• Йеңилиқлар
• 25 Шілде, 2014

«Тоғра көтирилгән мәсилә чапсан һәл болиду»

Хәлиқ вәкили — хәлиқ арисида/ Қазақстан Җумһурийити Парламенти Мәҗлисиниң депутати Мурат Әхмәдиевниң сайлиғучилар билән учришишлири бу һәптидә Алмута шәһиридики Мәркизий мечитта, Әмгәкчиқазақ наһийәсиниң Йеңишәр вә Тәшкәнсаз йеза округлирида давамлишип, Алмута шәһириниң Түрксиб мәһәллисидә аяқлашти.Җәнубий пайтәхттики Мәркизий мечитта Мурат Әхмәдиев билән униң ярдәмчиси Абдусаттар Турдибақиевни Қазақстан мусулманлири диний башқармисиниң рәиси, Баш муфти Ержан Малғажыулы қобул қилди. Уларниң арисидики сөһбәт асасән мустәқил елимиздики сәясий турақлиқ, достлуқ вә разимәнлик, бу бебаһа байлиқни қолға кәлтүрүштики динниң роли, яш әвлатни қазақстанлиқ вәтәнпәрвәрлик роһида тәрбийиләш мавзулири әтрапида болди. Андин Мурат Абдрим оғли Баш муфтиға айрим яш диний затлиримизниң диний мәсилиләргә аит бәзибир проблемилирини йәткүзди. Ержан Малғажыулы уларни қарап чиқип, йеқин арида ениқ җававини беридиғанлиғини билдүрди. Депутат билән баш муфти учришиши шунчилик иллиқ, достанә шараитта өттики, һәтта айрим мәсилиләр нәқ шу учришиш пәйтидила һәл қилинди. Мусулманларниң улуқ Роза-рамзан айлирида йүз бәргән бу баш қошуш һәр икки шәхсниң қәлбидә чоңқур тәсират қалдурди.

***

Йеңишәр йеза округиниң һакими Асыл Байтулақов, Йеңишәр йезисиниң жигитбеши Қурванҗан Азнибақиев вә «Йеңишәр» җәмийәтлик бирләшмисиниң рәиси Реһимҗан Ибдиминов бизни йезиға киридиған җайда иллиқ күтүвалди. Һәммимиз йезиниң җәнубий қисмиға йеңидин селиниватқан заманивий дәм елиш вә спорт мәркизини көрүп чиққандин кейин, көпчилик жиғилған өйгә қәдәм тәшрип қилдуқ. Бу йәрдә бизни йеза Ханим-қизлар кеңишиниң рәиси Сарихан Имамзарова вә униң орунбасари Мерванәм Худайқулова, Яшлар кеңишиниң рәиси Адилҗан Һошурбақиев рәһбәрлигидики җамаәтчилик вәкиллири хуш чирай күтүвалди. Иптар дәстихини әтрапида улар алди билән мустәқил елимизниң, хәлқимизниң мәнпийити йолида көп ишларни әмәлгә ашурған депутатқа чәксиз миннәтдарлиғини билдүрүп, андин жуттики нәмунилик ишлар һәм моҗут проблемилар һәққидә гәп қозғиди. Умумән, йәрлик һакимийәт билән хәлиқ һәмкарлиқта яхши ишларни бәҗириветипту. Нәтиҗидә көплигән мәсилиләр өз йешимини тепипту. Әнди уларниң күчи йәтмәйватқан бирла мәсилә — спорт комплекси екән. Җамаәтчилик вәкиллириниң тәшвишидә җан бар. Чүнки сирттин келидиған йүздин ошуқ спорт ишқивазини һесаплимиғанда, пәқәт жутниң өзидила 80 оғлан спортниң күрәш вә дзю-до түрлири билән шуғуллинидекән. Уларниң ичидә һәрхил дәриҗидики чемпионатларға қатнишип, вилайәт, һәтта җумһурийәт даирисидә зор утуқларни қолға кәлтүрүватқанлириму бар охшайду. Мабада заман тәләплиригә лайиқ спорт комплекси бәрпа болсила, Йеңишәрдин техи талай чемпионларниң йетилип чиқидиғанлиғи шүбһисиз. Депутат җамаәтчилик вәкиллиригә бу мәсилини һәл қилиш йоллири бойичә ениқ чүшәнчә бәрди. Қалған проблемилар йәрлик һакимийәт билән жуттики қолида бар сахавәтлик инсанларниң һәмкарлиғида, йәни бирлик-өмлүкниң арқисида пүтидиғанлиғиға йеңишәрликләрниң ишәнчиси камил.

