• 1-Май — Қазақстан хәлқи бирлиги күни
• 28 Сәуір, 2016

Мустәқиллик. Разимәнлик. Келәчиги бирпүтүн милләт

Президент Нурсултан Назарбаев 26-апрель күни Астанадики Течлиқ вә Разимәнлик сарийида өткән Қазақстан хәлқи Ассамблеясиниң ХХІV сессиясигә қатнашти. Бу сессиядә «Мәңгілік Ел» умуммиллий Вәтәнпәрвәрлик акти қобул қилинди.Қазақстан хәлқи Ассамблеясиниң новәттики сессиясиниң асасий мавзуси «Мустәқиллик. Разимәнлик.  Келәчиги бирпүтүн милләт» болди. Мәлумки, бу жил дөлитимизниң Мустәлқиллигиниң 25 жиллиғи нишанлиниду. Шуңлашқиму мәзкүр сессиядә мустәқил Қазақстанниң асасий қәдрийәтлиригә алаһи дә қөңүл бөлүнди. ҚХА сессиясигә дөлитимизниң барлиқ регионлиридики Ассамблея әзалири, җәмийәт вә дөләт әрбаплири, миллий мәдәнийәт мәркәзлириниң вәкиллири, депутатлар, мәркизий иҗраий органларниң, партия, диний бирләшмиләрниң рәһбәрлири, алий оқуш орунлириниң ректорлири, чәтәллик дөләтләрниң дипломатиялик миссиялириниң вәкиллири, алимлар вә сәнъәткарлар қатнашти. Дөләт рәһбири өз сөзидә Қазақ­стан хәлқи Ассамблеяси бизниң Мустәқиллигимизниң әң чоң қәд­рийити екәнлигини тәкитлиди. Биз достлуқни қазақстанлиқларниң барлиқ әвлатлириниң асасий байлиғи сүпитидә сақлашни билдуқ. Бизниң умумий йолумиз — тәңһоқуқлуқ, бир чаңирақ астида һаят кәчүридиған барлиқ этносларниң бирлиги вә разимәнлиги хәлиқниң хаһиши билән талланди. Қазақстан хәлқи Ассамблеяси — Мустәқиллигимизниң мевиси. Ассамблея һәрқандақ ховуп пәйда болғанда вә Мустәқилликниң барлиқ дәвирлиридә һәрдайим жуқуридин көрүнди. Униң тарихида бизниң милләтниң йүксилиш дәвриниң басқучлири билән ениқ нәтиҗилири өз әксини тапқан, — деди Нурсултан Назарбаев. Шундақла Қазақстан Президенти Милләт Планини әмәлгә ашурушниң дәсләпки нәтиҗилиригә тохталди. Бирнәччә айда 59 қанун тәйяр­линип, қобул қилинди вә күчигә кирди. 400 нормативлиқ һоқуқ акти бәкитилди. Биздики өзгиришләргә мунасивәтлик йәнә бир мустәқил баһа тоғрилиқ ейтип өтәй. Пүткүл дуния дөләтлиридики ислаһатларға мониторинг қилидиған Дуниявий банк  Қазақстанда 2015-жили башқа дөләтләр билән селиштурғанда көп ислаһатлар әмәлгә ашурулди дәп һесаплайду. Уларниң пикригә мувапиқ, бу 7 йөнилиш бойичә 19 ислаһат, —  деди  Дөләт рәһбири. Нурсултан Назарбаев бүгүнки таңда дөләт хадимлири корпусида Қазақстанниң 45 этнос вәкилиниң бар екәнлиги ейтти. Дөләт рәһбири қанун үстүнлүгини тәминләш үчүн «Тиллар тоғрилиқ» қануниниң толуқ қоллинилишиниң муһим екәнлигини тәкитлиди. Дөләт органлириға әризә бәргү­чиләрниң хәт йоллиған тилида әхбарат елиш мәсилисигә мунасивәтлик мән әскәртиш қилған едим. Мениң тапшурмам бойичә Баш прокуратура барлиқ мәркизий вә йәрлик органларға тәкшүрүш жүргүзди. «Әхбаратқа қолйетимлик тоғрилиқ» йеңи қанун күчигә киргән дәсләпки үч айда дөләт органлириниң гражданлириниң соаллириға, улар таллавалған тилни нәзәрдә тутуп, җавап бериши бойичә 79 