• Әхбаратлар еқими
• 02 Мамыр, 2024

Өмлүги бар дөләтниң келәчиги зор

Қазақстан хәлқи Ассамблеясиниң новәттики ХХХІІІ сессияси Президент Қасым-Жомарт Тоқаевниң тәкливи билән онлайн-шәкилдә өтти. Дөләт рәһбири елимизниң айрим регионлирида йүз бәргән тәбиий апәткә мунасивәтлик мошу қарарни қобул қилди. 
 Ассамблея дуния җамаәтчилиги етирап қилған надир институт екәнлигини тәкрарлап келиватимиз һәм буни дайим ейтип турушимиз һаҗәт. Қазақстандәк көпмилләтлик дөләттики течлиқ, өмлүк, разимәнликкә башқа әлләр һәвәс билән қарайду. Амма бизниң әйнә шу утуқлиримизни көрәлмәйватқанларму йоқ әмәс. Президент буни очуқ ейтти һәм әйнә шу иғвалардин пәхәс болушимизни алаһидә тәкитлиди.
 Елимиздә истиқамәт қиливатқан милләтләрниң өмлүги, һисдашлиғи, жуқури гражданлиқ җавапкәрлиги мана мошу қийин күнләрдә ярқин көрүнди. Қазақстанлиқлар бирликтә апәт йүз бәргән регионларға ярдәм қолини сунушқа киришти. Болупму ҚХА әзалири дәрһал ишқа киришип, гуманитарлиқ ярдәм топлашни башлиди. Президент ейтқинидәк, 12 миң Ассамблея пидаийлири апәт йүз бәргән регионларда ишлиди. Қошумчә қилсам, ҚУЯБ рәиси Рустәм Хәйриев Алмутидин гуманитарлиқ ярдәмни топлаш вә йәткүзүш ишлириға паал қатнашти. Буни Дөләт рәһбири тәкитләп өтти. Қасым-Жомарт Тоқаев су кәлкүнигә қарши күрәшкә зор үлүш қошқан сахавәтлик, вәтәнпәрвәр, меһриван инсанларға миннәтдарлиғини изһар қилди. 
 Сессиядә Президент Қазақстан хәлқи Ассамблеясиниң паалийитигә яхши баһа бәрди. Елимиздики җиддий мәсилиләрни бирлишип, йәни ихтисат, сәясәт, иҗтимаий саһалардики мәсилиләрни «бәрпа қилиш, қуруш, әмәлгә ашуруш» стратегияси билән өзгириши керәклигини қәйт қилди. Әлвәттә, Қазақстан тәрәққий етиши үчүн, алдимиздики муһим вәзипиләрни һәл қилип, бирлик вә өмлүк охшаш қәдрийәтләрни сақлишимиз лазим. Чүнки өмлүги бар дөләтниң келәчиги бар.
 Мән бу новәттә Дөләт рәһбири қолидин «Ел бірлігі» орденини елиш бәхтигә муйәссәр болдум. Бу орден елимиздә бирликни, течлиқни, милләтләрара разимәнликни қолға кәлтүрүштә чоң үлүш қошқан шәхсләргә берилиду. Әмгигимниң шундақ баһалиниши мениң үчүн чоң мәртивә. Мән бу мукапат маңила әмәс, қазақстанлиқ уйғурларға болған һөрмәт екәнлигини алаһидә тәкитлигүм келиду.
 Һәммимизгә мәлумки, ҚХА сессияси һәр жили Қазақстан хәлқи бирлиги мәйрими һарписида өтиду. Мән, пурсәттин пайдилинип, барлиқ қазақстанлиқларни мәйрәм билән тәбрикләп, аилисигә хатирҗәмлик, ишиға утуқлар тиләймән.

 Мурат ӘХМӘДИЕВ, 
Қазақстан хәлиқ артисти