• Йеңилиқлар
• 27 Қыркүйек, 2013

Доктрина муһакимә қилинди

20-сентябрь күни «Нур Отан» ХДП мәркизий идарисидә зиялиларниң қатнишиши билән партияниң сәясий доктринисиниң лайиһиси муһакимә қилинди. Униңға «Нур Отан» партиясиниң биринчи орунбасари Бауыржан  Байбек, Мәҗлис депутати — «Мирас» сәнъәт вә мәдәнийәт тәрәққияти мәсилилири бойичә җәмийәтлик кеңәшниң рәиси Қуаныш  Султанов,  Мәҗлисниң Хәлиқара, мудапиә вә бехәтәрлик ишлири бойичә комитетниң рәиси Мәулен Әшимбаев,Қазақстан Җумһурийитиниң хизмәт көрсәткән мәдәнийәт әрбаплири — Фариза Оңғарсынова, Мырзатай Жолдасбеков, Әким Тарази, Саутбек Абдрахманов, Алдан Смайил, Несипбек Айтов, Намазалы Омашев вә башқилар қатнашти. Бауыржан Байбек өз нутқида мәзкүр сәясий доктрининиң роли вә әһмийити тоғрилиқ  ейтип, дәсләпки қетим мошу һөҗҗәттә мәдәнийәт, мәнивий байлиқлар ихтисат вә сәясәт билән бир қатарда қоюлғанлиғини тәкитлиди. Доктрина лайиһисидә «...мәдәнийәт вә мәнивий байлиқлиримиз милләтләрни бирләштүриду, уларниң характерини шәкилләндүриду. Биз мәдәнийәтни җәмийәтниң әһмийәтлик саһаси сүпитидә қараймиз, йәни сәясәт вә ихтисатниң әһмийити билән баравәр екәнлигини иқрар қилимиз. У бизниң тилимизда, тарихий қәдрийәтлиримиздә, әнъәнилиримиздә вә рәмзләрдә өз әксини тапқан. Дөләт тили миллий вә мәнивий бирликниң асасий фактори болуши керәк. Мәдәнийәт вә әнъәнивий мәнивий қәдрийәтләр милләтниң сақлинишиниң вә варислиқниң капалити болуп қалиду», дәп тәкитләнгән. Бу жиғинда сөзгә чиққан Фариза Оңғарсынова, Мырзатай Жолдасбеков, Ғарифолла Есим вә башқилар лайиһидики асаслиқ чүшәнчиләргә мунасивәтлик өз пикирлирини ейтти. Қуаныш Султанов тәкитлигинидәк, партияниң сәясий доктринисиниң лайиһиси аммивий әхбарат васитилиридә елан қилинди. Уни «Нур Отан» ХДП фракцияси депутатлириниң, Һөкүмәт әзалириниң сәясий кеңәш, сәясий кеңәш бюро әзалириниң қатнишиши билән муһакимә қилиш ишлири башланди. Сәясий доктрининиң лайиһиси партияниң http://ru.nurotan.kz/novostі/obschіe/doctrіne рәсмий сайтида елан қилинди. Лайиһиниң мәтинигә мунасивәтлик тәклипләрни doctrіne@nurotan.kz электронлуқ почтисиға әвәтишкә болиду. Сәясий доктринини 2013-жили 18-октябрьдә өтидиған «Нур Отан» партиясиниң XV қурултийида қобул қилиш мәхсәт қилинмақта. «Нур Отан» — нурлуқ келәчәк йолида» «Нур Отан» Хәлиқ Демократик партиясиниң аброй-инавити күн санап өсмәктә. Униң җай-җайлардики постлири назарәт ишлирини елип барса, аддий хәлиқ өзиниң муң-муһтаҗи билән җәмийәтлик қобулханиларға мураҗиәт қилмақта. Елимиз тәрәққиятиниң йөнилишлири бойичә дөләтлик программиларниң әмәлиятта орунлинишиға өз төһписини қошуватқан мәзкүр партия өзиниң новәттики ХV съези һарписида йеңи сәясий доктрина тәйярлап,  башланғуч партия тәшкилатлириниң муһакимисигә тәвсийә қилғанлиғи мәлум. Уйғур наһийәсидики башланғуч партия тәшкилатлиридиму бу йосундики учришишларниң асасий мавзуси әйнә шу доктрина әтрапида болуп, уларниң давами «Нур Отан» ХДП наһийәлик шөбисиниң новәттин ташқири ХІ конференциясигә улашти. Наһийәлик Мәдәнийәт өйидә болуп өткән мәзкүр конференциягә башланғуч партия тәшкилатлиридин 241 делегат иштрак қилди. Дөләт Гимни яңрап, андин наһийә һакими, «Нур Отан» ХДП наһийәлик шөбисиниң рәиси Көйүмчан Өмәров «Қазақстан-2050» Стратегиясини әмәлгә ашурушта «Нур Отан» Хәлиқ Демократик партиясиниң йеңи вәзипилири тоғрилиқ» доклади билән нуротанлиқлар алдида сөзгә чиқти. — «Нур Отан» — нурлуқ келәчәк йолида» намлиқ бу доктрина  йеңи сәясий һөҗҗәт. У елимизниң һәрбир турғуниға ғәмхорлуқ көрситип, ихтисадий тәрәққият вә гүлләнгән дөләт қуруш йолида барлиқ вәзипиләрниң җәзмән орунлинишини тәминләшкә асасланған, — дәп тәкитлигән Көйүмчан Аван оғли мәмликитимизниң бүгүнки утуқлирини атап көрситип,  наһийә нәпәсигә тохталди. Сөз новити «Нур Отан» ХДП наһийәлик шөбиси рәисиниң биринчи орунбасари Мәулен Нуровқа берилип, у мәзкүр партияниң елимиздики асасий сәясий күчни бириктүридиғанлиғини тәкитлиди. Һә, партияниң ишәнч вә үмүти болса, бу, униң җай-җайлардики башланғуч тәшкилатлирида. Шуңлашқа, уларниң иш-паалийитини җанландурушқа көп әһмийәт берилмәктә. Мошуларни қәйт қилған Мәулен Муқажан оғли  қазақстанлиқ қәдрийәтләрни сақлап, бейитишқа қаритилған йеңи сәясий һөҗҗәтниң йөнилишлири бойичә әтраплиқ чүшәнчә бәрди. Баш қошушта шундақла, Чонҗа йезилиқ ақсақаллар вә ветеранлар кеңишиниң рәиси Мирзәхмәт Җәмиев вә наһийәлик «Әжелер алқасының» рәиси Рая Сартоловалар муһакимә сөзгә чиқип, өз ой-пикирлири билән ортақлашти. Делегатлар вакаләтликлирини бәкитиш үчүн мандат комиссиясиниң рәиси Арзигүл Манапованиң әхбарати тиңшилип, андин сөз новитини алған наһийәлик «Жас қанат» Яшлар қанитиниң иҗраий кативи Артем Коммунаров наһийә яшлири алдида турған муһим муәммаларға тохталди. Шуниңдин кейин Қазақстан Җумһурийити Парламенти Мәҗлисиниң депутати Үсенгелди Медеуов минбәргә чиқип, «Нур Отан» ХДПниң йеңи доктринисиниң алаһидиликлиригә тохтилип өтти. Конференция давамида қаралған мәсилиләр бойичә қарарлар қобул қилинип, вилайәтлик  конференциягә делегатлар сайланғандин кейин Көйүмчан Өмәров конференция ишини йәкүнлиди.