қетим қанун бузулған. Шуниң ичидә 29 факт һәрхил дәриҗидики һакимийәтләрдә, 50 факт министрликләрниң вә мәһкимиләрниң регионлуқ шөбилиридә тиркәлгән. Баш прокуратуриға барлиқ ениқланған фактлар бойичә қанунға хилаплиқ қилишни ашкарилаш вә  гунакар болған дөләт хадимлирини җазалаш тәклип қилинди. Бу мәсилини барлиқ дөләт органлириниң рәһбәрлири дайим шәхсий назаритидә тутуши лазим, — деди Нурсултан Назарбаев. Қазақстан Президенти ЭКСПО-2017 хәлиқара көргәзмисини өт­күзүш мәсилисигә тохтилип, пайтәхт, Алмута шәһири вә вилайәтләрниң һакимлириға әхбарат билән үч тилда — дөләт, рус вә инглиз тиллирида тәминләшни тапшурди. Гражданларниң тәңһоқуқлуғи билән этносара мунасивәтләр турақ­лиғи мәсилисигә мунасивәтлик уш­шақ-чүшәк һечнемә болмайду, болушиму мүмкин әмәс. Бу йәрдә шиарвазлиққа орун йоқ, пәқәт ишләш лазим,  — деди Дөләт рәһбири. Нурсултан Назарбаев индустрия­ләштүрүш ишини әмәлгә ашуруш вә ихтисадий өсүмни тәминләш, дуниявий боһранниң тәсиригә қаримастин, тиҗарәтниң тәрәққиятиға кәң йол ачидиғанлиғиға диққәт бөлди. Биз «Нурлы жол» дөләт программисини, тиҗарәтни тәрәққий әткүзүш вә иш билән тәминләш йол хәритисини әмәлгә ашуруп, фермерларға ярдәмлишиватимиз. Мошуниң һәммиси гражданлиримизниң келәчигигә, мунасип иш вә алий һаят сүпити турғисидин ишәшлик болуши үчүн әмәлгә ашурулуватиду,  — деди Қазақстан Президенти. Дөләт рәһбири Бәш институционал ислаһатниң йәнә бир йөнилиши — һесават беридиған дөләт вә очуқ һөкүмәт қелиплаштуруш даирисидә қазақстанлиқлар үчүн дөләт органлириниң қарарлирини муһакимидин өткүзүш вә қобул қилиш, әмәлгә ашуруш ишиға қатнишиш мүмкинчиликлириниң кәңәйтилгәнлигини ейтти. Уларниң йенида һөкүмәтлик әмәс тәшкилатлар билән биллә Қазақстан хәлқи Ассамблеясиниң вәкиллири паал қатнишидиған җәмийәтлик  кеңәшләр қурулуп, ишләватиду. Коррупция вә әмәлдарларниң исрапчилиғиға қарши ишәшлик тосалғу  — гражданлиқ назарәт. Биз бу йөнилиштин қайтмаймиз. Бу гражданлиқ җәмийәт үчүнму муһим, — деди Нурсултан Назарбаев. Қазақстан Президенти хәлиққә дөләт жүргүзүватқан сәясәтни чүшәндүрүш ишлириниң азлиғини тәкитлиди. Мәктәптики билим бериш саһасида, шуниң ичидә 5 күнлүккә, үчтиллиққа өтүш тәшәббуслири чоң муһакимиләргә түрткә болди. Әгәр биз балилиримиз билән пүткүл дөлитимизниң келәчигини ойлайдиған болсақ, мошундақ өзгиришләр билим бериш сүпитини ашуруш үчүн һаҗәт. Бирақ һәммә чоңқур муһакимә қилинғандин кейинла қобул қилиниши лазим. Мәктәп мәсилиси һәр аилигә мунасивәтлик, шуңлашқа барлиқ пикир нәзәрдә тутулуши һаҗәт, бу йәрдә хаталиққа йол қоюшқа болмайду. Умумән, бу  тәшвиқат ишидики камчилиқларни көрситиду. Хәлиққә ислаһатниң маһийити чүшәндүрүлмигән, — деди Дөләт рәһбири. Нурсултан Назарбаев кейинки вақитларда Қазақстанниң йерини чәтәлликләргә сетиш тоғрилиқ ялған әхбаратниң тарқитилиши сәвәвидин йәр мәсилисигә мунасивәтлик