• Йеңилиқлар
• 10 Наурыз, 2016

Мәйрәмлик кәйпият һәдийә қилди

Алмута шәһири Түрксиб мәһәллисидә жигитбеши Мәһәмәтҗан Қурбанов, Ханим-қизлар кеңишиниң рәиси Зумрәт Абдримова, Анилар кеңишиниң рәиси Санийәм Сопәкова вә униң орунбасари Санийәм Изқулова баһар ейиниң кириши билән жуттики йеши 70тин алқиған 70 аниниң бешини қошушни көңлигә пүкүп қойған еди. Жутдашлириниң бу хилдики тәшәббусидин хәвәр тапқан 89-рус-уйғур оттура мәктивиниң коллективиму қарап турғини йоқ. Мәйрәм күни мәктәп коллективи билән жут бирликтә мәзкүр билим дәргаһида йәтмиш аниниң бешини қошти. «Әзиз Ана, мәйримиңиз мубарәк!» мавзусида өткүзүлгән кәчниң техиму мәзмунлуқ өтүшигә башланғуч синип муәллими Аида Әхмәтова вә башқиму муәллимләрниң көп күч чиқарғанлиғи көрүнүп туриду. Аниларни мәктәп мудири Асийәм Йүсүпова, Алмута шәһәрлик Уйғур этномәдәнийәт мәркизи йенидики Ханим-қизлар кеңишиниң рәиси Маһинур Исрайилова, жигитбеши Мәһәмәтҗан Қурбанов вә башқилар тәбриклигәндин кейин меһманларниң диққитигә мәктәп оқуғучилири тәрипидин тәйярланған концертлиқ программа вә сәһнилик көрүнүшләр һавалә қилинди. Бәхтишат СОПИЕВ. Йеңи Һаят мәһәллиси — Түрксиб  наһийәсидики өмлүги һәи бирлиги ярашқан жутларниң бири. Мәһәллә турғунлири мәдәний чарә-тәдбирләрни бирлишип, өмлүшүп өткүзүшкә адәтләнгән.  Изгү башланмиларниң тәшәббускарлири болуватқанму мошу жутниң турғунлири. Қисқиси,, бу мәһәллидә һәрикәтму һәм бәрикәтму моҗут. Өткән (җптидә мәзкүр мәһөәллиниң   ханим-қизлири өзлириниң мәйримини шәһәрдики «У Шакира» кафесида қарши алди.  Ханим-қизлар бу күни өзлири нахша ейтип, өзлири уссулға чүшти, һәммини қайил қилди. Қизиқ вә тәсирлик өткән кәчтә Алмута шәһәрлик Уйғур этномәдәнийәт мәркизи рәисиниң орунбасари Маһинур Исрайилова, Түрксиб наһийәлик Ханим-қизлар кеңишиниң рәиси Нурбүви Фазилова, Йеңи Һаят мәһәллисиниң жигитбеши Абдукерим Абубәкиров, «Уйғур авази» гезитиниң бөлүм башлиғи Шәмшидин Аюпов аниларға өзлириниң изгү тиләклирини изһар қилди. Өз новитидә нураний анилар мәйрәмлик кәйпият һәдийә қилған паалийәтчан ханим-қизларға, җүмлидин Халима Һәмраева, Иззәтбүви Әмруллаева, Реһангүл Тохтибақиева, Патигүл Баратова,  Раһиләм Турсунова, Ғунчәм Тохсунова вә башқиларға өзлириниң миннәтдарлиғини ейтти. Андин меһманлар мәйрәмлик дәстихандин еғиз тәккәч, хәлиқ талантлири Һетахун Әсқәровниң иҗрасидики йеқимлиқ нахшилар билән  Шарванәм  Әлаеваниң әвришим уссуллиридин бәһримән болушти. Рашидәм  МИРЗӘХМӘТОВА. Алмута шәһири. 8-Март – Хәлиқара аяллар мәйрими мунасивити билән  Ават йезиси Ханим-қизлар кеңишиниң рәиси Турсунай Абдуллаева вә униң орунбасари Нурбүви Һәвәйдуллаеваниң уюштуруши билән «Арзу» кафесида өткән мәйрәмлик чаригә округтин вә жирақ-йеқиндин кәлгән 200дин ошуқ нураний һәм көпбалилиқ анилар, җамаәтчилик ишлириниң активистлири, ишбиләрмән ханимлар, башқиму саһаларда әмгәк қиливатқан аҗизлар қатнашти. Уларни Ават йеза округиниң һакими Ерғали Байбөриев, Әмгәкчиқазақ наһийәлик Уйғур этномәдәнийәт мәркизиниң рәиси Сулайман Мәхсүтов, наһийәниң чоң жигитбеши Турсунмәһәмәт Абдусемәтов вә униң орунбасари, Ават йезисиниң жигитбеши Үсәнҗан Абдрахманов, Ишиктә регионлуқ ханим-қизлар кеңишиниң рәиси Нурбүви Насирова вә Ават Ханим-қизлар кеңишиниң сабиқ рәиси Омайхан Мәңсүрова тәбрикләп, бәхит-саадәт, саламәтлик вә аиләвий хатирҗәмлик тилиди. Мәйрәмлик чарә давамида ханим-қизлар Қуддус Ғоҗамияров намидики Уйғур театриниң артисти Алимҗан Абдуллаевниң, Ават йезиси Мәдәнийәт өйиниң мудири Долқунҗан Розахуновниң вә башқиму иҗрачиларниң орунлишидики нахшилардин, «Баһар» ансамбли қизлириниң әвришим уссуллиридин бәһримән болуп, шох уссулларға чүшти. Шундақла аватлиқ ханим-қизларни буниңдин бирнәччә күн бурун өткән «Супер келин» конкурсиниң қатнашқучилири тәбриклиди. Конкурста ғалип чиққан қазақ қизи, уйғур аилисиниң келини Әсел Мусенованиң иҗрасидики уйғур уссули меһманлар тәрипидин гүлдүрлигән чаваклар билән қарши елинди.   *** Рахат йеза округиниң Адаләт Давутова рәһбәрлигидики ханим-қизлар ахирқи вақитларда алаһидә пааллийәтчанлиқ көрсәтмәктә. Хәлиқара аяллар күни мәйрими һарписида улар мәйрәмлик «Гүлхан» уюштурди. Униңға Ишиктә шәһириниң, Қәйнәзәр вә Рахат йезилириниң 100дин артуқ ханим-қизлири қатнашти.  «Талантлар хәлиқ арисида» демәкчи, кәч хәлиқ талантлириниң, Һәмрақиз Ниязова рәһбәрлигидики «Интизар» ансамблиниң нахша-уссуллири билән нәқишләнди. *** Челәк йезилиқ ханим-қизлар кеңишиниң рәиси Зәйтүнәм Сабитова уюштурған «Ана – бәхит нури» намлиқ кәчни Челәк регионлуқ ханим-қизлар кеңишиниң рәиси Нурҗамал Һасанова елип барди. Униңға регионда паалийәт елип бериватқан тиҗарәтчиләр, җүмлидин Роза Абитова һамийлиқ қилип, регионниң барлиқ йезилиридин дегидәк анилар қатнашти. Учришиш давамида Әмгәкчиқазақ наһийәлик Уйғур этномәдәнийәт мәркизи рәисиниң орунбасари Айнисәм Вайденова меһманларға җумһурийәтлик Уйғур этномәдәнийәт мәркизиниң рәиси Шаһимәрдан Нурумовниң, ҖУЭМ йенидики Ханим-қизлар кеңишиниң рәиси Сәнәм Бешированиң, наһийәлик Уйғур этномәдәнийәт бирләшмисиниң рәиси Сулайман Мәхсүтовниң тәбригини йәткүзди. Ханим-қизларни мәйрими билән тәбрикләп кәлгән Челәк йезисиниң чоң жигитбеши Мәһәмәтҗан Савутов қазақ вә уйғур хәлқиниң қериндашлиғи вә достлуқ әнъәнилиридин мисалларни кәлтүрүп, аяллар активлиғиниң ешиватқанлиғини тәкитлиди. Рашидәм РӘҺМАНОВА. Әмгәкчиқазақ наһийәси. Буниңдин он жил илгири тонулған җәмийәт әрбаби Әхмәтҗан Шардиновниң рәпиқиси Клара Шардинова йеқиндин арилишип жүргән достлириға «Ишбиләрмән аяллар» клубини» қуруш тәкливини бериду. Униң бу тәшәббусини әтрапидики турақлиқ арилишип жүргән достлири қоллап-қувәтләйду. Шундақ қилип, улар он жил давамида хәйрихаһлиқ паалийәт билән шуғулланмақта. Ишбиләрмәнләр алди билән турмуш шараити начар аилиләргә қол учини созди. Алий билим дәргаһида оқушқа хаһиши бар, амма ихтисади яр бәрмигән талай балилиримизғиму яр-йөләк болди. Алмутидики төрт