• «Мәшъәлниң» меһмини
• 25 Ақпан, 2016

«Шансонниң» маһири

Яшларға беғишланған мәхсус сәһипә Исми: Алимҗан Фамилияси: Зулпиқаров Туғулған жили: 1988 Билими: оттураАлимҗан Зулпиқаров – шансон нахшилирини орунлашниң һәқиқий маһири. У өткәндә Россияниң «Настоящий шансон» фестивалиға қатнишип,  ғалип чиқти. Һазир мошу стильдики нахшиларниң яшлар арисида  аммибапқа егә екәнлигини инавәткә алсақ, бу, әлвәттә, чоң утуқ. Алимҗан Қәһриман оғли Әмгәкчиқазақ наһийәсидики Өмәр Муһәммәдий намидики оттура мәктәпни тамамлиған. У балилиқ чеғидинла музыкиға зор иштияқ бағлап өсти. Тәбиәт һәдийә қилған қабилийити түпәйли  мәктәптә өткән барлиқ кәчләрни классикилиқ, лирикилиқ, хәлиқ, шундақла шансон стилидики нахшилири билән қизитип кәлди. Мәлумки, Ават йезиси Ипәк йолиниң бойиға җайлашқан. Оттура вә кичик тиҗарәт дөләт ғәмхорлуғиға елинғандин кейин йезида бирнәччә кафе ечилди. Алимҗан жутдашлириниң илтимаси билән той-төкүн, тәвәллуд кәчлиридә нахша ейтишқа башлайду. Ават йезисидики Мәдәнийәт өйиниң мудири Долқунҗан Розахунов Алимҗанниң қабилийитини техиму ашуруш мәхситидә йениға тәклип қилиду. Мана шуниңдин бери Алимҗан йезида өтүватқан барлиқ мәдәний чарә-тәдбирләргә қатнишип, жутдашлирини йеқимлиқ авази, чирайлиқ нахшилири билән хошал қилип келиватиду. Һүнирини йәнила шу жутдашлириниң ярдими билән җумһурийәтлик вә хәлиқара сәһнилиридә намайиш қилиш имканийитигә егә болди. Униң арзу-арманлири сахавәтлик инсанларниң ярдими билән әмәлгә ашти. Алимҗанниң әң чоң утуқлириниң бири – 2015-жили январь ейида у «Шинҗаң талант сәһниси» хәлиқара фестивалиға қатнашти вә финалға чиқишқа муйәссәр болди. Әнди өткән жилниң ахирида болса, у Россияниң «Настоящий шансон» фестивалида сәнъәт мухлислирини өзиниң әҗайип таланти билән қайил қилип, І орунни егилиди. «Настоящий шансон» ширкитиниң мудири Владимир Курский Алимҗанниң қабилийитини мунасип баһалап, уни һәмкарлишип паалийәт елип беришқа чақирди. Һазир у яш сәнъәткарниң орунлишидики нахшилардин тәркип тапқан диск үстидә ишләватиду. Март ейиниң ахирида Алимҗан Москваға атланмақчи. Уни чоң иҗадийәт йоли күтүп туриду. Бәлким, у Мурат Насиров акимизға охшаш сәһнә юлтузиға айлинип қалар.  Биз, Ават йезисиниң яшлири, жутдишимизға  ақ йол тиләймиз! Бүвинур ҺӘВӘЙДУЛЛАЕВА. Әмгәкчиқазақ наһийәси.