәнийәттә вә иҗтимаий саһада зор өзгиришләр ясалаймиз. Шу сәвәптин Ассамблеяниң бүгүнки сессияси «Бирлик. Бәрпакарлиқ. Тәрәққият» дәп аталди. Қазақстан хәлқи Ассамблеясиниңла әмәс, барчә хәлқимизниң стратегиялик программа-йөнилишиниң түпки мәхситини ушбу үч чүшәнчә-уқум дәл һәм ениқ билдүриду, — деди Президент. 
Президент мошу мәхсәткә йетиш үчүн орунлинишқа тегиш бирнәччә вәзипигә тохтилип өтти. Қасым-Жомарт Тоқаев, алди билән, ҚХА паалийитини елимизниң йеңи гуманитарлиқ идеологиялик доктриниси билән уйғунлаштуруш һаҗәт дәп һесаплайду.
– Чоң ишлар кичик һәрикәтләрдин башлиниду. Шуниңға охшаш кичик қәдәмләр чоң өзгиришләргә йол ачиду. Һәрбир адәмниң ой-тәпәккүри вә мүҗәз-хулқи яхшиланса, туташ җәмийәтму яхшилиниду. Мәхсәт-муради бүйүк болса, мәмликәтниң роһиму бүйүк болиду. «Адил граждан» болуш бәк муһим. Бир сөз билән ейтсақ, нашайин һәрикәтләрдин нәпрәтлинипла қоюш йәткүлүксиз. Уни түп-асасидин йоқ қилишқиму паал ат селишиш керәк, — деди Дөләт рәһбири. Шундақла Президент җәмийәттә миллитигә қарап бөлүнүшкә, пәриқлинишкә интилған һәрқандақ һәрикәткә, болупму гражданларни тилиға, миллитигә, диниға яки мәдәнийитигә бола камситишқа тамамән йол қоймайдиған муһит шәкилләндүрүш муһим екәнлигини ейтти. 
– Дунияда һәммимизни тәшвишләндүридиған һәрхил вақиәләр болуватиду. Биртуташ милләт сүпитидә нәқ мошу пәйттә бизниң мәхситимизму, нийитимизму бир болушқа тегиш, — деди Қасым-Жомарт Тоқаев.
Дөләт рәһбири хуласә сөзидә елимиз ахирқи жиллири интайин еғир синақларниң йәнә бир тарихий дәврини баштин кәчүрүватқанлиғини ейтип, бирлик билән иттипақлиқниң нәтиҗисидә бу қийинчилиқниң һәммисини йеңидиғинимизға, чиниқип, тавлинип, бурунқидинму бәқувәт болуп чиқидиғинимизға ишәнчә билдүрди.
– Тарих учраштурған тәғдиримиз – бир, ишәнчә-үмүт билән қәдәм басидиған келәчигимиз – бир. Биз биртуташ милләт сүпитидә һәрдайим әҗдатлар аманитигә адил болимиз. Қазақстанниң парлақ келәчигини биллә қуримиз. Бизниң мәхситимиз — рошән, бу — Адаләтлик Қазақстанни қуруш — деди Қасым-Жомарт Тоқаев.

Тиләпҗан ИБРАГИМОВ,
Ақтөбә вилайәтлик Уйғур этномәдәнийәт 
мәркизиниң рәиси, ҚХА әзаси