• Дидар ғенимәт
• 20 Наурыз, 2014

Бар болуңлар, синипдашлар

Товва, вақит немә дегән жүгрүк! Техи түнүгүнла мәхсус формиларни кийип, бешимизға ақ бантикларни тақап, мәктәп дәлизлиридә жүгрәп жүрүведуқ. Һә, һазирзә өмүрниң сәксининчи даваниға өрләп, нәврә-чәврилиримизниң қизиғини көрүп, қерилиқ гәштини сүрүватимиз.Сүрәттики ханим-қизлар — 1958-жили тарихий Вәтинимизниң Чөчәк шәһиридики Махмут Қәшқәрий намидики қизлар оттура мәктивини тамамлиған учумкарлар. Шуниңдин кейин тәғдир һәр қайсимизни һәрян ташлавәтти. Биримиз ана топриғимизда қелип, тирикчилигимизни давам қилсақ, йәнә биримизгә алий вә оттура билим дәргаһлирида тәһсил көрүш несип болди. Көпчилигимизгә, мәлум сәвәпләргә бола, сабиқ Кеңәш Иттипақи тәркивидики җумһурийәтләргә көчүп чиқишқа тоғра кәлди. Биз, һазир Алмута шәһиридә вә униң әтрапидики жутларда истиқамәт қиливатқан синипдашлар вә бәзи чөчәклик жутдаш ханим-қизлар һелиму достлуқ, қериндашлиқ риштилиримизни үзмәй келиватимиз. Тәкитләш керәкки, бешимизни қошуп келиватқан гүлчейимиз пәқәт вақит өткүзүш үчүнла әмәс, миллий мәнпийитимиз йолида хизмәт қилиш һәм шу арқилиқ миллитимиз тәрәққиятиға мисқалчилик болсиму төһпә қошуш мәхситидә қурулған. Әйнә шундақ от жүрәклик синипдашлиримиз ичидә Саадәт Һейтбақиева Үрүмчи медицина институтини тамамлап, узун жиллар давамида фармацевтика саһасида ишлигән. Зәйтүнәм Һашимова болса, Беҗин сәнъәт институтида тәһсил көргән. У Алмутидики А.Розибақиев намидики 153-мәктәп-гимназиядә хизмәт қилип, нами көпчиликкә яхши тонулған «Сәйярә» ансамблиниң асасини салғучиларниң бири болди. Һә, Үрүмчи сәнъәт институтиниң учумкари, пешқәдәм устаз вә нахшичи Рабийә Мәмәтовани билмәйдиғанлар йоқ болса керәк. У қолидин қәшқәр рававини чүшәрмәй, уйғурниң қедимий нахша-сазини һелиму яңритип кәлмәктә. Гүлчай әзаси, йәнә бир жутдишимиз Таҗиниса Сәйдимова — җәмийәтлик ишларниң активисти. Һазир җумһурийәтлик Уйғур этномәдәнийәт мәркизиниң башқарма әзаси сүпитидә көплигән нәмунилик паалийәтләрниң паал иштракчиси болмақта. Мән өзәм Талғир наһийәсиниң Туздыбастав йезисидики 31-оттура мәктәптә математика пәнидин дәрис берип, пүткүл аңлиқ һаятимни маарип саһасиға беғишлиған пешқәдәм устазларниң бири. Биз бийил Өзбәкстан, Қирғизстан тәвәлиридики синипдашлиримизни Алмутиға тәклип қилип, учришишни нийәт қиливатимиз. Илаһим, Алла һәр биримизниң шу күнләргә аман-есән, сақ-саламәт йетишимизгә несип қилғай!

Гүлҗәннәт Баситқизи,

пешқәдәм устаз.