• Йеңи ихтисадий сәясәт
• 27 Тамыз, 2015

Экспорт иқтидарини ашуриду

Мениң пикримчә, тәңгини әркин авуштуруш курсиға өтүш вәтәнлик агросанаәт комплексини йүксәлдүрүшкә шараит яритиду. Бу дөлитимизниң Дуниявий сода тәшкилатиға кириш һарписида наһайити муһим. Һазир ички базарлиримизда қазақстанлиқ вә чәтәллик йеза егилиги мәһсулатлирини ишләпчиқарғучилар арисида чоң риқабәтчилик күтүлмәктә.Мән Президентимизниң дөләтниң йеңи малийә-мәбләғ сәясити ихтисатниң риқабәткә қабиллиғини вә санаәт орунлирида иш орунлирини сақлашқа мүмкинчилик бериду, дегән пикрини толуқ қоллап-қувәтләймән. Мәлумки, хошна дөләтләрниң валютилириниң баһасини төвәнлигидин биздики санаәт орунлири, шуниң ичидә, йеза егилиги мәһсулатлирини ишләпчиқарғучилар риқабәткә қабил әмәс еди. Әнди охшаш шараитларда вәтәнлик деханларда мәһсулатни көпәйтиш, һосулдарлиқни вә мәһсулат сүпитини, әң асаси, экспорт иқтидарини ашуруш мүмкинчилиги пәйда болди. Тәкитләш лазимки, елимиздә аддий хәлиқ үчүн нурғун ишлар әмәлгә ашурулди вә келәчәктиму әмәлгә ашурулмақчи: йеңи санаәт орунлири ечилмақта, иш орунлири пәйда болмақта. Дөләтниң қоллап-қувәтлиши билән тиҗарәтчиләр риқабәткә қабил мәһсулатларни йетиштүрмәктә, диплом алған яш мутәхәссисләр көпләп йезиларға кәлмәктә. Буниң һәммиси Дөләт рәһбири Нурсултан Назарбаевниң дана сәяситиниң мевиси. Мениңчә болса, дуния ихтисадида қелиплашқан турақсизлиқ әһвалда рәһбәрләргә ихтисатни турақлиқ тәрәққий әткүзүш, иҗтимаий мәсилиләрни һәл қилиш, аддий хәлиқниң һаят дәриҗисини көтириш бойичә нурғун ишларни әмәлгә ашуруш жүклиниду. Шуңлашқа, Президент тәкитлигинидәк, тәңгини әркин авуштуруш курсини киргүзүш ихтисадий өсүшни капаләтләндүриду. Әнди алдимизға қойған мәхсәтләргә йетидиғинимизға ишәнчим камил. Биз үчүн, әң муһими, турақлиқ вә әтики күнгә болған ишәнчимиз һәм сөйүмлүк ишимиз билән шуғуллиништур.

Нурлан ӘЛАХУНОВ,

йеза егилиги пәнлириниң доктори.