• Йеңилиқлар
  • 20 Қараша, 2014

Һаким бол, хәлиққә йеқин бол

Өткән һәптидә Алмута вилайитиниң һакими Амандық Баталов (сүрәттә оңдин биринчи) Панфилов наһийәсидә болуп, Қазақстанниң иҗтимаий-ихтисадий тәрәққияти бойичә дөләт программилирини орунлаш мәхситидә тәвәдә бүгүнки таңда әмәлгә ашурулуватқан чарә-тәдбирләр билән тәпсилий тонушти.Һакимниң сәпири «Қазақстан темир жолы» акционерлиқ җәмийитиниң президенти Асқар Мамин билән наһийә һакими Бердәулет Абдулдаевниң һәмралиғида «Ғәрбий Европа — Ғәрбий Хитай» хәлиқара йоли даирисидики төмүр йолиниң «Алтынкөл» станциясидин башланди. Өткән жили пайдилинишқа берилгән мәзкүр станция билән төмүр йол ишчи-хизмәтчилири үчүн селинған «Нуркәнт» шәһәрчиси арилиғидики 600 гектарға йеқин йәр мошу күнләрдә кәң миқияслиқ қурулуш мәйданиға айланған. Бу йәрдә «Қорғас — Шәриқ дәрвазиси» әркин ихтисадий зониси тәркивидики «Қуруқ» порти, Логистикилиқ вә Индустриаллиқ мәркәзләр қәд көтәрмәктә. Шундақла 301 гектар мәйданда турушлуқ өйләр комплексини селиш көздә тутулуватиду. Шуни тәкитләш керәкки, «Сүръәтлик индустриаллиқ-инновациялик тәрәққият» дөләт программиси даирисидә жүргүзүлүватқан бу ишлар җумһурийәт Президенти Н.Ә. Назарбаевниң қоллап-қувәтлиши вә беваситә назарити астида қолға елинған еди. Қурулуш ишлириға 227 миллиард тәңгә сәрип қилиш көздә тутулған болса, униң 150 миллиарди инвесторларниң үлүшигә тоғра келиду. Қурулушини икки-үч жилда тамамлап, пайдилинишқа бериш мәхсәт қилиниватқан бу объектларда келәчәктә миңлиған адәмләр турақлиқ иш билән тәминлинидиған болиду. Амандық Баталов ишниң кетип бериш җәриянини көздин кәчүрүп, инфрақурулум лайиһилири биләнму тәпсилий тонушуп чиқти. Вилайәт һакиминиң сәпири шуниңдин кейин Пәнҗим йезисида давамлашти. Бу йәрдики 1-хаманда болуп, көмүқонақ өстүргүчи дехан егиликлириниң рәһбәрлири билән сөһбәтләшти. Һаятини мошу саһада өткүзүп келиватқан, илгәрки Калинин намидики колхозда узун жиллар баш агроном болуп ишлигән Әғзәм Мәрүпов жутдашлири намидин сөзләп, уларниң муң-муһтаҗи билән тәләп-тиләклирини изһар қилди. Җүмлидин йетиштүрүлгән һосулни мувапиқ баһада өткүзүп, суғириш тармақлирини рәткә кәлтүрүш, көмүқонақ қурутуш заводлирини селиш билән хаманларни җөндәш вә башқиму мәсилиләрни оттуриға қойди. Қириққудуқ — илгири йәл-йемиш өстүридиған чоң совхозниң мәркизи еди. Һазир ушшақ шәхсий егиликләргә бөлүнүп кәттидә, һәрқайсиси чаминиң йетишичә өз тирикчилигини көрүватиду. Әмруллам Абдуллаевниң егилиги әйнә шулар җүмлисидин. Ихтиярида 30 гектар йәр болуп, асасән һәрхил сортлуқ алма өстүрүш билән шуғуллиниду. Өткән жили 120 тонна экологиялик җәһәттин таза һосул йетиштүрүлүп, Астана вә башқа шәһәрләргә күз һәм қиш айлирида йәткүзүлди. Бийил һава райиниң қолайсиз болушиға мунасивәтлик 60 тонна алма йетиштүрүш билән чәклинип қалди. Бу йәрдә сиғимчанлиғи 120 тоннилиқ қойма селинип, пайдилинишқа берилгән. Амандық Баталов мәзкүр егиликтә болуп, елип бериливатқан ишлар билән йеқиндин тонушти һәм җумһурийәттә шәхсий тиҗарәтни тәрәққий әткүзүш бойичә көрситиливатқан ғәмхорлуқларни тәкитләп, коллективқа муваппәқийәтләр тилиди. Вилайәт рәһбири Яркәнт шәһириниң ғәрбий-шималий қисмида қәд көтириватқан турушлуқ өйләр билән инженерлиқ-коммуналлиқ қурулумларниң қурулуш ишлирини көздин кәчүрди. Әтраплиқ тонушуп чиққандин кейин орун еливатқан камчилиқларни атап көрситип, ишниң сүпитигә җиддий көңүл бөлүш лазимлиғини тәкитлиди. Шуниңдин кейин 6-мәктәп-интернатта болуп, тәлим-тәрбийә ишлиридин хәвәр алди. Устазлар билән сөһбәтлишип, уларниң пикир-тәклиплири билән тонушти. Ахирида «Яркәнт крахмал-ширнә заводида» болди, «Сүръәтлик индустриал-инновациялик тәрәққият» дөләт программисиға мувапиқ селинип, пайдилинишқа берилгән заводниң иш-җәриянлири тоғрисида униң тәсисчиси Закирҗан Кузиев билән баш мудири Вилиян Халиқов һәртәрәплимә чүшәнчә бәрди. Амандық Баталовниң иш сәпири әшу күни наһийәлик һакимийәттә өткән наһийә активиниң жиғини билән йәкүнләнди. Жиғинни вилайәт һакими өзи ечип, риясәтчилик қилди. Наһийә һакими Бердәулет Абдулдаев сөзгә чиқип, бийилқи жилниң өткән мәзгилидә иҗтимаий-ихтисадий тәрәққият бойичә қилинған ишлар билән истиқбалдики мәхсәт-реҗиләргә кәң түрдә тохталди. Шундақла наһийәлик мәслиһәтниң депутати, «Үркер» ҖЧЙниң мудири Жақипбай Ақшалов, наһийәниң Пәхрий граждини Шерип Рәхмидинов, әмгәк ветеранлири Болатбай Кебенбаев, Омарбек Жылқыбаев Қорғас йезисиниң турғуни Шөһрәт Разиев, Җамбул намидики оттура мәктәпниң мудири Ризайдин Әйсаев, Ә.Қастеев намидики бәдиий рәсимләр галереясиниң хадими Шолпан Заманбекова музакирә сөзгә чиқти. Жиғинни вилайәт һакими йәкүнләп, ениқ вәзипиләр билән тапшурмиларни оттуриға қойди. Нурәхмәт ӘХМӘТОВ. Панфилов наһийәси.

207 рет

көрсетілді

0

пікір
Алдыңғы мақала Йеңи һакимни тонуштурди
Келесі мақала ТЕЛЕГРАММА

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *