• Йеңилиқлар
• 26 Ақпан, 2015

Бовимиз һәққидә баллада

Инсанларниң мөмүни сиз едиңиз, Пәйғәмбәрдәк нурлуқ еди һөсниңиз. Бу дуниядин бәк алдираш кәттиңиз, Чаримиз йоқ, рази болуң, әлвида! Чоң-кичикниң мәсләкдиши едиңиз, Дора еди ейтқан һәрбир сөзиңиз. Хош демәйла кәткиниңиз немиңиз? Чаримиз йоқ, рази болуң, әлвида! Нә болмақчи, әнди һаят йолимиз? Сиз едиғу мәдәт қанат-қолимиз. Ечилмайла, ғунчә туруп солдуқ биз, Чаримиз йоқ, рази болуң, әлвида! Сиз барида өскәндуқ биз әркиләп, Чаң қондурмай баққандиңиз пәпиләп. Йол тапалмай қалдуқ бүгүн тәмтирәп, Чаримиз йоқ, рази болуң, әлвида! Сиз барида хатирҗәмдуқ биз әсли, Баһар еди жилниң һәммә төрт пәсли. Болғандиңиз дәртмән хәлқиңиз пәхри, Чаримиз йоқ, рази болуң, әлвида! Житимсирап қалди илим алими, Яман екән җудалиқниң әлими. Тохтап қалди улуқ алим қәлими, Чаримиз йоқ, рази болуң, әлвида! Житимсирап қалди маарип саһаси, Сиз бар үчүн үстүн еди баһаси, Маарип болса, яңрар милләт наваси, Чаримиз йоқ, рази болуң, әлвида! Житимсирап қалди бүгүн жутиңиз, Алла бәргән көпниң көрки едиңиз. Жут ичидә әнди толмас орниңиз, Чаримиз йоқ, рази болуң, әлвида! Житимсирап қалди пәрзәнт, қериндаш, Болғандиңиз мәслиһәтчи һәм сирдаш. Пәришанмиз — жүрәк зедә, көздә яш, Чаримиз йоқ, рази болуң, әлвида! Йүзләп шагирт үнсиз өксүп жиғлайду, Сиздәк җанни өлүмгә һеч қиймайду. Йерим көңүл әнди йенип толмайду, Чаримиз йоқ, рази болуң, әлвида! Өлүм һәқтур, инсан ундин танмайду, Тәғдиргә тән бәрмисәң һеч болмайду. Нечүн әҗәл яхшиларни таллайду? Чаримиз йоқ, рази болуң, әлвида! Сиңдүргәнсиз Вәтән дегән уқумни, Мәдһийилигәч уйғур дегән ихлимни. Тапқандуққу сиз билән  бәхтимизни, Чаримиз йоқ, рази болуң, әлвида! Сиздәк болар, алимларниң алими, Сиздәк болар, адәмләрниң адими. Сизгә йетиш талийиниң армини, Чаримиз йоқ, рази болуң, әлвида! Бу дуниядин бәк алдираш кәттиңиз, Көп едиғу техи мәхсәт-ойиңиз. Илим-пәндә, маарипта, һаятта, Тирик туруп, һәйкәл қоюп кәттиңиз. Әнди беғәм ятивериң, җан бова, Йолиңизни давам қилар бизләр бар. Керәк әнди сизгә пәқәт бир дуа, Чаримиз йоқ, рази болуң, әлвида! Назугум вә Мәликә НӘЗӘРОВАЛАР.