• Йеңилиқлар
• 13 Ақпан, 2015

Қазақстан хәлқи Ассамблеясиниң жили тәнтәнилик башланди

«Биз бир хәлиқ — бир әл — бир тәғдир!»/ Өткән җүмә күни Қазақстан хәлқи Ассамблеясиниң жили рәсмий башланди. Мәмликәтниң барлиқ регионлирида мошу вақиәгә вә тәшәббус даирисидә планланған лайиһиләрни ишқа қошушқа беғишланған тәнтәнилик чарә-тәдбирләр өткүзүлди.ҚХА жилиниң ечилишиға беғишланған баш тәнтәнилик мәрасим елимиз пайтәхти Астанадики Течлиқ вә Разимәнлик Сарийида болуп өтти. Қазақстан хәлқи жилиниң өткүзүлүшини чоңқур маһийитини вә мошу надир институт паалийитиниң асасини тәшкил қилидиған идеяләрни һесапқа алсақ, бу җай мәнтиқий йосунда таллавелинди. Мәйрәмлик чарә-тәдбирләр Пирамида йенида башланди. ҚХА жилиниң байриғини көтириш мәрасими вә «Жастар қоғамдық келісімді қолдайды» яшлар флэшмоби чоң чарә-тәдбирниң дәсләпки басқучи болди. Андин кейин Сарай холлирида хәлиқ әмәлий сәнъити маһирлириниң көргәзмә-йәрмәңкиси уюштурулди. Униңға мәмликитимиздики барлиқ дегидәк этномәдәний бирләшмиләрниң вәкиллири қатнашти. Тәнтәнилик мәрасимларниң асасий қисми Течлиқ вә Разимәнлик Сарийиниң Опера залида өтти. Уни Қазақстан Җумһурийитиниң дөләт кативи Гүлшара Әбдиқалиқова ечип, у Қазақстан Җумһурийитиниң Президенти — Қазақстан хәлқи Ассамблеясиниң Рәиси Нурсултан Назарбаевниң тәбрик сөзини оқуп бәрди. Дөләт рәһбири барлиқ қазақстанлиқларға йоллиған тәбригидә пүткүл 2015-жилниң, Қазақстан хәлқи Ассамблеяси жилиниң асасий қәдрийәтлиримизгә — мустәқилликкә, әркинликкә, бирликкә, течлиқ вә разимәнликкә беғишлинидиғанлиғини тәкитлиди. Президент буниңдин жигирмә жил илгири — 1995-жили 1-мартта җәмийитимиздә течлиқ вә разимәнликни сақлашқа қаритилған надир институт ҚХАни қуруш тоғрилиқ Пәрманни имзалиди вә мошу вақит ичидә ҚХА һәқиқәтәнму умумхәлиқ, умумгражданлиқ, сәясәттин үстүн органға айланди, конституциялик мәртивигә егә болди. «Барлиқ қазақстанлиқларни Ассамблея жилиниң башлиниши билән тәбрикләймән. Мустәқиллик, бирлик вә разимәнлик роһи бизгә күч-қувәт һәм өзимизгә болған ишәнчә әта қилсун! Биз бир хәлиқ — бир әл — бир тәғдир! Бизниң қазақстанлиқ йолумиз — течлиқ, разимәнлик вә тәрәққият йоли», дәп тәкитлиниду Нурсултан Назарбаевниң тәбрик сөзидә. ҚХА жилини ечиш мәрасими пәқәт жуқури дәриҗилик меһманлар, қәлбни тәврәткидәк сөзләр вә әҗайип концерт программиси түпәйлила ярқин һәм тәнтәнилик вақиә болмиди. Әң муһими — Течлиқ вә Разимәнлик Сарийиниң сәһнисидин бийил әмәлгә ашурулидиған чоң муһим чарә-тәдбирләр елан қилинди. Мәсилән, Ассамблея жилиниң өткүзүлүши әҗайип җумһурийәтлик акция — «ҚХА — 20 изгү иш» эстафетиси билән нишанланди. Ғ.