уйғур мәктивигә һәр жили халисанә ярдимини қилип кәлмәктә. «Уйғур авазиниңму» турақлиқ һамийлири. Бийил ишбиләрмәнләр әллик адәмниң муштири болушиға зәмин яратти. Һәр жили 9-Майда уруш вә әмгәк ветеранлириниң бешини қошуп, мәйрәмлик дәстихан йейип, уларға маддий вә хатирә соғиларни тапшуриду. Ханим-қизлар мәйриминиму дағдуғилиқ нишанлап өтиду. Бу қетим болса, миллий мәдәнийитимизниң тәрәққиятиға өзлириниң үлүшини қошқан анилиримизға мәйрәмлик кәйпият һәдийә қилди, чүнки бийил ханим-қизлар мәйрими әйнә шу ишбиләрмәнләрниң он жиллиғиға тоғра кәлди. У күни «Шарис» рестораниға ишбиләрмәнләр жилдиқидәк нураний анилар билән ханим-қизларни тәклип қилип, қош мәйрәмни атап өтти. Мәзкүр дәстиханға риясәтчилик қилған «АЗМК» йолдашлиғи чәкләнгән ширкити баш мудириниң орунбасари Мурат Хизмәтов алди билән аниларни мәйрими билән тәбрикләп, андин саһипханларниң он жилда әмәлгә ашурған ишлириға қисқичә тохталди. Шуниңдин кейин сөз новитини алған җумһурийәтлик Уйғур этномәдәнийәт мәркизиниң иҗраий мудири Зихруллам Қурванбақиев Клара Шардинова рәһбәрлигидики ишбиләрмән ханим-қизларниң җумһурийәт даирисидә әмәлгә ашурған хәйрихаһлиқ ишлирини жуқури баһалиди. Шундақла мәзкүр клуб рәиси Клара Турсун қизиға ҖУЭМ тәрипидин тәсис қилинған «Сахавәт» медалини тапшурди. Шуниң билән биллә Нурванәм вә Турсунай Абдрахмановалар, Римма Насирова, Тамара Мәмәтова, Гүлҗаһан Искәндәрова мәркәзниң пәхрий ярлиғи билән тәғдирләнди. «Уйғур авази» гезитиниң баш муһәррири Ершат Әсмәтов аниларға өзиниң иллиқ тиләклирини изһар қилғандин кейин мәрасимниң «тизгинини» Уйғур театриниң артисти Турдибүви Аблизова қолға алди. Миллий театримиздин қәдәм тәшрип қилған сәнъәткарлиримиз қуруқ қол кәлмәпту. Қазақстанниң хизмәт көрсәткән артисти, күлкә маһири Реһангүл Мәхпирова өз тиләклирини һәзил-чақчақ билән изһар қилса, тонулған сәнъәткарлар Толунай Әйсарова билән Үнчәм Сопиева бир җүп нахша орунлап бәрди. Меһманлардин сөзгә чиққан Омақ Һасанова уйғур ханим-қизлириниң паалийәтчанлиғи һәққидә өз пикрини төвәндикичә изһар қилди: — Җумһурийәтлик Уйғур этномәдәнийәт мәркизиниң әтрапиға қолидин иш келидиған ханим-қизлар топлинипту. 1-март — Миннәтдарлиқ күни Алмутидики «Достлуқ өйидә» өткән мәрасимға бизниң қизлиримиз чоң тәйярлиқлар билән кәлди. Башқилар бизниң миллий кийимлиримизға, таамлиримизға һәйран қелишти. Бүгүн йәнә шу ханимлардин тәркип тапқан клубниң он жиллиғини нишанлаватимиз. Клуб әзалири он жилда нурғун ишларни қипту. Ишбиләрмәнләр ишәнчимизни ақлаватиду. Апирин силәргә! Новити кәлгәндә дәстихан төридә олтарған нураний анилардин  Алийәм Исламова, язғучи Дүрнәм Мәшүрова «Ишбиләрмән аяллар» клубиниң» әзалириға өзлириниң миннәтдарлиғини изһар қилди. «Бу дунияда ата-аниниң дуасини елиштин артуқ бәхит йоқ, ишбиләрмәнләр әйнә шундақ бәхиткә еришкән инсанлар» дейишти улар бир еғиздин. Бәхтишат СОПИЕВ. СҮРӘТТӘ: мукапатлар билән тәғдирләнгән ишбиләрмән аялларниң бир түркүми.