Махмут ИСРАПИЛОВ.

Уйғур наһийәси. Мәҗлис депутатлири наһийәдә болди Йеқинда Қазақстан Җумһурийити Парламенти Мәҗлисиниң депутатлири Қуаныш Султанов билән Темирхан Досмуханбетов Панфилов наһийәсидә болуп, тәвәниң бүгүнки таңдики һаят-нәпәси билән тонушти. Уларға Алмута вилайәтлик мәслиһәтниң кативи Ермек Келемсеит вә наһийә һакими Бөлтирик Жақыпов һәмра болди. Депутатлар алди билән наһийәлик Мәдәнийәт өйиниң алдидики Желтоқсан вақиәсиниң қурванлири Ербол Сипатаев билән Ләззәт Асанованиң хатирисигә орнитилған ядикарлиққа гүлчәмбәрләрни қоюп, мәрһумлар роһиға тазим қилди. Андин Мәдәнийәт өйидики йеза егилиги, билим вә медицина, шундақла тиҗарәт саһалириға мунасивәтлик уюштурулған көргәзмә билән тонушти. Шуниңдин кейин «Нур Отан» ХДП наһийәлик шөбисиниң новәттин ташқири өткән ХІІ конференциясигә қатнашти. Конференциядә партияниң наһийәлик шөбисиниң рәиси, наһийә һакими Бөлтирик Жақыпов доклад билән сөзгә чиқти. Натиқ өз сөзидә «Қазақстан-2050» Стратегиясини әмәлгә ашуруш бойичә нуротанлиқлар алдида турған вәзипиләр һәм һазирқи пәйттә уларни орунлаш үчүн жүргүзүлүватқан ишлар һәққидә тәпсилий тохталди. Җүмлидин наһийәдики 18 башланғуч тәшкилатта партияниң 6331 әзаси бар екәнлигини вә уларниң барлиқ саһаларда үлгилик әмгәк қилип, бу инавәтлик сәясий тәшкилатниң шәнигә дағ чүшәрмәй келиватқанлиғини алаһидә тәкитлиди. Партия шөбиси рәисиниң биринчи орунбасари Ермек Нурахметов қошумчә доклад билән сөзгә чиқип, партия сәясий доктринисиниң башланғуч тәшкилатларда қизғин муһакимә қилиниватқанлиғини, партияниң ХV съези һарписида елип бериливатқан ишлар хусусида ейтип өтти. Конференциядә «Қарасу» кооперативиниң рәиси, «Құрмет» ордениниң саһиби Күлғайша Бердиғулова, «Панфилов наһийәлик мәркизий ағриқханиси» дөләт ғәзнилик карханисиниң баш врачи Төлеу Сәрпеков, пешқәдәм устаз Санийәм  Зулиярова вә башқилар музакирә сөзгә чиқти. Өз новитидә «Нур Отан» ХДП сәясий Кеңишиниң әзаси, Мәҗлис депутати Қуаныш Султанов сөзгә чиқип, нуротанлиқларниң җумһурийәттә әмәлгә ашуруватқан ибрәтлик ишлириға тохталди. Конференция  қатнашқучилири тәрипидин қоюлған бирқатар соалларға қанаәтлинәрлик җавап бәрди. Мәҗлис депутатлири сәпәр җәриянида шәхсий дехан егиликлири рәһбәрлири билән «дүгләк үстәл» әтрапида сөһбәтлишип, униңда оттуриға қоюлған мәсилиләрни һәл қилишқа ат селишидиғанлиғини ейтти.

Нурәхмәт ӘХМӘТОВ.

Панфилов наһийәси.