- Йеңилиқлар
- 26 Маусым, 2012
Өсәктә яңриған күлкә
Йеқинда «Шавкәт-шоу» театр-студиясиниң уюштуруши вә «Бирлик» җәмийәтлик фондиниң қоллап-қувәтлиши билән Яркәнт тәвәсиниң Өсәк вадисида Йәттису чақчақчилириниң бәзмиси болуп өтти. Униңға Қирғизстанниң Бишкек шәһиридин, Алмута шәһиридин вә шундақла вилайәтниң башқа наһийәлиридин кәлгән бир қатар чақчақчилар, «Нур», «Дияр» топлири вә хәлиқ нахшилирини бабиға йәткүзүп ейтидиған хәлиқ талантлири қатнашти. Сорунға меһман сүпитидә тәклип қилинған Панфилов наһийәси һакиминиң биринчи орунбасари Амантай Раев, орунбасари Шөһрәт Қурбанов, Яркәнт шәһириниң һакими Бахыт Нурелов бу йеңи башланминиң толуқ қоллап-қувәтләшкә әрзийдиған лайиһә екәнлигини тәкитләп, изгү тиләклирини билдүрүшти.
Әзәлдин той-төкүн, мәшрәп вә башқиму мәдәний сорунлар хәлиқ қизиқчилирисиз өткән әмәс. Йәни тили өткүр, һазирҗавап чақчақчилар һәр қандақ сорунда көпчиликниң диққәт мәркизидә болуп кәлгән. Нәсирдин әпәнди, Сәләй чаққан, Молла Зәйдин, Молла Мәдия Хәлпитим, Яқупбәг ночи вә башқа тарихта өзлиригә хас из қалдурған хәлиқ қизиқчилириниң исимлири бизгә яхши мәлум. Уларниң қанатлиқ гәплири, әстәрлик чақчақ-һәзиллири әвлаттин-әвлатқа өтүп, хәлиқ еғиз иҗадийитиниң бебаһа нәмунилири сүпитидә көпчилик еғизидин һелиғичә чүшмәй келиватиду. Яркәнт тәвәсиниң өзидила йеқинқи өтмүштә Әйнидин қошақчи, Әхмәт пака, Мәхсим төрә, Иврайим қалмақ қатарлиқ сөз чевәрлири өткән. Бүгүнки күндә уларниң орнини бесип келиватқанлар аз әмәс.
Ахирида бу бәзмини уюштурғучилар үч йүз әллик адәмгә дәстихан йейип, күтүвалған Сейит Вәлиев рәһбәрлигидики мәшрәп әһлигә тәшәккүр изһар қилди.
Полат МИРЗАЕВ.
Яркәнт шәһири.
572 рет
көрсетілді1
пікір
