• Йеңилиқлар
• 23 Қазан, 2014

«Муштирилар күни» өтти

Йеқинда «Қазпочта» акционерлиқ җәмийитиниң уюштуруши билән Хәлиқара почта күнигә даир қәрәллик нәширләргә муштири болғучилар күни өткүзүлди. Униңға почта хадимлири вә аммивий әхбарат васитилириниң рәһбәрлири, җамаәтчилик вәкиллири қатнашти. Мәрасимни «Қазпочта» акционерлиқ җәмийити Алмута шәһәрлик шөбиси мудириниң орунбасари Ә.Мүминов ачти. Шуниңдин кейин Алмалы наһийәси һакиминиң орунбасари А.Бекжанова, «Қазақ газеттері» ҖЧЙ тәркивидики «Мысль» журналиниң баш муһәррири С.Қуттықадам, «Президент және халық» гезитиниң баш муһәррири М.Тоқашбаев, «Казахстанская правда» гезитиниң Алмута бөлүмчисиниң рәһбири О.Малахова, «Алматы ақшамы» гезити баш муһәрририниң биринчи орунбасари Ә.Әуелбек, «Дружные ребята» гезитиниң баш муһәррири А.Әкбәров вә башқилар сөзгә чиқип, җәмийитимиздики аммивий әхбарат васитилириниң әһмийитигә тохталди. Мәрасим җәриянида «Қазпочта» акционерлиқ җәмийити «Почта сервиси» шөбисиниң мудири Нуржан Жабаевниң рәһбәрлигидә «дүгләк үстәл» өткүзүлүп, униңда бүгүнки күнниң актуал мәсилилиригә беғишланған мавзулар әтрапида сөз болди. Өз новитидә Нуржан Нуршайхыулы 2015-жилниң иккинчи йеримидин башлап Интернет арқилиқ муштири топлашни әмәлгә ашурушни ойлаштуруватқанлиғини ейтти. «Ана тілі» гезитиниң баш муһәррири С.Ибраим, «Айгөлек» журналиниң баш муһәррири Қ.Әбилдақызы сөз болуватқан мәсилиләр бойичә өз пикир-тәклиплири билән ортақлашти. У күни қәрәллик нәширләргә йезилишқа 15 пайиз имтияз берилип, ахирида муштирилар арисида лотерея оюни уюштурулди. Мәшүр САСИҚОВ.