тәшвишләрниң көпәйгәнлигини ейтти. — Буниң һәқиқәткә уйғун кәлмәйдиғанлиғи бирнәччә қетим ейтилди. Йәнә бир қетим тәкитләймән — йеза егилиги йәрлирини чәт әл гражданлириға вә ширкәтлиригә сетиш тоғрилиқ мәсилә йоқ вә муһакимә қилинмайду. Бу мәсилә әтрапидики сахта әхбаратқа һеч бир асас йоқ. Бизниң мәхсәт — йеза егилиги билән шуғуллинидиғанларға шәхсий йәр елиш мүмкинчилигини бериш. Әгәр улар йәргә егә болса, уни күтиду, қәдирләйду. Йәр — әҗдатлиримиздин мирасқа қалған асасий байлиғимиз. Қазақстанниң 14 миң  километрдин ошуқ чегарисини рәсмийләштүрүш үчүн хошна дөләтләр рәһбәрлири билән 8 жил музакириләр жүргүздүм. Мошуниң һәммиси йеримизниң пүтүнлүгини тәминләш үчүн әмәлгә ашурулди. Мән гражданлиримизниң бу мәсилини көтәргәнлиги үчүн хошал болдум. Әгәр йәргә нәқ мошундақ көңүл бөлүнидиған болса, бу бизниң хәлқимиз өз йерини қошуқ қени қалғичә һимайә қилидиғанлиғини көрситиду,— деди Қазақстан Президенти. Шуниң билән биллә Дөләт рәһбири Қазақстан хәлқи Ассамблеясиниң йеңи функциялиригә тохтилип өтти. «Хәйрихаһлиқ  паалийәт тоғрилиқ» йеңи қанунда ҚХАға меценатлар җамаәтчилигиниң асасий тәшкилатчиси сүпитидә паалийәтни әмәлгә ашуруш жүкләнди. Тарихта дәсләпки қетим хәйрихаһлиқ  тәшкилатларниң, меценатлар вә донорларниң җумһурийәтлик қурултийи өткүзүлди. «Үлкен ел — Үлкен отбасы» лайиһиси билән Ассамблея жили даирисидә 400 миңдин ошуқ қазақстанлиққа хәйрихаһлиқ ярдәм көрситилди. Балилар өйлириниң 7800 балиси вә җитим балилар үчүн умумий баһаси 5 миллиард тәңгә болидиған билим беришкә беғишланған һесап-чотлар ечилди, — деди Нурсултан Назарбаев. Қазақстан Президенти пүткүл дөләт бойичә 1993 җәмийәтлик разимәнлик кеңишиниң вә 820 анилар кеңишиниң қурулғанлиғини ейтти. Улар хәлиқниң ениқ мәсилилирини һәл қилиш билән, йәрлик дәриҗидики вә тәшкилатлардики тоқунушларниң алдини елиш билән шуғуллиниду. Нурсултан Назарбаев Ассамблея пааалийитидики җәмийәтниң барлиқ иҗтимаий мәсилирини өз ичигә алидиған башқиму асасий йөнилишләргә тохталди. «Дөләт рәмизлири тоғрилиқ» қанун күчәйтилди, уларниң қазақстанлиқ вәтәнпәрвәрлик атрибутлири сүпитидә гражданларниң қоллиниш даириси кәңәйди. Аиләвий мунасивәтләрни, әхлақий-этикилиқ вә мәнивий қәдрийәтләрни күчәйтиш бойичә умуммиллий план йүксәлдүрүлди. Умумға Ортақ Әмгәк Җәмийити идеясини илгири сүрүш бойичә умуммиллий план әмәлгә ашрурулуватиду. Кәспийләр лигиси лайиһисиниң әһмийити зор. Униң даирисидә Дуниявий банкниң қатнишиши билән регионларда ишчи мутәхәссисликләр бойичә кадрларни алдин-ала тәйярлашниң 15 ресурслуқ мәркизи қурулди. Илим-пәнни тәрәққий әткүзүшниң 2019-жилғичә болған дөләт программиси қобул қилинди, 3 тилда билим беришниң йол хәритиси әмәлгә ашурулуватиду. «Ұрпақ  плюс» лайиһисини, яшлар сәясити концепциясиниң иккинчи басқучини әмәлгә ашуруш давамлашмақта. Туризм билән спортни тәрәққий әткүзүш концепцияси