- Йеңилиқлар
- 21 Мамыр, 2012
Астана — Минск: умумий тарих, умумий келәчәк
13-14-май күни Дөләт рәһбири Нурсултан Назарбаев Беларусь Җумһурийитидә рәсмий сәпәрдә болди. Икки дөләт рәһбири йәкшәнбә күни Беловежье орманлиғида нарәсмий шараитта учрашти. Улар миллий паркни көздин кәчүрди, шундақла иккитәрәплимә мунасивәтләрниң кәң даирисини муһакимә қилди.
Дүшәнбә күни болса, Минскида тар вә кәң тәркиптики музакириләр болуп өтти. Нурсултан Назарбаевниң тәкитлишичә, Беларусь Қазақстан үчүн стратегиялик шерик, йеқин дост вә иттипақдаш болуп һесаплиниду. Униң үстигә биз бир пүтүн Бажхана иттипақиниң әзаси.
Қазақстан Президентиниң пикричә, униң Беларусьқа қилған бу қетимқи сәпири икки мәмликәтниң болупму сода-ихтисадий саһадики һәмкарлиғини йеңи дәриҗигә көтириш имканийитини бериду, униң нәтиҗисидә товар айлиними болса, бир миллиард доллардин ешип кетиши керәк. У һазирниң өзидә Қазақстан территориясидә санаәт кооперацияси саһасида онлиған бирләшкән карханиларниң қурулғанлиғини тәкитлиди. Бир пүтүн ихтисадий кәңликниң вуҗутқа келиши билән һәмкарлиқни техиму тәрәққий әткүзүш истиқбали ечилиду.
— Илгәрки кеңәш кәңлигидә Беларусь, Россия вә Қазақстан охшаш йеқин иттипақдашлар йоқ. Бу көп нәрсидин далаләт бериду, — дәп билдүрди Нурсултан Назарбаев.
Өз новитидә Александр Лукашенкому худди шундақ пикирни изһар қилди.
— Сизниң, әтималим, буниңдин 20 жил илгири ейтқан Бир пүтүн ихтисадий кәңлик тоғрилиқ яхши идеяңизниң шәкилгила егә болуп қалмай, бәлки мәзмун-маһийәт билән бейитилидиғанлиғиға аз вақит қалди, — дәп мураҗиәт қилди у кәсипдишиға. — Бу бирләшмидә бизниң мәмликәтлиримизниң истиқбали чоңдур. Қазақстан билән Беларусь өз ара сода алақиси бойичә МДҺда Россия вә Украинидин кейин иккинчи орунда туриду. Әгәр Қазақстан Украина охшаш йеқин болса, ишинимәнки, товар айлинимиму чоң болуп, Беларусьқиму хелә йеник болған болар еди.
Александр Лукашенко пурсәттин пайдилинип, Қазақстан тәрәпкә Беларусь қатнишиватқан дөләт программилири үчүн миннәтдарлиқ билдүрди.
Нурсултан Назарбаев белорус хәлқини өткән Ғалибийәт Күни билән тәбрикләп, бу күнниң белоруслар үчүн алаһидә күн екәнлигини, мәзкүр җумһурийәтниң Улуқ Вәтән уруши вақтида әң көп адәм чиқимиға учриғанлиғини тәкитлиди.
Учришиш ахирида Президентлар икки мәмликәтни ихтисадий, сәясий, гуманитарлиқ вә башқа саһаларда йеқинлаштуруш мәхситидики һәмкарлиқниң асасий йөнилишлирини бәлгүләйдиған бирләшкән билдүрүшни имзалиди.
Униңдин ташқири, дипломатик вакаләтханилар беналирини селиш үчүн өз ара йәр участкилирини бериш тоғрилиқ һөкүмәтләр ара келишим, икки мәмликәт йеза егилиги министрликлири оттурисидики һәмкарлиқ тоғрилиқ келишим вә башқа һөҗҗәтләр имзаланди.
579 рет
көрсетілді0
пікір