Ә. Йәссавий мәқбәрисидә ақсақалларниң дуасини елип, Түркстандин кәлгән Тайқазан мошу акцияниң рәмзигә айланди. Бу өзигә хас «эстафета таяқчиси» яхши-изгү ишлар тизимини толуқтуруп, регионму регионға тапшурулиду вә Қазақстан хәлқи Ассамблеясиниң ХХІІ сессиясиниң ечилишиға қәдәр пайтәхткә қайтип келиду. Вилайәтләр тәйярлиған жигирмә изгү иш Қазақстан хәлқиниң бирлигигә қошулған һәссә болиду, — дәп тәкитлиди ҚХА Рәисиниң орунбасари — Президент Мәмурийити ҚХА кативатиниң мудири Ералы Тоғжанов. У шундақла ҚХА жилиниң милләтләрара төзүмлүк вә җәмийәтлик разимәнликниң қазақстанлиқ үлгисиниң тәнтәниси болидиғанлиғини әслитип өтти. Яхши ишлар эстафетисини биринчи болуп мәмликәт пайтәхти қобул қилди. Астана һакими Әдилбек Жақсыбеков Астананиң Тайқазанни жигирмә муһим чарә-тәдбир билән толтурғанлиғини тәкитлиди, шундақла пүткүл жилниң пайтәхт үчүн Дөләт рәһбиригә, униң мәмликәтни тәрәққий әткүзүшкә қаритилған чоң иши, көпмилләтлик Қазақстанда течлиқ вә разимәнликни күчәйтиватқан Ассамблеяни қурғанлиғи үчүн миннәтдарлиқ билдүрүш шиари астида өтидиғанлиғини вәдә қилди. Униңдин ташқири мәрасим давамида әң түрлүк йөнилишләр бойичә бирқатар җумһурийәтлик конкурсларниң башланғанлиғи елан қилинди. Мәсилән, ҚХА рәисиниң орунбасари, Л.Гумилев намидики Евразия миллий университети ҚХА кафедрисиниң башлиғи Анатолий Башмаков Нурсултан Назарбаевниң милләтләрара төзүмлүк вә җәмийәтлик разимәнликниң қазақстанлиқ үлгисигә беғишланған әң яхши илмий лайиһигә җумһурийәтлик конкурсниң башланғанлиғини ейтип өтти. Мәзкүр конкурсниң мәхсити — Дөләт рәһбири алаһидә муһим әһмийәт бөлүватқан муһим проблемиға, йәни течлиқ вә җәмийәтлик разимәнлик мәсилилиригә йәнә бир қетим диққәтни җәлип қилиштин ибарәт, — дәп тәкитлиди Анатолий Башмаков. — Барлиқ алимларни, болупму яш алимларни, магистрантларни, докторантларни шуниңға қатнишишқа тәклип қилимән. Униңдин кейин Улуқ Вәтән урушидики Ғалибийәтниң 70 жиллиғиға беғишланған «Тарихтан тағылым — өткенге тағзым» җумһурийәтлик лайиһә тоғрилиқ елан қилинди. Униңда ветеранлар алаһидә диққәт мәркизидә болуп, уларға һәртәрәплимә ярдәм қилиниду. Униңдин ташқири шу мудһиш жиллар тоғрилиқ тарихий хатирини сақлап қелиш, җәң мәйданидин қайтмиған җәңчиләр тоғрилиқ әхбаратни издәш бойичә чоң иш жүргүзүлиду. Җүмлидин «Қураллиқ күчләр ветеранлири» җумһурийәтлик җәмийәтлик бирләшмиси мәркизий кеңиши рәисиниң орунбасари генерал-майор Марат Нағумановниң тәкитлишичә, 2015-жили Россия, Украина вә Беларусь кадетлири билән бирликтә Қазақстан дивизиялири билән бригадилири җәң қилған җайларда издәш ишлири жүргүзүлиду. Өсүватқан әвлатниң дөләт тилини актив үгиниши үчүн шараит яритишқа қаритилған «Мың бала» җумһурийәтлик мәдәний-ақартиш лайиһисиму хелә муһим әһмийәткә егә. Шундақла әмгәк сулалилири арисида «Армандаған мамандық» конкурси башлиниду. Пүткүл ҚХА жили вә мошу ениқ лайиһә суверен Қазақстанни