• 1-декабрь — Тунҗа Президент күни
• 26 Қараша, 2015

Президент жутида болди

Тунҗа Президент Күни һарписида «Жас Отан» яшлар қанитиниң уюштуруши билән бир топ алмутилиқ студентлар Дөләт рәһбири Нурсултан Назарбаевниң жутида болди.Улар Қарасай наһийәсиниң мәркизи Хәшкиләңдә тарих-өлкишунаслиқ мирасгаһини зиярәт қилди. Мәзкүр мирасгаһта Йәттису өлкисиниң өтмүш тарихидин һекайә қилидиған 2 миңға йеқин баһалиқ фотосүрәт вә экспонат бар. Униңға археологиялик тепилмиларму қоюлған. Шу нәрсә қизиқарлиқки, илгири мирасгаһ бенасиға Абай намидики оттура мәктәп орунлишип, уни 1958-жили Нурсултан Назарбаев «Алтун медаль» билән тамамлиған еди. Бу йәргә Президентниң мәктәп һаяти тоғрилиқ һекайә қилидиған бай материал топланған. Балилар Милләт Лидери олтарған партини, кичик Нурсултан биринчи қоңғурақ һарписида ата-анилири билән чүшкән фотосүрәтләрни вә Дөләт рәһбириниң һаятиға мунасивәтлик башқиму экспонатларни көздин кәчүрди. Студентларда оқуғучиларниң үлгирим табели алаһидә қизиқиш һасил қилди. Тунҗа Президентниң устази, уруш ветерани Сейитхан Исаевниң вә синипдиши, пешқәдәм педагог Рая Сиразитдинованиң тәкитлишичә, Нурсултан Әбиш оғли пәқәт «бәшкә» оқуп, нахшини яхши ейтаттекән, домбра вә баянниң «қулиғида» ойнаттекән. — Нурсултан Назарбаев һәрқачан алдинқи сәптә еди, — дәйду Рая Гарифовна. — Униң күч чиқириши түпәйли синипимиз наһайити инақ болидиған. Математика пәни бойичә синақ ишлирида Нурсултанниң һәрқачан қийин вариантларни таллап еливалидиғанлиғи ядимда. Биз, Президентниң синипдашлири, униң билән бир мәктәптә оқуғанлиғимиз билән пәхирлинимиз. Студентлар мирасгаһ экспозициялирини көздин кәчүргәндин кейин Абай намидики мәктәп-гимназияниң йеңи бенасиниму зиярәт қилди.