• Йеңилиқлар
• 10 Шілде, 2015

«Қазақстан Барысы» ениқланди

4-июль күни Астанада Милләт Лидери — Қазақстан Президентиниң мукапити үчүн «Қазақстан Барысы» әнъәнивий турнири болуп өтти. Қазақ күриши бойичә бәшинчи қетим өткүзүлгән бу қетимқи турнирда 33 әң күчлүк палван «Қазақстан Барысы» атиғи үчүн күрәшти. Турнирниң финал қисмиға Дөләт рәһбири қатнишип, чемпион бәлбеғиға сазавәр болған Бейбит Ыстыбаевқа баш мукапат — алтун «Тайтұяқни» тапшурди.Нурсултан Әбиш оғли мусабиқә қатнашқучилирини тәбрикләп, қайтидин тикләнгән миллий спорт түри — қазақ күришиниң кейинки жилларда мәмликәттә мустәқиллигимиз рәмзлириниң биригә айлиниватқанлиғини тәкитлиди. Күрәшниң бу түри хәлқимиз үчүн әнъәнивий спорт түри болуп һесаплиниду. Авул балилири қедимдин тартипла қазақ күриши билән шуғуллинип, шуниң арқилиқ өз маһаритини мукәммәлләштүрүп кәлгән. Атилар балилириға бу күрәш усуллирини үгитәтти. Мән мусабиқиларни чин дилимдин қоллап-қувәтләймән. Келәчәктә турнирниң техиму аммибаплиққа егә болуп, униң һазирқи қатнашқучилириниң арисидин Балуан Шолақ, Қажымуқан охшаш улуқ қазақ палванлириниң шөһритини давамлаштуридиған спортчиларниң чиқидиғанлиғиға ишинимән. Турнирниң хәлиқара дәриҗигә көтирилидиғанлиғиға вә мәмликитимизниң шөһритини ашуруп, қитъә һәм Олимпиада оюнлири программисиниң бир қисмиға айлинидиғанлиғиға үмүт қилимән, — деди Қазақстан Президенти. Дөләт рәһбири шундақла Пайтәхт күни һарписида өткән мусабиқиларни пүткүл мәмликәтниң тамашә қилғанлиғиға диққәт ағдурди. — Бу хәлқимиз үчүн чоң мәйрәм. Бизниң яшлар сағлам һаят тәризигә әмәл қилиши, җисманий күч-қудритини ашуруши керәк. Шу түпәйли бизниң дөлитимиз вә җәмийитимизниң асаси мәккәм болиду, — деди Нурсултан Назарбаев. Чүшлүги башлинип кәчкичә давамлашқан мусабиқида биринчи орунни Җамбул вилайитидин кәлгән палван Бейбит Ыстыбаев (салмиғи 145 кг.), иккинчи орунни қизилордилиқ Руслан Абдразақов (салмиғи 115 кг.), үчинчи орунни болса, пайтәхт вәкили Ғани Сейдилдаев (салмиғи 100 кг.) егилиди. Шуни қошумчә қилимизки, Бейбит Ыстыбаев 2012-жилдиму шундақ атаққа еришкән еди.