• Дидар ғенимәт
• 02 Шілде, 2012

Язғучилар билән учрашти

Йеқинда Яркәнт шәһиридики «Саз» кафесида «Инайәт» уйғур җәмийәтлик тәшкилатлири ассоциациясиниң» тәшәббуси вә наһийәдә паалийәт елип бериватқан «Уйғур хәлқиниң урпи-адәтлирини риваҗландуруш җәмийәтлик фонди» һәм «Яркәнт мәшриви» әһлиниң қоллап-қувәтлишидә тонулған қазақ язғучиси Вақап Қыдырбек оғли, Қазақстан Язғучилар иттипақи Уйғур әдәбияти кеңишиниң рәиси, язғучи-драматург Әхмәтҗан Һашири вә язғучи Алимҗан Бавдинов  билән җамаәтчилик вәкиллириниң учришиши болуп өтти. «Уйғур хәлқиниң урпи-адәтлирини риваҗландуруш җәмийәтлик фондиниң» рәиси Қурванбүви Һашимованиң риясәтчилиги билән өткән учришишта наһийә һакими  (шу чағдики — ред.) Ермек Келемсеит, Алмута вилайәтлик Қазақстан хәлқи Ассамблеяси рәисиниң орунбасари Ғәбит Турсынбай, наһийәлик мәслиһәтниң кативи Тилеуберген Оспанов, «Инайәт» уйғур җәмийәтлик тәшкилатлири ассоциациясиниң» рәиси Турғанҗан Розахунов, наһийәлик Уйғур этномәдәнийәт мәркизиниң рәиси Реһимҗан Тохтахунов, мәркәз йенидики Ақсақаллар кеңишиниң рәиси Қурван Худайбәрдиев, учришишқа һамийлиқ қилған тиҗарәтчи Дилшат Насиров, наһийәлик «Қазақ тили» җәмийәтлик бирләшмисиниң рәиси, шаир Исламғали Пискенбаев вә башқилар сөзгә чиқти. Улар әдипләрниң иҗадийитигә йәниму чоң утуқларни тиләш билән биллә, тәвәдә 35 милләт вәкиллириниң иҗил-инақ яшап, бир муддиа-мәхсәттә әмгәк қиливатқанлиғини, мустәһкәм достлуқниң шарапитидин жилдин-жилға яхши нәтиҗиләрни қолға кәлтүрүватқанлиғини атап көрсәтти. Муһтәрәм меһманларму өз сөзидә Дөләт рәһбири Н.Ә. Назарбаев һәр қачан алаһидә әһмийәт берип келиватқан милләтләр ара достлуқ билән җәмийәтлик разимәнлик, җүмлидин қазақ һәм уйғур хәлқиниң әзәлдин қан-қериндаш екәнлиги тоғрисида тәвриниш билән тохтилип өтти. Өзлириниң иҗадий паалийитидин хәвәрдар қилип, кәлгүси иҗадий реҗилири һәққидә ейтип бәрди. Баш қошуш ишчанлиқ шараитида өтүп, бир қатар пикирләр билән тәклипләр оттуриға қоюлди. Мәсилән, қазақ әдиплири билән алимлириниң уйғурлар һәққидә ейтқан ой-пикирлири муҗәссәмләнгән бир мәҗмуә чиқириш хусусидики тәклип Вақап Қыдырбек оғлиниң қизғин қоллап-қувәтлишигә егә болди. Әнди Яркәнттә әдәбий мирасгаһ ечиш тоғрилиқ Әхмәтҗан Һашири тәрипидин илгири сүрүлгән пикиргә наһийә рәһбәрлигиму қошулуп, яр-йөләк болидиғанлиғини билдүрди. Наһийә сәнъәтчилириниң иҗрасидики дилға арам нахша-сазлар вә уссуллар билән учришиш көңүллүк өтти.

Нурәхмәт ӘХМӘТОВ.

Панфилов наһийәси.