• Йеңилиқлар
• 27 Тамыз, 2015

«Хошнамниң қизиға ашиқ едим»

Йеши сәксәндин алқиған көрнәклик алим, язғучи Рабик Исмайиловниң әстә сақлаш қабилийитигә һәйран қалимән. У өткән-кәчкәнниң гепини жипидин жиңнисиғичә ейтип берәләйду. Мәктәптики, һәтта бағчидики вақитлириниму тәпсилий сөзләп бериду. Бу қетим униңдин «Мәктәптики муһәббитиңиз ядиңиздиму?» дәп соридим.  У мениң илтимасимни рәт қилмиди.Рабик Һезим оғлиниң балилиқ дәври дадисиниң хизмитигә бола Уйғур вә Челәк наһийәлиридә өтти. Биринчи синипқа у Челәк йезисида барди. У вақитта дадиси Һезим Челәк наһийәлик малийә бөлүми башлиғиниң орунбасари еди. Наһийә дәриҗисидики әмәлдарниң балисиниң бир еғиз русчә билмәй, рус синипиға бериши өз алдиға қизиқ бир вақиә. Әң қизиғи, у 4-синипта оқуветип хошниси һәм синипдиши, дадиси уйғур, аписи рус Рита исимлиқ қизға ашиқ болиду. Алди билән у Ритаға ашиқ екәнлигини хәт арқилиқ изһар қилиду. Рита униңға җавапму язмайду. Шох жигит кейин уни кочида тутувелип сөзләшкәндә, Рита униң муһәббитини рәт қилиду. Шу вақитта у синипдишиниң качитиға бир шапилақ урувәткән екән. Әтисила синипта униң мәсилиси қарилиду. Синип йетәкчисиниң: «Исмайилов, бу немә  қилғиниң?» дегән соалиға у һеч мәңдимәстинла: «Мән уни яхши көримән» дәп җавап бәргән екән. Муәллим күлүп кетипту. Шундақ қилип, бала Рабик Челәктә 6-синипни пүтирип, 7-синипни бир ай оқуғандин кейин униң ата-аниси Уйғур наһийәсиниң мәркизи Чонҗа йезисиға көчүп кетиду. Рабик тоққузинчи синипни пүтәргәндин кейин,  дадисиниң хизмитигә бола, Челәк тәвәсигә көчиду. Рабик Исмайилов өзиниң синипиға қайтип келиду. Бу қетим у Ритани көрүп, униңға қайтидинла ашиқ болиду. Қизиқ йери, иккиси хошна еди. Бу қетим у синипдишиға «имзасиз» хәт язиду. «Бир чағларда мән саңа ашиқ едим» дегән мисраларни алим мошу кәмгичә унтумапту. Бу хәткә Рита қатуруп җавап язған көрүниду. Қисқиси, у хошнисиға раса аһанәт қипту. Һәтта униң төртинчи синипта качитиға урғанлириниму ядиға сапту. Бу, әлвәттә, шох жигиткә яқмиди. Ахири, бойи йетип қалған икки яш кәчқурунлуғи ишик алдида учришиду. Арилиридики гәпму узаққа созулмиди. Шу шу болди, улар хелә вақитқичә учрашмиди. Рабик Исмайилов Ташкәнткә оқушқа кетиду, Рита Алмутида оқупту. — Күнләрниң бир күни Ритани Алмутида учритип қалдим, — дәйду алим өткән күнләрни әсләп. — Турмушқа чиқип, аилилик бопту. Униң билән яшлиқ чағларниң гепини қилимизмекин десәм, кәйпияти йоқ екән. Рита маңа һечнәрсини ечип ейтмиди. Кейин уқушсам, йолдиши көп ичидиған охшайду. У маңа бир нәрсиләрни ейтмақчи болди, амма петиналмиди. Мәнму һәм шу кәйпиятта болдум.                                                                        

Бәхтишат СОПИЕВ.