• Концерт
• 25 Маусым, 2015

Анилар һүниридин бәһримән болди

Җумһурийәтлик Уйғур этномәдәнийәт мәркизи йенидики «Уйғур анилар» кеңишиниң рәиси Зорәм Авутованиң рәһбәрлигидики «Анилар хориниң» қурулғиниға анчә көп вақит болмисиму, һәрхил сорунларда ихчам концертлири билән сәнъәтхумар амминиң иҗабий инкаслириға егә болмақта. Йеқинда мәзкүр хор әзалири Ават йезисиниң Мәдәнийәт өйидә дәсләпки концертини қойди. «Сеғинған нахшилар – дилим сөйгүси» дәп аталған бу концертқа Зорәм Авутованиң өзи риясәтчилик қилди. Униң ейтишичә, «Анилар хори» 2012-жили қурулупту. Һазир хор тәркивидә 10 ана бар екән. Уларниң әң чоңи — Саадәт аниниң йеши йәтмиштин ашса, әң кичиги Эльмира 40 яшқа кәпту. Көпчилиги — көпбалилиқ, оғул-қизлирини қатарға қошқан нураний анилар һәм нәврә беқиватқан момилар. Тәкитләш лазимки, Саадәт Мәһәмәтова, Хәйринсәм Мәсимова, Алимбүви Садиқова, Җөһәрбүви Сасиқова, Разийәм Ибрагимова, Нуранийәм Насирова, Гүли Палтаева, Үмсепийәм Ибрагимова, Рашидәм Мурашова вә Эльмирәм Ғоҗамбәрдиева кәспий сәнъәткарлар болмисиму, жуқури сәһнә мәдәнийитини көрситип, «Әҗәм наһаси», «Гүлмәрәм», «Каккук», «Егиз асман», «Ақ белиқ», «Дилим сөйгүси» башқиму көпчилик сеғинған нахшилири билән тамашибинларниң гүлдирас чаваклириға, һөрмәт-еһтирамиға сазавәр болди. Әнди Гүли Палтаева оқуған Долқун Ясинниң «Мән уйғурмән» шеири, Таһир Баратовниң вә  «Рухсарә» ансамблиниң уссуллири концертниң техиму қизиқ өтүшини тәминлиди.

Рашидәм РӘҺМАНОВА.

Әмгәкчиқазақ наһийәси.