техиму күчәйтиду, хәлқимизни техиму җипсилаштуриду вә биз нурғунлиған йеңи исимлар билән пәхирлинидиған болимиз, — деди конкурсниң башланғанлиғи тоғрилиқ елан қилған Қазақстанниң Еңбек Ері Иван Сауэр. ҚХА жилиниң ғоҗуниға тәйярланған йәнә бир чарә-тәдбир — бизнес-қурулумлар, банк сектори вә җумһурийәтлик тәшкилатлар арисидики «Жүректен — жүрекке» әң яхши хәйрихаһлиқ лайиһисигә елан қилинған конкурс болди. «Мейірімділіктен бірлікке» конкурси иҗтимаий лайиһиләргә қатнишиш вә мошу йөнилиштики ишқа йеңи күч-қувәт бериш үчүн этномәдәний бирләшмиләрниң имканийәтлирини ениқлашқа қаритилди. У бизниң төзүмлүклигимизни вә шәпқәтликлигимизни дунияға, мәмликитимизгә, бир-биримизгә йәнә бир қетим көрситиду, бизниң бирпүтүн хәлиқ екәнлигимизни испатлайду, — дәп тәкитлиди җумһурийәтлик дөләт Корей музыкилиқ комедия театриниң мудири Любовь Ни. У шундақла этномәдәний бирләшмиләр ишиниң пүткүл мәмликәт бойичә алаһидә әһмийәткә егә екәнлигини, чүнки уларниң Ассамблея асаси болуп һесаплинидиғанлиғини қошумчә қилди. Олимпиада чемпиони Жақсылық Үшкемпиров Тунҗа Президент — Милләт Лидериниң тестиға беғишланған «Ұлт Рухы» лайиһисиниң башланғанлиғини елан қилди. Журналистика саһасидики «Шаңырақ» иҗадий конкурси аммивий әхбарат васитилириниң течлиқ вә миллий бирлик мәдәнийитини шәкилләндүрүшкә, милләтләрара төзүмлүк, җәмийәтлик разимәнлик идеялирини тәрғип қилишқа қошуватқан һәссисини баһалашқа қаритилди. Әң ахирида «Жаңа ойлар табысқа жетелейді» инновациялик лайиһигә конкурс башланғанлиғи елан қилинди. У коллективларға, айрим муәллипләргә өз иши тоғрилиқ һекайә қилиш вә һәмминиң һөрмитигә сазавәр болуш имканийитини бериду. Шундақ қилип, Ассамблея әмәлгә ашуридиған мошу тоққуз лайиһә пүткүл 2015-жил мабайнида давамлишиду, уларниң йәкүнлирини болса, декабрь ейида Қазақстан хәлқиниң форумида чиқириш көздә тутулуватиду. Алмута. Достлуқ өйи алдидики мәйрәмлик рәң берилгән мәйданға дөләт органлириниң вә Қазақстан хәлқи Ассамблеясиниң вәкиллири, җумһурийәтлик һәм шәһәрлик этномәдәний бирләшминиң рәһбәрлири, студент-яшлар жиғилди. Атақлиқ спортчи-олимпиадичилар — чаңғучи Владимир Смирнов, штангичи Майя Манеза вә бокс бойичә дуния чемпиони Назим Қызайбай — жиғилғанларниң алқишлири астида ҚХА жилиниң байриғини көтәрди. Мәрасимда сөзгә чиққан Алмута шәһириниң һакими Ахметжан Есимов Қазақстан Президенти — ҚХА Рәиси Нурсултан Назарбаевниң җумһурийәт аһалисиға йоллиған тәбрик хетини оқуп бәрди. — Һөрмәтлик шәһәр турғунлири билән меһманлири. Һәммиңларни хәлқимизниң бирлиги вә инақлиғини көрситидиған чоң мәйрәмниң башлиниши билән тәбрикләймән. Шәһиримиздә паалийәт елип бериватқан 34 этномәдәний бирләшмә вәкиллириниң Дөләт рәһбири Нурсултан Назарбаев тәрғип қиливатқан течлиқ вә милләтләрара