бәкитилди. Аммивий әхбарат васитилирини йүксәлдүрүш җәрияни башланди, — деди Қазақстан Президенти. Дөләт рәһбири көп мәбләғ тәләп қилмайдиған кәң даиридики ишлар әмәлгә ашурулидиғанлиғини  тәкитлиди. Униң инновацияликлиги, энтузиазми, системилиқлиғи вә ениқ нәтиҗигә қаритилғанлиғи  — бу, әлвәттә, һәммимиз үчүн үлгә. Мән бирпүтүнлүк билән бирлик тоғрилиқ ишниң дәсләпки нәтиҗилирини бәкитимән. Шуниң билән биллә беғәмликкә берилишкә вә биз җәмийәттә бирлик билән разимәнликниң алий дәриҗисигә йәттуқ дәп һесаплашқа болмайду, бу җәриян әнди өз-өзидин давамлишидиған болиду, — деди Нурсултан Назарбаев. Қазақстан Президенти сессия нәтиҗиси бойичә қобул қилиниши планлиниватқан «Мәңгілік Ел» Вәтәнпәрвәрлик актиниң умуммиллий идеяниң һөҗҗәтлик асаси екәнлигигә диққәт бөлди. Бу —  қазақстанлиқларниң бирпүтүнлүги билән бирлигиниң кәңдаирилик генетикилиқ программиси. Акт бизниң мәнивий қәдрийәтлиримиз билән интилишлиримизниң асасий үлгисини әвлаттин-әвлатқа йәткүзүши лазим. Униңда ихтисат билән сәясәт, әхлақ билән дин мәсилилири, Қазақстанниң дуниядики орни бойичә қөзқарашлиримиз муҗәссәмләштүрүлгән. Бу һөҗҗәткә мунасивәтлик 2 жил давамида қизғин җәмийәтлик иш елип берилди. У Қазақстан хәлқи Ассамблеясидә, илим-пән дуниясида, сәясәтшунаслар, тиҗарәтчиләр, мәдәнийәт әрбаплири арисида һәртәрәплимә муһакимә қилинди. Булту җумһурийәтлик Вәтәнпәрвәрләр форумида униң лайиһиси қобул қилинди, — деди Дөләт рәһбири. Нурсултан Назарбаев «Мәңгілік Ел» Вәтәнпәрвәрлик актида хәлқимиз қелиплаштурған вә өз қәлбидин өткүзгән асасий умуммиллий қәдрийәтләр, дөләтниң, җәмийәтниң вә гражданларниң Қазақстанниң тәғдири билән уни тәрәққий әткүзүш, гүлләндүрүш йолидики өзара җавапкәрчилиги тәкитләнгәнлигини ейтти. Вәтәнпәрвәрлик актини қобул қилип, биз бүгүнки һаятимизда орни бар вә һәммимиз үчүн муһим нәрсиләр вә келәчәк Қазақстанниң бәрпакарлиқ дәвридә һаятий әһмийити зор һәм баһалиқ болидиған дуниялар арисида мустәһкәм көрүк салимиз. Биз йеңи чоққиларға қарап илгири басқан қәдимимизниң дуруслиғини компас билән тәкшүргәндәк, Вәтәнпәрвәрлик акт арқилиқ ениқлайдиған болумиз, — деди Қазақстан Президенти. Дөләт рәһбири Вәтәнпәрвәрлик актиниң бәрпакар идеялирини җәмийәттә қелиплаштуруш үчүн бирқатар чарә-тәдбирләрни әмәлгә ашурушниң муһимлиғини тәкитлиди. Һөкүмәт Ассамблея билән бирлишип, һәрбир қазақстанлиқниң қәлбигә йол тапидиған кәңдаирилик тәшвиқат ишлирини әмәлгә ашуруши керәк. ҚХА Кативати Мәдәнийәт вә Спорт министрлиги, Билим вә пән министрлиги билән бирлишип, Вәтәнпәрвәрлик акт бойичә методикилиқ қураллар тәйярлиши лазим. Шуларниң асасида миллий компанияләр, санаәт орунлири, мәһкимиләр билән оқуш орунлири қоллективлиридики ишларни бир йолға қоюш керәк.  