• Йеңилиқлар
• 20 Қыркүйек, 2013

МӘРГӘН

Һәрбий сәптикиләр Илгири, кәспий офицерларға яки муддәтлик һәрбий борчини ада қилғандин кейин алтә ай давамида тәйярлиқтин өткән яшларғила һәрбий қисимларда ишләшкә йолланма бериләтти. Шундақла, техникилиқ билимгә егә мутәхәссисләрму мошундақ һоқуққа егә еди. Түзүмниң өзгириши билән, җай-җайлардикидәк, Уйғур наһийәсидики ясақлардиму хошна әлләрдин келип ишләватқан һәрбийләр вәтинигә қайтурулуп, мәхсус оттура вә алий билими бар көплигән йәрлик қиз-жигитләр  һәрбий хизмәткә қобул қилинди. Чонҗилиқ Маликҗан Аминовму мошуниңдин 17 жил муқәддәм чегаричилар сепидин орун елип, бүгүнки күндә хизмитини шәрәп билән атқуруватқан жигитләрниң бири. Маликҗанниң әсли кәспи — муәллим. Йезидики рус оттура мәктивини тамамлап, 1989—1992-жиллири у Яркәнт педагогилиқ училищесида тәһсил көриду. Андин ана жутиға қайтип келип өзи учум болған билим юртида төрт жил давамида устазлиқ қилған. Кейин бир түркүм яшлар қатарида Чонҗидики 2534-санлиқ чегаричилар отрядиға хизмәткә орунлишиду. Һәрбий адәмниң күндилик хизмити асан иш әмәс. Әгәр у дөләтлик чегара күзитидә болса, униңға жүкләнгән вәзипә — һәм шәрәплик, һәм хәтәрлик. Һәр күни дегидәк өткүзүлүп туридиған җәңгивар мәшиқләр билән җисманий тәйярлиқларниң қийинчилиғи өз алдиға, әлвәттә. Затән,  әзәлдинла, ички дунияси романтизмға толған яшлар үчүн һәрбий хизмәтму мошу тәрәплири билән мәптункар болса керәк. Ейтиш керәкки, нәқ мошу хил мәшиқләрдә Маликҗан өзиниң мәргәнлиги билән көзгә чүшкән еди. Көп өтмәйла, Алмута шәһири әтрапидики «Қараой» дала-оқутуш мәркизидә Қирғизстан, Грузия, Россия вә Қазақстанниң чегаричилири һәм Миллий гвардиямиз җәңчилири иштракида өткүзүлгән байқашта мәргәнләр милтиғи, автомат вә тапанчидин оқ етиш бойичә у иккинчи орунни егиләп,  Қазақстан чегаричилириниң умумһесапта биринчи орунни йеңивелишиға үлүш қошиду. 2005-жилдин Россияниң Ярославль шәһиридә МДҺ әллири чегаричилириниң байқиши турақлиқ өткүзүлүватиду. Униңда өткән сәккиз жил мабайнида Қазақстан Җумһурийити Миллий Бехәтәрлик комитетиниң чегара хизмити қошунлири иккинчи орунни қолдин бәрмәй кәлмәктә. Бу йәрдә, хәлиқара байқашларда әң жуқури көрсәткүчләргә қол йәткүзгән бәш мәргәнниң бири, өткүр көзлүк Маликҗанниң төһписи тилға аларлиқ, әлвәттә. Он алтун, бәш күмүч вә сәккиз бронза медальниң саһиби өткән бир жилниң ичидила Миллий Бехәтәрлик комитети, «Шығыс» регионаллиқ башқармиси, наһийәлик һакимийәт охшаш бир нәччә идариниң Пәхрий ярлиқлири билән мукапатланди. Буниң һәммиси, чоң прапорщик Маликҗан Аминовниң адил хизмитигә берилгән мунасип баһа, әлвәттә. Оғлиниң утуқлиридин ата-аниси Камил ака билән Мерхан һәдиму пәхирлиниду. Төрт оғул вә икки қиз тәрбийилигән улар һазир һөрмәтлик дәм елишта.  Һәдимиз бир өмүр йеза турғунлириниң саламәтлиги күзитидә болди. Камил ака болса, наһийәлик ички ишлар бөлүмидә аһалиниң тиничлиғини күзәтти. Умумән, Аминовларни һәрбийләр сулалиси десәкму болиду. Ата изи билән маңған Маликҗанниң чоң оғли Әлишер чегаричилар Академиясидә оқуватиду. Кәлгүсидә уму атиси охшаш әл тиничлиғини күзитиған болиду. Укилири Кәримҗан билән Мәликәм — мәктәптә оқуватиду. Мақалимиз қәһриманиниң өмүрлүк җүпти Халидәм болса, үлгилик устазлардин.  Өзара мунасивәттә бир-биригә нисбәтән сий-илтипати билән башқиларға үлгә-ибрәт болуп келиватқан бу бәхитлик аилә егилиригә аманчилиқ тиләп, утуқ вә амәтләр яр болсун демәкчимиз.

Махмут ИСРАПИЛОВ.

Уйғур наһийәси.