достлуқ, дөлитимиздики турақлиқ вә паравәнликкә чоң һәссә қошуватқанлиғини тәкитлигүм келиду. Биз, барлиқ қазақстанлиқлар, «Бир әл — бир хәлиқ» шиари астида бир яқидин баш, бир йәңдин қол чиқирип, иҗил-инақ һаят кәчүридиғанлиғимизға ишинимиз, — деди җәнубий пайтәхт һакими. Андин кейин Қазақстанда иҗил-инақ яшаватқан һәрхил милләт вәкиллириниң сәнъәт һәвәскарлири һүнирини көрситип, утуқ-муваппәқийәтлирини намайиш қилди. Талдиқорған. Йәттису турғунлири Қазақстан хәлқи Ассамблеяси жилиниң тәнтәнилик башлинишини Талдиқорғандики «Жастар» спорт сарийида өткән синхрон акция билән башлиди. ...Әтигәндин тартип сарай алдиға нурғунлиған адәмләр — ақсақаллар, этномәдәний мәркәзләрниң вәкиллири, җәмийәт әрбаплири, яшлар, вилайәт мәркизиниң меһманлири — барлиғи болуп икки миңдин ошуқ адәм жиғилди. ҚХА жили байриғини көтириш мәрасимидин кейин Алмута вилайитиниң һакими Амандық Баталов Президент — ҚХА Рәиси Нурсултан Назарбаевниң тәбригини оқуп бәрди. Андин кейин мәрасим тарихий мавзуға беғишланған театрлаштурулған көрүнүш, яшлар флэшмоби, боғусақ мәйрими билән давамлашти. Концерт номерлириниң арилиқлирида Улуқ Вәтән урушиниң қатнашқучилирини мукапатлаш мәрасими болуп өтти. Регион рәһбири ветеранлар Петр Ещенко, Шамсудин Исмаилов вә Алтынай Есболатоваға «Беларусьниң немис-фашист басқунчилиридин азат қилинғанлиғиға 70 жил» юбилейлиқ медалини тапшурди. Бу күни «Течлиқ вә разимәнликниң йол хәритиси» мегалайиһиси даирисидә «20 изгү иш» эстафетиси башланди, шундақла бирқатар иҗадий конкурсларниң башланғанлиғи тоғрилиқ елан қилинди. Мәрасим җәриянида этномәдәний мәркәзләрниң вәкиллири Қазақстан хәлқи Ассамблеясиниң достлуқ, төзүмлүк вә милләтләр ара разимәнликни күчәйтиш ишиға чоң һәссә қошуватқанлиғини тилға алди. ИШИКТӘ. Йәтмиш миңға йеқин аһалиси бар Әмгәкчиқазақ наһийәсидә 30дин ошуқ милләт вәкиллири яшайду, 9 этномәдәнийәт мәркизи моҗут. Йеқинда улар Қазақстан хәлқи Ассамблеяси жилиниң ечилишини  тәнтәнилик атап өтти. Бу тәнтәниниң Қазақстандики милләтләрара төзүмлүк вә җәмийәтлик разимәнликни  техиму риваҗландуруш, җәмийәттә Дөләт рәһбириниң течлиқ вә  турақлиқ сәяситини тәрғип қилиш, «Қазақстан-2050» Стратегиясидә, «Қазақстан хәлқи Ассамблеясиниң      2020-жилғичә болған тәрәққият концепциясидә» көрситилгән мәхсәтләргә қол йәткүзүш, «Бир әл – бир тәғдир» дөләт сәяситини әмәлгә ашуруш мәхситидә өтүватқанлиғиға алаһидә тохталған наһийә һакиминиң биринчи орунбасари Нуржан Қудайбергенов әмгәкчиқазақлиқларни сәмимий тәбриклиди. Андин наһийәлик курд этномәдәнийәт мәркизиниң рәиси Надо Надыров Ассамблеяниң тарихи, униң утуқлири, Президентимиз Нурсултан Назарбаевниң дана сәясити түпәйли шәкилләнгән милләтләрара төзүмлүк вә җәмийәтлик разимәнлик үлгиси, униң Қазақстанда яшаватқан 