• Тәбрикләймиз
• 27 Мамыр, 2016

Сәнъәткар һәм устаз

Һәр жутта өз миллитигә хизмәт қилишни муқәддәс борчи дәп һесаплайдиған, қәлбиниң паклиғи, әтрапидикиләргә дегән меһир-муһәббити, зор таланти билән жутдашлириниң һәм тамашибинлириниң иззәт-еһтирамиға сазавәр болған сәнъәткарлар аз әмәс. Хәлиқ мундақ инсанларни «Сәккиз қирлиқ, бир сирлиқ» дәп алаһидә әзизләйду. Әйнә шуларниң бири Халима Шаваевадур. У – нахшичи, уссулчи, устаз. У иҗра қилған нахшиларда бирдә хәлқимизниң дәрт-пуғани, қайғу-һәсрити ипадиләнсә, бирдә хошал кәйпият беғишлап, әриксиз шох уссулға чүшириду. Халима Шаваева 1961-жили Уйғур наһийәси Түгмән йезисида дунияға кәлгән. Атиси Әркин, аниси Кеңәшгүлму сәнъәтхумар инсанлардин. Пәрзәнтлириниң чоңи Радик тонулған сазәндә, кейинкиси Айкерәм Өзбәкстанда талантлиқ актриса, кәнҗиси Айбүви ҚазПИниң музыка бөлүмини тамамлиған. Халима болса, 1978 – 1984-жиллар арилиғида Ташкәнт шәһиридә А.Островский намидики Театр вә бәдиий рәссамчилиқ институтиниң «Театр вә киноактери» бөлүмидә, шундақла Алмутида Қизлар педагогика институтида билим алған. Әмгәк паалийитини Чонҗа йезисидики 3- вә 5-оттура мәктәплиридә музыка пәни муәллими сүпитидә башлайду. Қошумчә «Арзу» хәлиқ нахша-уссул ансамбли тәркивидә болиду. Устаз сүпитидә Халима Шаваева өзи тәрбийилигән Х.Аблизова, А.Ғаппарова, С.Мухтәров, Р.Ниязов, Н.Шаваева охшаш шагиртлири билән һәқлиқ рәвиштә пәхирлиниду. Халима Шаваева 2007 – 2012-жиллири «Арзу» ансамблиниң бәдиий рәһбири болуп ишләп, ансамбльниң иҗадий йүксилишигә биркишилик һәссисини қошиду. 2011-жили тәҗрибилик устаз вә сәнъәткар сүпитидә Талдиқорғандики Алмута вилайәтлик ҚХАниң «Достлуқ өйигә» бәдиий рәһбәр хизмитигә тәклип қилиниду һәм «Өрнек» ансамблини башқуриду. 2014-жили Алмута шәһиригә көчүп келиду. Һазир 59-балилар бағчисида вә М.Һәмраев намидики 150-мәктәптә музыка пәнидин дәрис бәрмәктә. Халима Шаваева қәйәрдила ишлимисун, һәрдайим өз миллитиниң сәнъитини, мәдәнийитини тонуштуруп келиватқан сәнъәткар. Шундақла жутиниң «отидин кирип, сүйидин чиқидиған» милләтпәрвәр инсан. Мана һазир у ҖУЭМ йенидики «Нураний анилар» кеңиши рәисиниң орунбасари. Өзи истиқамәт қиливатқан «Қайрат» жутида «Баһар» ансамблини тәшкил қилип, жут яшлирини сәнъәткә үгәтмәктә. Халима Шаваева бәхитлик ана. Униң чоң қизи Насима Шаваева — хәлқимизниң сөйүмлүк иҗрачилириниң бири. Насима Шаваева билән Азамат Абдрахманов тәшкил қилған «Яйра» дуэти сәнъәт сөйәр амма арисида наһайити аммибап. Кичик қизи Сәнәм болса, «Лалә» уссулчилар топиниң рәһбири. Бу күнләрдә хәлқимизниң сөйүмлүк сәнъәткари Халима Шаваева өзиниң әллик бәшинчи баһарини нишанлаватиду. Шу мунасивәт билән уни чин қәлбимиздин тәбрикләп, иҗадий утуқ тиләймиз. Йолдаш МОЛОТОВ.