• Вақиә һарписидики сөһбәт
• 20 Мамыр, 2016

«Мәшрәп – һаят мәктиви»

26-27-28-май күнлири Алмутидики Җумһурийәт сарийида, 30-31-май күнлири болса, Жолдасбеков намидики Студентлар сарийида Шинҗан-Уйғур Автоном Районидин кәлгән «Шинҗан сәнъәт юрти» өмигиниң сәнъәткарлири қазақстанлиқ уйғурларниң диққитигә «Мәңгүлүк мәшрәп» намлиқ коңертлиқ программисини һавалә қилмақчи. Шуниңға мунасивәтлик йеқинда биз, мәзкүр  концертни уюштурғучиларниң бири «Җанан» ханим-қизлар фондиниң рәиси Мизангүл Авамисимоваға йолуқуп, мәзкүр концертниң тәшкилий ишлириниң кетип бериши һәққидә сөһбәтләшкән едуқ. – Мизангүл һәдә, сөһбитимизни мәзкүр концерт программисиниң атилишидин башлисақ... – Мәрһәмәт, чүшәндим, «Нами немишкә «Мәңгүлүк мәшрәп»? – дәп соримақчи болуватсиңиз керәк. Уйғурда «Оғлуңни алди билән мәшрәпкә, андин мәктәпкә бәр» дегән яхши ибарә бар. Һәқиқәтәнму мәшрәп чоң һаят мәктиви. Униңда балилиримиз мәктәп босуғисини атлимай туруп, миллий урпи-адәтлиримиз  билән тонушиду. Әнди балиниң туғулуп, мәшрәпкичә болған арилиқта йәнә бизниң көплигән әнъәнилиримиз бар. Мәсилән, туғулған балиға исим қоюш, қириқ күндин униң кейин қириқ сүйини қуюш вә башқилар. «Мәңгүлүк мәшрәптә» биз мошуларниң һәммисини рәт-рети билән көрүш имканийитигә егә болумиз. Әҗдатлардин мирас болуп келиватқан мәшрәп һәқиқәтәнму мәңгүлүк. екәнлигигә йәнә бир қетим көз йәткүзимиз. – Демәк, сиз концертниң сценарийиси билән толуқ тонушуп чиқипсиздә... – Әлвәттә, концертниң баш режиссери ШУАРға тонулған биринчи дәриҗилик артист Дилнар Абдулла, қойғучи рижиссер, атақлиқ уссулчи Меһрай Ибраһим бизни алдин-ала концерт программиси билән тонуштурди. – Бу қетим тамашибинлар атақлиқ сәнъәткарлардин кимләрни көрүш имканийитигә егә болиду? – «Мәңгүлүк мәшрәптә» Камил Турсун, Әнвәр Сәмәт, Рәна Абдукерим, Амангүл Сидиқ, Турсун Абдуреһим, Аминә Өмәр, Гүлҗамал Мәмәтнияз, Шүкүр Кәри, Иминнияз Һүсәйин, Айтулла Әла қатарлиқ биринчи дәриҗилик вә Җүръәт Вайит, Турсунҗан Аблиз, Маһинур Халиқ, Рәйһангүл Мәмәт, Маһмутҗан Һамут, Қундузай Зайит, Меһрибан Ғиясидин, Гүлнар Нур, Қәйсәр Һосман, Нурмәмәт Өмәр, Мәмәтрози Рәҗәп, Айбәһтәм Қурбан қатарлиқ иккинчи дәриҗилик артислар өз талантини намайиш қилиду. – Әнди һамийларға тохтилип өтсиңиз? – Баштила шуни ейтип өтмәкчимәнки, бу коммерциялик лайиһә әмәс. Баш уюштурғучи –җумһурийәтлик Уйғур этномәдәнийәт мәркизи вә униң йенидики «Җанан» ханим-қизлар фонди. Артистларниң келип-кетиш хираҗитиниң мәлум қисмини Шинҗаң миллий артистлар фонди аҗритидиған болди. Әнди бу яқтики уларниң ятақхана вә концерт өтидиған сарайларни иҗаригә елиш  вә башқиму ихтисадий мәсилиләрни бизниң ханим-қизлар фонди өз һөддисигә алмақта. Шундақла билетларни сетишму бизниң бойнимизда. – Ейтмақчи, билетларни сетиш қандақ кетип бариду? – Билетлар көңүлдикидәк сетиливатиду, дәп ишәшлик ейталаймән. Ундақ дегиним, билетларға жирақ вә йеқин чәт әлләрдинму буйрутмилар чүшиватиду. Россия, Өзбәкстан вә Қирғистанлардин тамашибинларниң алди кәлди. Әнди Белгия, Швеция вә Германиядә яшаватқан қериндашлиримизму йолға чиқиш алдида туриду. Пурсәттин пайдилинип, барлиқ қериндашлиримизни 26-27-28-май күнлири Алмутидики Җумһурийәт сарийида, 30-31-май күнлири болса, Жолдасбеков намидики Студентлар сарийида өтидиған концерт программисиға тәклип қилимән. – Ахирқи соал. Мәзкүр концерт программисини Уйғур театриниң сәһнисидә көрүшкә болматтиму? – Орунлуқ соал. Бу мәсилә әтрапидиму көп ойландуқ. Концерт программисида шундақ көрүнүшләр барки, бир мәзгилдә сәксәнгә йеқин артист сәһнигә чиқиши мүмкин. Шуңлашқа уларға бизниң театримиз сәһниси тарлиқ қилидекән. – Сөһбитиңизгә рәхмәт. Сөһбәтләшкән Бәхтишат СОПИЕВ.