130дин ошуқ милләт вәкилиниң тилини, тарихини вә мәдәнийитини тәрәққий әткүзүштики роли һәққидә атап өтүп, ғәмхорлуғи үчүн Дөләт рәһбиригә барлиқ милләтләр намидин миннәтдарлиғини изһар қилди. Тәнтәниниң рәсмий бөлүми наһийә сәнъәткарлириниң қазақ, уйғур, курд, түрк вә башқиму хәлиқләрниң нахша-уссуллиридин тәркип тапқан концертқа улашти. ЯРКӘНТ. Яркәнт шәһиридә өткән мәрасимда наһийә һакиминиң биринчи орунбасари Шөһрәт Қурбанов сөзгә чиқип, бийилқи жилниң муһим сәнәләр билән нишанлинидиғанлиғини атап өтти. Җүмлидин Қазақстан хәлқи Ассамблеяси қурулғанлиғиниң 20 жиллиғи шәрипигә бийилқи жилниң Җумһурийәт Президенти Н.Ә. Назарбевниң Пәрмани билән «Қазақстан хәлқи Ассамблеясиниң жили» дәп елан қилинғанлиғи вә у надир институтниң елимиздә милләтләрара достлуқни йәниму мустәһкәмләп, җәмийәтлик разимәнлик билән турақлиқни сақлашта муһим әһмийәткә егә болуп келиватқанлиғини алаһидә тәкитлиди. Акция җәриянида ҚХА әзаси, ҚХАниң «Бейбетшілік үшін» алтун медалиниң саһиби Реһимҗан Тохтахунов, Н.Крупская намидики оттура мәктәпниң муәллими, Славян этномәдәнийәт мәркизиниң рәиси Полина Емец, наһийәлик мәслиһәтниң депутати, врач Закир Хахазов, Яркәнт гуманитарлиқ-техникилиқ колледжиниң студенти Гүлдана Самалбекова сөз сөзлиди. «Жаркент әуендери», «Шатлиқ», «Айжан қиз», «Пәрваз» ансамбльлири билән шәһәр мәктәплириниң сәнъәт һәвәскарлири вәтәнпәрвәрлик, хәлиқләр достлуғи мавзулирида нахша-уссуларни намайиш қилди. Шундақла Қазақ ханлиғиниң 550 жиллиғи, Улуқ Ғалибийәтниң 70 жиллиғиға мунасивәтлик театрлаштурулған көрүнүшләр көрситилди. ЧОНҖА.  «Қазақстан хәлқи Ассамблеяси жилиниң башлиниши»  дәп аталған синхронлуқ акция, җай-җайлардикидәк, Уйғур наһийәсидиму тәнтәнилик рәвиштә нишанланди. Униңға наһийә рәһбәрлиги, вә җамаәтчилик вәкиллири иштрак қилди. Мәрасимниң киришмә қисмида елимиз Президенти Н.Назарбаевниң тәшәббуси билән 1995-жили 1-март күни қурулған вә беваситә униң  рәһбәрлигидә 130дин көп милләт билән еләтниң мәхсәт-муддиасини етиварға алған һалда тәрәққиятниң бүйүк чоққилириға башлиған Қазақстан хәлқи Ассамблеясиниң паалийити һәққидә һөҗҗәтлик фильм көрситилди. Андин наһийә һакими Алимҗан Тохтасунов сөзгә чиқип, мәзкүр тәдбирниң тарихий әһмийитигә тохталди. Дана рәһбәр вә парасәтлик сәясәтчи Н.Назарбаевниң әлдики тиничлиқни техиму мустәһкәмләш йолидики әстаидил әҗрини тәкитләп,  Қазақстан хәлқи Ассамблеясиниң кәлгүсидиму өз мәвқәсигә садиқ болуп қалидиғанлиғини  қәйт қилди. Мәрасим давами Чонҗа йезисидики  мәктәпләрниң  оқуғучилири, Чонҗа политехникилиқ колледжиниң студентлири, Чонҗа йезисидики «Балбөбек» вә Баһар йезисидики «Нұрлы болашақ» балилар бағчилириниң тәрбийиләнгүчилири вә башқа сәнъәт һәвәскарлири тәрипидин тәйярланған мәрикилик концертқа улашти.