- Йеңилиқлар
- 26 Маусым, 2012
Йеңи номер вә йеңи гуванамә
Қазақстан Җумһурийити Ички ишлар министрлигиниң Йол комитети полицияси автомобиль дөләт номерлириниң дизайнини өзгәртиш қарариға кәлди. Уларда KZ бәлгүси вә мәмликәт байриғи әкис әттүрүлүп, автомобильниң қәйәрдә ройхәткә елинғанлиғини билдүридиған һәрипләр рәқәмләр билән алмаштурулиду. Мәсилән, 01 — Астана, 02 — Алмута. Йеңи дөләт номерлириниң дәсләпки түркүми бийил август ейида чиқирилиду.
Қазақстан Җумһурийити Ички ишлар министрлиги Йол полицияси комитетиниң рәиси Берик Бисенқуловниң Астанада болуп өткән мәтбуат конференциясидә тәкитлишичә, һазирқи номерларни улар толуқ конириғичә яки автомашинини қайтидин тиркәш зөрүрийити туғулған пәйткичә пайдилинишқа болиду. Дөләт номерини елиш үчүн төлинидиған дөләт баж селиғи илгәрки миқдарда қалиду.
Йол полицияси комитетиниң йәнә бир йеңилиғи — бу бийил қишта һайдиғучи гуванамисини өзгәртиш. Улар йәттә категориягә — А, В, С, D, CE, DE, BE вә қошумчә категорияләргә — А1, B1, C1, D1, C1E вә D1E — бөлүниду. Мәлумки, һазир Қазақстанда автотранспорт васитилириниң А, И, С, D вә Е охшаш бәш категорияси моҗут.
Е категорияси елип ташлиниду, демәк, ВЕ категориясигә четилмиси бар йеник автомобильлар, СЕ категориясигә жүк тошуш автопоезлири, DE категориясигә четилмиси яки йерим четилмиси бар автобуслар ятқузулиду.
— Биз һәр бир категория яки қошумчә категория бойичә һайдиғучиларни тәйярлашниң йеңи типлиқ программилирини ишләп чиқимиз. Оқутуш мәркәзлири тегишлик программа, методикилиқ қураллар билән тәминлиниду, — дәп тәкитлиди Йол полицияси комитетиниң рәиси.
Кона һайдиғучи гуванамисини алмаштуруш ихтиярий асаста әмәлгә ашурулиду. Йеңи гуванамилар уларни дәсләпки қетим алғанларғила тапшурулиду. Қалған автомобиль егилири кона гуванаминиң қәрәли аяқлашқичә униңдин пайдилиниш һоқуқиға егә.
610 рет
көрсетілді0
пікір
