• Йеңилиқлар
• 17 Наурыз, 2016

Қирғизстанда Уйғур театри селиниши мүмкин

Өткән һәптидә қирғизстанлиқ уйғурлар һаятида муһим тарихий вақиә йүз бәрди. Уйғурларниң «Иттипақ» җәмийәтлик бирләшмисиниң тәшәббуси билән Бишкек шәһиридә миллий мәдәнийәт очиғи — театр селиш мәсилиси көтирилди. Ушбу хушхәвәрни аңлиған барлиқ уйғур қериндашлиримиз шәһәрниң нәқ мәркизигә җайлашқан һашамәтлик «Ават» кафесиға жиғилди. Уйғурларниң тарихидин учур беридиған әхбаратлар, рәсимләр вә бүйүк мутәпәккүр алим, язғучиларниң тәрҗимиһали берилгән тахтиларниң илиниши һәм меһманларни миллий кийимләрдә иллиқ қарши еливатқан қизларни көргән һәрқандақ киши һаяҗанға бөләнмәй қалматти. Адәмләрниң мәйрәмлик кәйпиятини залда яңраватқан дилға арамбәхш дәмләрни беғишлайдиған миллий нахша-сазлар техиму жуқури дәриҗигә көтирәтти. Әйнә шундақ түс алған марафонда дәсләпки сөз «Иттипақ» җәмийәтлик бирләшмисиниң рәиси Артиқ һаҗим Һаҗиевқа берилди: — Һөрмәтлик вәтәндашлар! – дәп сөзини башлиди натиқ. – Биз, қирғизстанлиқ уйғурлар, қериндаш қирғиз хәлқи билән инақ-иҗил вә бир дәрәқниң шахлири кәби бир-биримизгә яр-йөләк болуп яшаватқанлиғимиз түпәйли, миллий мәдәнийитимизниң мәркизи болушқа тегиш Уйғур театрини селиш мәсилисини көтәргинимиздә, улар бир еғиздин қоллап-қувәтлиди. Ениғирағи, мошу жилниң февраль ейида «Иттипақ» җәмийитиниң йүздин ошуқ әзаси қатнашқан кәңәйтилгән мәҗлистә Уйғур театрини селиш қарари қобул қилинип, һөкүмәт органлириға мураҗиәт йоллиған едуқ. Униңға иҗабий җавап кәлди. Бу, әлвәттә, хошал боларлиқ әһвал. Шәхсән мән өзәмниң вә пүткүл қирғизстанлиқ уйғурлар намидин Президентимиз Алмазбек Атамбаевқа һәм қирғиз хәлқигә чәксиз миннәтдарлиғимни изһар қилимән. Әнди бүгүнки марафонға кәлсәк, рәис сүпитидә шуни яхши чүшинимәнки, бу иш бир күндә пүтмәйду вә көп миқдарда мәбләғ тәләп қилиниду, һәтта биз, һазир бу ишни қолға еливатқанлар, уни ахириға йәткүзәлмәй қелишимизму мүмкин. Амма биздин кейинки әвлатларниң бу изгү ишни чоқум давамлаштуридиғанлиғиға камил ишинимән вә бу иштин һечбир қериндишимизниң чәттә қалмайдиғанлиғиға үмүт қилимән. Ушбу мәсилиниң көтирилишигә сәвәпчи болғанларниң бири Артиқ һаҗимниң нутқидин кейин минбәргә чиққанлар, җүмлидин Қирғиз Җумһурийити Жогурку Кенешниң депутати Пәрһат Тулендыбаев, Қирғизстан хәлқи Ассамблеяси тәркивидики қазақ, карачай-черкес, әзәрбәйҗан, корей, туңган вә таҗик мәдәний бирләшмилиридин вәкилләр, Қазақстандин җумһурийәтлик «Уйғур авази» гезитиниң баш муһәррири Ершат Әсмәтов билән ҖУЭМ йенидики Ханим-қизлар кеңиши рәисиниң орунбасари Каминур Сопиева (сүрәттә) вә Қарабалта, Өзгән, Җалалабад вә Қаракөл қатарлиқ шәһәр-мәһәллиләрдин кәлгән меһманлар тәшәббускарларниң изгү-нийәтлиригә апирин ейтқач, атиған ианилирини тапшурди. Алаһидә тәкитләш лазимки, бу изгү-нийәтни марафонға қатнашқучилар толуғи билән қоллап-қувәтлиди. Хәлқимиз һаятида йүз бериватқан ушбу яхшилиқтин хәвәр тапқан имканийити чәкләнгән яш балиниң өз ианисини әвәткәнлиги мәлум болғанда, көпчилик униң бу вәтәнпәрвәрлиги билән милләтпәрвәрлигигә қайил болди. Шуниң билән биллә бу күни 4-5 миң АҚШ доллири әтрапида ярдәм қолини сунған инсанларниң тепилғанлиғи һәркимдә үмүт учқунлирини пәйда қилди. Марафон қатнашқучилири бу күни Қирғизстанниң хизмәт көрсәткән артисти Султан Кәримовниң ижрасидики һәм йәрлик «Юлтуз» ансамблиниң нахша-сазлири билән әвришим уссуллардин бәһримән болди. Ахирида хошаллиқниму һәм ғәм-қайғуниму тәң көрүп келиватқан хошна әлдә яшайдиған қериндашлиримизниң арманлириниң рояпқа чиқишиға қазақстанлиқ уйғурларму өз һәссисини қошиду, дәп үмүт қилимиз.

Мәшүр САСИҚОВ.

Бишкек шәһири.