• Йеңилиқлар
• 23 Қазан, 2014

Үрүмчилик меһманлар — Алмутида

Қериндашлиқ риштилири/ Өткән җүмәдә Алмутида «AlmatyІnvest 2014» бизнес-форуми болуп өтти. Униңға Қазақстан Җумһурийити Премьер-министриниң орунбасари Бақытжан Сағинтаев, Алмута шәһириниң һакими А.Есимов, кичик вә оттура тиҗарәтниң жирик вәкиллири һәм чәтәллик меһманлар қатнашти. Мәзкүр чарә-тәдбирдә алмутилиқлар өзлириниң инвестициялик имканийәтлирини көрситиш билән биллә дунияниң көплигән мегаполислиридин кәлгән ишбиләрмәнләр билән тәҗрибә алмаштуруш имканийитигә егә болди. Форумдин кейин, униңға алаһидә тәклип билән кәлгән Шинҗаң-Уйғур Автоном Райониниң делегацияси пурсәттин пайдилинип, Алмута шәһиридики А.Розибақиев намидики 153-мәктәп-гимназия билән Қ.Ғоҗамияров намидики җумһурийәтлик дөләт Уйғур музыкилиқ комедия театрини зиярәт қилди. Гимназия мудири Шавкәт Өмәров билән театр мудири Савутҗан Сонуров Үрүмчи шәһириниң һакими Илһам Сабир, шәһәрлик инвестицияләрни җәлип қилиш башқармисиниң башлиғи Сәйпидин Әзиз, шәһәрлик ташқи ишлар идарисиниң башлиғи Әсәт Һошур вә башқа меһманларға өзлири рәһбәрлик қиливатқан дөләт мәһкимилириниң өтмүши вә бүгүнки нәпәси һәққидә әтраплиқ ейтип бәрди. Зиярәт давамида үрүмчилик меһманларға җумһурийәтлик Уйғур этномәдәнийәт мәркизиниң рәиси Шаһимәрдан Нурумов, Алмута шәһәрлик мәслиһәтниң депутати Әхмәтҗан Шардинов, «Нур Отан» партияси Алмута шәһәрлик шөбиси сәясий кеңишиниң әзаси Асимҗан Злавдинов вә җумһурийәтлик «Уйғур авази» гезитиниң баш муһәррири Ершат Әсмәтов һәмра болди. Мәшүр САСИҚОВ.