• Йеңилиқлар
• 31 Шілде, 2015

42 җәңчиниң бири еди

Уруш жиллири кичиккинә Нағричи йезисидин илгири-кейин болуп қириқ икки адәм мәйданға атланған екән. Уларниң бәзилиригә жутиға қайтип келиш несип болмиди, айримлири болса, урушта алған җараһәт яки тартқан җапа-мәшәқәтләрниң ақивитидин бевақит вапат болуп кәтти. Бәзилири Алла бәргән өмрини сүрүп, жутдашлириниң мәнпийити йолида тәрини төкүп, аләмдин өтти. Абабәкрим Шәрипов шу үчинчи топтикиләр җүмлисидин еди. Октябрь инқилавиниң тәңтуши болған Абабәкрим Шәрип оғли Хонихай йезисида дехан аилисидә дунияға кәлгән. Кейинирәк, аиләвий шараит түпәйли, Нағричи йезисиға көчүп кәлгән. 1937-жили һәрбий сәпкә чақиртилип, үч жиллиқ борчини өтәп қайтидудә, колхозда әмгәк қилишқа башлайду. Әпсуски, аридин бирәр жилчә вақит өтүп, уруш башлинип кетиду. Шундақ қилип, яңливаштин һәрбий сәпкә чақиртилиду. Һәрбий тәртип интизамдин хәвири болғачқа, дәсләпки күнләрдин башлапла беваситә җәңләргә  қатнишиду. Хонихайлиқ  җәңчиниң бесип өткән йолиға нәзәр ташлиғанда униң  1941-жилдин та уруш тамамланған 1945-жилғичә талай қанлиқ җәңләрни баштин кәчүргәнлигигә көз йәткүзүш мүмкин. Мәсилән, Москва босуғисидин тартип Ленинград, Польша, Берлин үчүн болған шиддәтлик җәңләргә қатнашти. Бирнәччә қетим яридар болуп, давалинип чиққандин кейин йәнила өз сепигә қошулуп, қолиға қурал алди. Польшида болған җәңләрдә “Қизил Юлтуз” ордени билән мукапатланди. 1945-жили күз айлирида жутқа қайтип кәлгән Абабәкрим Шәриповниң колхоз ишлириға қоюқ арилишишиға тоғра кәлди. Өз вақтида бир убдан тәрәққий етиватқан егиликниң  әйни чағдики ихтисадий әһвали билән жутдашлириниң еғир турмушини көрүп, һар-виждани яр бәрмиди. Алди билән колхоз гаражида бузулуп ятқан “ЧТЗ” маркилиқ тракторни җөндәшниң амалини издәштүрди. Егилик рәһбәрлири билән мәслиһәтлишип, ахири һаҗәтлик запас қисимларни сораштуруп жүрүп наһийәлик МТСниң қоймисидин тапти. Шуниң билән “җан киргән” “Төмүр тулпарниң” садасидин нағричилиқлар йеник нәпәс алған еди. Қувити һазирқи техникиларға нисбәтән чағлиқ болушиға қаримастин, “ЧТЗ” талай адәмниң еғирини йеник қилип, җениға әсқатти. Нағричи йезисидики мәктәп йенида җәмийәтлик асаста тәшкил қилинған мирасгаһта Улуқ Вәтән урушиға қатнашқан жутдашлар тоғрилиқ мәлуматлар бар. Җүмлидин униңға 1989-жили вапат болған қош “Қизил Юлтуз” орденлиқ уруш вә әмгәк ветерани Абабәкрим Шәрипов һәққидиму һөҗҗәтләр қоюлған. Бу бүгүнки әвлат үчүн қан кечип, җан тиккән ата-бовилар исминиң һечқачан унтулмайдиғанлиғиниң испати.

Нурәхмәт ӘХМӘТОВ.

Панфилов наһийәси.