• Йеңилиқлар
• 27 Наурыз, 2015

Президент қазақстанлиқларни Норуз билән тәбриклиди

21-мартта Нурсултан Назарбаев Астанада «Сарыарқа» җумһурийәтлик велотректа болуп өткән «Наурыз — нұрлы жол» мәйрәмлик чарә-тәдбирни зиярәт қилди.Дөләт рәһбири мәйрәмгә кәлгән пайтәхт турғунлири билән меһманларниң алдида сөзгә чиқип, барлиқ қазақстанлиқларни Норуз мәйрими билән тәбриклиди. Норуз қуяшниң дәсләпки иллиқ нурлири билән биллә қәдәм тәшрип қилиду. Көплигән мәмликәтләр Норузни йеңи жил сүпитидә нишанлайду. Бу күни адәмләр бир-бири билән учришиду, гуналирини кәчүриду, изгү ишларни әмәлгә ашуруп, бир-биригә ярдәм қилиду һәм бәхит-саадәт тиләйду, – деди Нурсултан Назарбаев вә мустәқиллик жиллирида Қазақстанниң һәрбир пухра пәхирлинидиған күчлүк дөләткә айланғанлиғини тәкитлиди. Биз бирлишип, мәмликитимизни пүткүл дунияға тонуттуқ. Бизниң хәлқимиз қийинчилиқларға қаримай, һәрқачан җипсилиқни намайиш қилип, алға қарап ишәшлик илгирилиди. Һазирму дунияда боһран көрүнүшлири байқиливатқан чағда Қазақстан уларни йеңиш үчүн йетәрлик ресурсларға егә. Мәмликитимиз «Қазақстан-2050» Стратегияси, «Нұрлы жол» программисини охшаш тәрәққият планлирини ишләп чиқти вә әмәлгә ашуруватиду, йеңи иҗтимаий вә инфрақурулум объектлирини селиватиду. Мошуниң һәммиси үчүн хәлиқниң бирлиги, бир-биригә болған һөрмәт һәм ишәнчиси, мәмликәттики турақлиқ керәк. Әгәр биз таллавалған йолимизға еғишмай әмәл қилсақ, Қазақстанниң келәчиги буниңдинму яхши болиду. Президент һәммигә бәхит-саадәт, течлиқ вә паравәнлик тилиди. Мәйрәмлик концерт тамамланғандин кейин Дөләт рәһбири этноавулни зиярәт қилип, пайтәхт турғунлири билән сөһбәтләшти. Пайтәхттә Норуз мәйримигә беғишлинип концертлар, спорт мусабиқилири вә касиплар көргәзмилири уюштурулди. Пайтәхт һакимийити һойлисидики мәйданда, «Қазақ Елі» монументи алдида, «Студентлар» вә «Ашиқлар» истираһәт бағлирида аммивий оюн-тамашилар өткүзүлсә, «Астана Опера» театрида «Армысың, әз Наурыз!» намлиқ концерт қоюлди.

***

Норузға беғишланған мәйрәмлик чарә-тәдбирләр җәнубий пайтәхт — Алмутида, Мәркизий мәдәнийәт вә дәм елиш истираһәт беғида өткүзүлди. Бу йәрдә концертлар, миллий спорт мусабиқилири, балилар үчүн оюнлар уюштурулди. Шәһәр турғунлири билән униң меһманлирини Ахметжан Есимов мәйрәм билән тәбриклиди. Норуз — бу әҗайип баһар тәнтәниси, тәбиәт ойғинишиниң, адәмниң униңға тазим қилишиниң, йеңи жил вә йеңи һаят башлинишиниң рәмзи. Бизниң елимиздә у Қазақстанда яшаватқан барлиқ милләтләрниң мәйримигә айланди. Көпмилләтлик, көпконфессиялик җәмийитимизниң роһий-мәдәний бейишиға чоң һәссә қошиду, — деди шәһәр һакими. Мәйрәм шәрипигә истираһәт беғи интерактив вә тематикилиқ дәм елиш зонилириға бөлүнди. Әлвәттә, Норуз вә Қазақ ханлиғиниң 550 жиллиғи мәйрәмлик тәнтәниләрниң асасини тәшкил қилди. Бу күни Қочақ театриниң, Алмута һайванат беғиниң, Дөләт циркиниң, «Сазген сазы» фольклор-этнографиялик ансамблиниң вә «ОРДА» топиниң артистлири жиғилғанларға өз һүнирини һәдийә қилди. Кәчқурунлуғи болса, мәйрәмлик Алмута «Көктөбә» теғидин етилған фейерверкниң рәңлик нурлириға чөмүлди.