• Йеңилиқлар
• 26 Желтоқсан, 2013

Қазақстанниң течлиқпәрвәрлик миссияси

Парламент палатилириниң 20-декабрьда болуп өткән бирләшкән мәҗлисидә депутатлар Президент Нурсултан Назарбаевниң БМТниң миссиялиригә қатнишиш үчүн Қазақстан Қураллиқ күчлириниң офицерлирини байқиғучилар сүпитидә әвәтиш тоғрилиқ тәкливини бир еғиздин қоллап-қувәтлиди.БМТниң Гаитидики, Кот-д’­­­­­­­­­­­­­ Ивуардики, Ғәрбий Сахаридики вә Либериядики миссиялиригә қатнишиш үчүн Қазақстандин барлиғи болуп жигирмә адәм әвәтиш тәклип қилиниватиду. —            Кейинки жилларда дуния бирләшмисиниң түрлүк регионлардики қураллиқ тоқунушларни течлиқпәрвәрлик операцияләрни жүргүзүп, течлиқ йоли билән бир тәрәп қилишқа ярдәм беришкә қаритилған күч-қувити җиддий өсүватиду. Статистика мәлуматлириға мувапиқ, 1992-жилдин тартип дуниядики дөләтләрара тоқунушларниң сани 40 пайиз қисқарди, бу көп җәһәттин БМТниң течлиқпәрвәрлик операциялириниң жүргүзүлүшигә бағлиқ. Течлиқни сақлаш хәлиқара коллективлиқ мәҗбурийәт болуп һесаплиниду вә БМТниң низамнамисиға мувапиқ, униңға әза болған барлиқ дөләтләр хәлиқара течлиқ һәм бехәтәрликни сақлаш үчүн течлиқпәрвәрлик контингентларни бөлүшкә келишкән, — дейилиду Президентниң мураҗиитидә. Уни мудапиә министри Әдилбек Жақсыбеков оқуп бәрди. Мураҗиәттә шундақла қазақстанлиқ һәрбий хизмәтчиләрни БМТниң течлиқпәрвәрлик миссиясигә әвәтишниң БМТниң течлиқни вә бехәтәрликни сақлаш бойичә алий оргини болуп һесаланған БМТ Бехәтәрлик кеңишиниң сайлимида вә БМТ Баш ассамблеясиниң 71-сессиясиниң рәиси лавазимиға Қазақстан Җумһурийтиниң намзитини илгирилитиш үчүн ярдәм қилидиғанлиғи тәкитлиниду. Депутатлар мудапиә министриға бирнәччә соалларни қойди. Җүмлидин улар биз БМТниң чәт әлләрдики миссиясини орунлиғанда зиян тартишимиз мүмкинму дегән соалму  қоюлди. —            Очуқ ейтимәнки, һәқиқәтәнму шундақ еһтималлиқ моҗут. Биз һәрбий хизмәтчиләрни тоқунуш моҗут болған, һәрбий-сәясий әһвал турақлиқ болмиған вә мәлум тавакәлчиликләргә бағлиқ регионларға әвәтимиз. Тәкитлигүм келидуки, байқиғучилар тоқунушларға қатнашмайду, улар һәтта бу миссиягә қуралсиз әвәтилиду. Уларниң асасий вәзиписи байқаш вә мониторингқа һәм БМТ үчүн вәзийәт тоғрилиқ доклад қилишқа ярдәм қилиштин ибарәт. Бирақ шуниң билән бир вақитта биздә мошу мәсилидә барлиқ қануний нормилар көздә тутулди. Һәрбий хизмәтчиләр ихтиярий асаста таллавелиниду, — дәп тәкитлиди Әдилбек Жақсыбеков. Униң сөзичә, қазақстанлиқ һәрбий хизмәтчиләрни әвәтидиған мәмликәтни таллиғанда, Қазақстан ташқи сәясий әвзәлликләргә әмәл қилған. Әдилбек Жақсыбеков «мошу миссияләргә қатнишишниң Қазақстанниң шу әлләр билән болған мунасивәтлиригә тәсир қилмайдиғанлиғини» вә шуниң билән бир вақитта җуһмурийәтниң хәлиқара абройини ашурушқа чоң һәссә қошидиғанлиғини тәкитлиди.