Ассамблеягә мониторинг жүргүзүп, қазақстанлиқ бирпүтүнлүк вә бирликни күчәйтиш концепциясини әмәлгә ашуруш тоғрилиқ докладлар тәйярлаш вәзиписи жүклиниду, — деди Нурсултан Назарбаев. Қазақстан Президенти Мустәқиллик, Разимәнлик, Келәчиги Бирпүтүн Милләт чүшәнчилириниң қазақстанлиқ арманни әмәлгә ашуридиған бир-бири билән өзара мунасивити бар чүшәнчиләр екәнлигигә диққәт бөлди. Һаяттин арман пәйда қилип, армандин һәқиқий һаятни шәкилләндүрүш керәк. Умумий миллий арминимизни биз мошундақ әмәлгә ашуримиз. Күчлүк, мунасип вә мәңгүлүк дөләт тоғрилиқ арминимизни, сөйүмлүк вә хасийәтлик йеримизни гүлләндүрүш тоғрилиқ арминимизни. Улуқ Дала ели кәңлигидики асман билән туташқан чаңирақ астида хошал һаят кәчүридиған бәхитлик вә течлиқ хәлқимиз тоғрилиқ арминимизни. Мән бүгүн Ассамблея сепигә  уни 20 жил илгири мениң билән биллә қурған, дәсләпки тарихий сессиялири билән қарарлирини тәйярлиғанларниң чоң болған балилири қошулуватқанлиғини көрүватимән. Бу —  қазақстанлиқларниң әвлат уйғунлуғиниң ениқ дәлили,  — деди  Дөләт рәһбири. Сөзиниң ахирида Нурсултан Назарбаев пүткүл қазақстанлиқларни келиватқан Қазақстан хәлқиниң бирлиги күни билән тәбрикләп, уларға бәхит вә утуқ тилиди. ҚХА Рәисиниң докладидин кейин сөз «Болон вә мобильлиқ җәриян» секториниң мутәхәссиси Сергей Петряевқа, Қазақстан Язғучилар иттипақи башқармиси рәисиниң орунбасари, ақын Маралтай Ыбыраевқа, «Бек эйр» акционерлиқ җәмийити «Fokker-100» һава кемисиниң командири Дмитрий Родинға берилди. Әнди «Тіл дарын» яшлар клубиниң рәиси, қостанайлиқ Наталья Шпагина таза қазақ тилида өзиниң пикрини ейтти. Шуниңдин кейин минбәргә чиққан  донор жүриги селинған дәсләпқи қазақстанлиқ граждан, «Өмір тынысы» җәмийәтлик бирләшмисиниң рәһбири Жәнибек Оспанов Президент Нурсултан Назарбаевқа медицина саһасида жүргүзгән ислаһити үчүн тәшәккүр изһар қилди. Қарағанда шәһиридики «Симкон» җавапкәрлиги чәкләнгән йолдашлиғиниң мудири Олег Мецик Дөләт рәһбирниниң «Умумға Ортақ Әмгәк Җәмийити» идеясиниң җәмийәт билән ихтисатниң тәрәққиятидики әмгәк адиминиң ролини көтәргәнлигини тәкитлиди. Шуниңдин кейин сөз алған Қазақ миллий йеза егилиги университетиниң 3-курс студенти Фаризат Хаджиева бовиси билән момисиниң аманитини орунлап, қийин вақитларда башқа милләт вәкиллиригә пана болған Н.Назарбаевниң аилисигә тәшәккүр изһар қилди. Бу күни сөз сөзлигәнләрниң арисида «Мастер фарм» медицинилиқ компаниясиниң мудири Евгений Хванму болди. У бүгүнки таңда Қазақстан бизнесни қоллаш арқилиқ алий рейтингқа егә болуватқан дөләтләрниң қатариға киргәнлигини, фармацевтикилиқ компанияләргиму мошундақ қоллап-қувәтләш көрситиватқанлиғини тәкитлиди. Сессия давамида Астана шәһәрлик Өзбәк этномәдәний мәркизи «Яшлар қанитиниң» рәиси, тиҗарәтчи Фарангиз Ахметова дөләт тәрипидин  көрситиливатқан қоллап-қувәтләшниң арқисида өзи рәһбәрлик қиливатқан нан мәһсулатини чиқиридиған заводниң иши яхши йолға қоюлуватқанлиғини тәкитлиди. Әнди Назарбаев Университетниң профессори