• Мәдәний мирас
• 27 Сәуір, 2012

«Гүлчай» Яркәнткә кәлди

«Гүлчай» — хәлқимизниң әң қедимий миллий әнъәнилириниң бири. Әҗдатлиримиз қалдуруп кәткән миллий урпи-адәт, рәсим-қаидиләргә әмәл қилған һалда өтидиған «Гүлчайниң» тәрбийәвий әһмийити зор екәнлиги талашсиз. Йеқинда Яркәнт шәһиридә уюштурулған «Гүлчай» мәрасимиға ханим-қизлар кеңәшлиригә вакаләтлик қилған Алмута шәһириниң бир қанчә наһийәсидин, Талғир, Әмгәкчиқазақ, Уйғур наһийәлиридин инавәтлик анилар қәдәм тәшрип қилди. Шәһәрдики «Ирадә» меһманханисида өткән «Гүлчай» мәрасимини җәмийәтлик ишларниң активистлири Роза Надирова билән Гүлбәһрәм Малибаева шеирий мисралар билән ечип униңға, риясәтчилик қилди. Дәсләп наһийәлик Уйғур мәдәнийәт мәркизиниң рәиси Реһимҗан Тохтахунов билән униң орунбасари Дилшат Насиров сөз елип, яшларни бирликкә, достлуққа, иттипақлиққа дәвәт қилип, унтулуп кетиватқан миллий урпи-адәт, рәсим-қаидиләрни риваҗландурушқа беғишланған «Гүлчай» һәққидә ейтип өтти. Шуниңдин кейин «Гүлчайниң» рәмзлик тавиғи қолдин-қолға өтүп, бейит, қошақлар арқилиқ ханим-қизларни арилап чиқти. Андин мәзкүр тәнтәниниң тәшәббускари, җумһурийәтлик Уйғур мәдәнийәт мәркизи йенидики Ханим-қизлар кеңишиниң рәиси, Қазақстан хәлқи Ассамблеясиниң әзаси Әхтирим Әхмәтова сөз елип, «Гүлчайниң» әһмийити, униң әзәлдин хәлқи меһмандост, бирлиги билән достлуғи ярашқан Яркәнт тәвәсидә миллий әнъәниләр асасида өтүватқанлиғини тәкитлиди. Андин келинни саламға елип кириш, бөшүк той һәм бовақни бөшүккә селиш, анилиримиз мираси — супурниң бүгүнки күндә турмушимизда қоллинилиши тоғрилиқ сәһниләштүрүлгән қоюлумлар намайиш қилинди. Бу күни «Гүлчай» иштракчилири сәнъәткар Полат Һезимов рәһбәрлик қиливатқан «Ирадә» миллий нахша-уссул ансамблиниң вә атақлиқ сәнъәткар Айтурған Һасанованиң иҗрасидики нахшилардин бәһир алди. Шундақла аватлиқ ханим-қизлар өзлириниң миниатюрилири билән көпчилик көңлидин чиқти. Шуниңдин кейин алмутилиқ «Җанан» ханим-қизлар клубиниң әзалири Турсунай Иминова билән Җаһангир Муратова вә җай-җайлардики ханим-қизлар кеңәшлириниң әзалири новәт билән сөзгә чиқип, мәзкүр мәрасимни уюштурғучиларға миннәтдарлиғини изһар қилишти. Новәттики «Гүлчайни» «Җанан» ханим-қизлар клуби Алмута шәһиридә өткүзидиған болди. Гөһәрбүви  ИСМАЙИЛҖАНОВА. СҮРӘТЛӘРДӘ: «Гүлчай» мәрасимидин көрүнүшләр.