• Яднамә
• 06 Тамыз, 2015

Көйүк оти өчәр әмәс

Ана үчүн һәммә пәрзәнт әзиз. Лекин мени, қериндашлирини буниңдин он бәш илгири зар қахшитип, паҗиәлик бақийлиқ болған оғлум Магелан Зордун оғли Мөрдиновниң оти бөләкчә еди. Немишкиду ичимдикини башқиларға ейтишқа петиналмисам, униң билән бөлүшәттим. Һә, у болса, ана-бала арисидики иллиқ, тил билән йәткүзгүсиз йеқимлиқ сезимлар илкидә мени диққәт билән тиңшайдиған. Расти шуки, иккимиз бир-биримизни яхши чүшинәттуқ һәм пуғанимиз қанғичә муңдишаттуқ. Мана, мени тәғдир әйнә шундақ әзиз пәрзәнттин бевақит җуда қилип, шуниңдин буян узун жиллар өтсиму көйүк оти һели өчәр әмәс. Әзизим һаятниң «тәпсә, төмүр үзидиған» пәйтидә күтүлмигән йәрдин автомобиль һалакитидин көз жумди. Кичигидин тиришчан, әмгәкчан Магелан 1965-жили Уйғур наһийәсиниң Ақтам йезисида туғулди. Һәрбий хизмитини өтәп келип, аз өтмәй Тельман намидики колхозниң ишлириға киришип кәтти. Кейинирәк заман өзгәргәндиму, «әмгәк қилған адәм йәрдә қалмайду» чүшәнчисигә қәтъий риайә қилип, еринмәй тәр төкти. Шу түпәйли, һәмминиң алдида алаһидә һөрмәткә сазавәр болди. Униң бир пикирдә қелип, ейтқинидин қайтмайдиған хислитигә рази болған йерим бар. Адәмләр йезини тәрк етип, қара қосақ ғемида шәһәргә атланғинида мениңму балилирим шуларниң қатарида Алмутиға қарап йол тутти. Худаға шүкри, һәммиси шәһәрлик аталди. Амма бүгүн мән хатириләватқан қәдирдан оғлум «анамни, жутумни ташлап, һеч йәргә бармаймән», дедидә сәрада мениң билән қалди. Шу чағда оғлумниң инсавиға ана сүпитидә апирин ейтқан едим. Бири кам дуния әмәсму, мошундақ пәрзәнттин әтигән айрилдим. Оғлум һаят болғинида бу күнләрдә җуғи-җәм болушуп, униң 50 яшлиқ тәвәллудини нишанлар едуқ. Әпсус, миңларчә әпсус, әл қатарида аилә қуруп, омақ икки пәрзәнт қучқан баламға мубарәк яшларға йетиш несип болмиған екән. Йәттә пәрзәндимниң арисида көйүк оти бөләк, йәттә қериндишини йәрдә қоймайдиған қозамни қутлуқ мәрикиси билән тәбрикләшниң орниға, яд етип хатириләш буйрупту бизгә, халас. Сениң ярқин қияпитиң бизниң қәлбимиздә мәңгү сақлиниду, Магелан балам!

Нурәләхан МӨРДИНОВА.

Гүлдала йезиси. Талғир наһийәси.