Дуйшонкул Шаматов (Қирғизстан) өз сөзини Қирғиз елиниң иллиқ салимини йәткүзүштин башлиди. Шуниң билән биллә у Қазақстан Президентиниң өз дөлитини қоллап-қувәтлигәнлиги үчүн тәшәккүр изһар қилди. Шуниңдин кейин Дуйшонкол Шаматов өзиниң Назарбаев Университетида ишләватқанлиғини алий мәртивә санайдиғанлиғини, мошу оқуш орнида  «Мәңгілік Ел» қәдрийәтлири қелиплишиватқанлиғини ейтти. — Мениң Сизгә вә Қазақстан хәлқигә баһалиқ аманәт тапшурғум келиду. Йеқинда атам Қадырбек маңа бир қолязма  көрсәтти. Уни атамға Кузебай Қуранов вапат болушиниң алдида, йәни 1954-жили бәргән екән. Кузебай атиға бу қолязмини ҚарЛагда сотланған бир адәм Қазақ елиға тапшурушни аманәт қилған екән. Бу қолязма — намәлум муәллип язған «Қыз Жібек» жырының нусхиси. Сизгә вә Қазақ елигә мошу қолязмини тапшурушқа рухсәт қилиң, — деди Дуйшонкол Шаматов. Өз новитидә сөз алған «Евразиялик диалог» хәлиқара фондиниң рәиси Айжан Шебанова (Россия) Қазақстан Россияниң ишәшлик шериги екәнлигини, өзи башқуруватқан хәлиқара фондниң икки дөләт арисидики  яхши мунасивәтләр арқисида яхши утуқларға йәткәнлигини тәкитлиди. Т.Жүргенов намидики сәнъәт академиясиниң магистратурисида оқуватқан, дөлитимиздә 5 жилдин бери яшаватқан сәнъәтшунас, нигериялик Даниэль Джеймис Данлади-Бвай сессия давамида өзиниң қазақ сәнъитигә дегән һөрмитиниң жуқури екәнлигини изһар қилди. Әнди хәлиқара «Street Workout» федерациясиниң президенти Денис Минин разимәнликни байрақ қилған дөлитимизниң утуқлирини алаһидә тәкитлиди. Шуниңдин кейин  «Street Workoutтин» дуния чемпион  Дияс Биджиев сөз елип, һазир спортниң бу түри билән 500 миңдин ошуқ яш қазақстанлиқниң шуғуллиниватқанлиғини ейтти. Шималий Қазақстан вилайәтлик корей мәдәнийәт мәркизиниң рәиси Максим Пак елимизниң бирлиги билән өмлиги йолида әмәлгә ашурулуватқан ишларға тохталди. Минбәргә көтирилгән  қизилордилиқ Аягоз Талпақова өзиниң бешиға чүшкән һәсрәтни ейтип, балиси Асылбекниң дәрдигә дава издәп мураҗиәт қилғанда ярдәм қилған Дөләт рәһбиригә вә барлиқ вәтәндашлириға тәшәккүр изһар қилди. Жиғин давамида ҚХА Рәисиниң орунбасари — Кативатниң рәһбири Ералы Тоғжанов атақлиқ боксчи Геннадий Головкинниң Президентқа вә барлиқ қазақстанлиқларға йоллиған хетини оқуп бәрди. Сессия давамида Дөләт рәһбири Нурсултан Назарбаев Қазақстан хәлқи Ассемблеяси Кеңишиниң әзаси, «Беларусь мәдәнийәт мәркизи» җәмийәтлик бирләшмисиниң рәиси Леонид Питаленкони вә ҚХА Кеңишиниң әзаси, «Дустлик» Қазақстан өзбәклири җәмийәтлик бирләшмилири ассоциациясиниң һөрмәтлик рәиси Розақул Халмурадовни этномәдәнийәт бирләшмилиридин Ассамблея Рәисиниң орунбасари қилип тайинлаш тоғрилиқ Пәрманға қол қойди. Жиғин ахирида Ассамблеяниң ХХІV сессиясиниң нәтиҗиси бойичә «Мәңгілік Ел» умуммиллий Вәтәнпәрвәрлик акти елан қилинди. Шуниң билән Қазақстан хәлқи Ассамблеясиниң ХХІV сессиясиниң  өз ишини тамамлиди.