***

Тәшкәнсаз йеза округидики депутат билән учришиш мусулманларниң хасийәтлик җүмә күни Ғулҗа йоли бойидики «Назугум» кафесида өтти. Бу йәрдә округ тәркивидики Тәшкәнсаз, Баяндай вә Ғулҗа йезилириниң жут активистлири жиғилипту. Учришишни Тәшкәнсаз йезисиниң жигитбеши Әнвәр Баратов киришмә сөз билән ечип, қәдәм тәшрип қилған меһманлар — Қазақстан Җумһурийити Парламенти Мәҗлисиниң депутати Мурат Әхмәдиевни вә униң ярдәмчиси Абдусаттар Турдибақиевни, җумһурийәтлик Уйғур театриниң мудири Савутҗан Сонуровни вә мошу қурларниң муәллипини жиғилғанларға тонуштурди. Андин Тәшкәнсаз йеза округиниң һакими Мәһәмәтҗан Султанияров округ даирисидә әмәлгә ашурулуватқан ишлар тоғрилиқ әхбарат бәрди. Һакимниң ейтишичә, бу тәвәдә көплигән тилға аларлиқ ишлар бәҗирилипту. Айримлири өз йолида, аста-аста әмәлгә ашурулуветипту. Аһали пәқәт Мәдәнийәт өйигә муһтаҗ охшайду. Униң йоқлуғидин Уйғур театриниң артистлири мәлини айлинип өтүп кетишкә мәҗбур. Һә, сәнъәтсөйәр амма сәнъәткарлиримиз һүнирини амалиниң йоқидин хошна Ават йезисиға берип тамашә қилидекән. Мурат Абдрим оғли бу соалға дәрһал: «Һазирқи йеңи қанун бойичә җумһурийәттики кам дегәндә миң адими бар аһалилиқ пунктта бир Мәдәнийәт өйи селиниши керәк. Демәк, силәрниң проблемаңлар йеқин келәчәктә чоқум йешилиду» дәп җавап бәрди. Баш қошуш җәриянида округ турғунлиридин «Нур-Агро» җавапкәрлиги чәкләнгән ширкитиниң мудири Кәрим Худайбәрдиев, жут мөтивәри Үсүпҗан Талипов, Ханим-қизлар кеңишиниң рәиси Почунай Ғазамова мошундақ әһмийәтлик учришишларниң пат-пат болуп турушини, шу чағдила һәрқандақ ишниң алға басидиғанлиғини ейтип, өз жутиға қәдәм тәшрип қилған депутатқа вә униңға һәмра болған шәхсләргә миннәтдарлиқ билдүрди. Ахирида Мурат Әхмәдиев, Савутҗан Сонуров вә мошу қурларниң муәллипи саһипханларни қизиқтурған бирқатар соалларға җавап бәрди.

***

Алмута шәһириниң Түрксиб мәһәллисидики учришиш жуттики мечитта өткүзүлди. Униңға җамаәтчилик вәкиллири, жут ақсақаллири вә мечит қоминиң әзалири иштрак қилди. Бу баш қошушму өзара диалог шараитида җанлиқ өтти. Жут мөтивәри Әхмәт қарим һаҗим Муһәммәтһаҗиев чәт әлләрдики диний билим дәргаһлирида оқуп кәлгән яшлиримизни иш билән тәминләш мәсилисидики айрим қийинчилиқлар һәққидә гәп қозғиса, жутниң жигитбеши Нурмәһәмәт Яқупов, жут активистлири Мәһәмәтҗан Давутов, Сәйдәкрәм Ибрагимов асасән жут қәбирстанлиғиниң бүгүнки мүшкүл әһвалиға тохталди. Уларниң ейтишичә, һазир бу хасийәтлик җай уттур мәнасида әхләтханиға айлинип қалған. Түрксиблиқлар мураҗиәт қилған әмәлдарлар мәсилини техила бир-биригә дөңгәп келиватқачқа, бу проблема мошу кәмгичә өз йешимини тапалмайветипту. Мурат Абдрим оғли түрксиблиқларниң шикайәтлирини аңлап, уларға у яки бу мәсилини йешиш бойичә ениқ көрсәтмә-мәслиһәтлирини бәрди. Депутат өз сөзидә һәрқандақ мәсилини еғир-бесиқлиқ билән, қанун даирисидә қоюш керәклигини тәкитлиди. Мурат Абдрим оғли шундақла һәрбиримизниң ана тилимизни, өзлүгимизни сақлаш билән биллә дөләт тилини мукәммәл егиләшкә, адил әмгигимиз билән мустәқил Қазақстанниң тәрәққиятиға мунасип төһпә қошушқа чақирди. Учришиш давамида депутатқа һәмра болуп кәлгән җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Абдурешит Мәхсүтовму көпчилик тәрипидин қоюлған бирқатар соалларға җавап бәрди.

Ершат ӘСМӘТОВ.