• Тонушуп қоюң
• 05 Тамыз, 2016

Тәлийини Европидин издәйду

Исми: Җамалдин. Фамилияси: Хоҗаниязов. Туғулған жили: 1997. Футбол – дунияға кәң тариған спорт түри. Униң билән шуғуллинип, дунияға тонулған футболчиларму йетәрлик: Пеле, Яшин, Марадона, Платини, Роналду, Месси... Шүкри, кейинки жилларда уйғурлар арисидинму атиғи чиққан һәм чиқиватқан футболчилар йоқ әмәс.Шуларниң бири Данияниң «Орхус» командисиниң вә Россия яшлар талланма командисиниң қоғдиғучиси Җамалдин Хоҗаниязовтур. У 16 йешидила көпчиликкә тонулди. Россия талланма командисиниң тәркивидә 2013-жили өсмүрләр арисида өткән Европа чемпионатида ғалип аталған. 17 йешида болса, уни Россияниң даңлиқ «Зенит» командиси тәклип қилиду. Талай атақлиқ футболчилар ойниған бу клубта у көп нәрсини үгәнди һәм футбол муһитидики әң ярқин дәқиқилирини өткүзди. Европиға тонулған мәшиқләндүргүчи Спалеттидин футболниң қир-сирини егилиди. Ечинишлиғи, аталған командиниң рәһбәрлиги кейин яхши оюн көрситип жүргән бирқатар оюнчиларни сетивелиш үчүн, Җамалдинни Россияниң башқа командисиға – «Амкарға» вақитлиқ «сатиду». Нәтиҗидә у бу командида бари-йоқи бирла оюнға қатнишиду. Андин у өзиниң маһаритини төвәнлитип қоймаслиқ үчүн Европини мәхсәт қилиду. Шу чағда униңға «көзи чүшүп» жүргән Данияниң «Орхус» клубиниң рәһбәрлиги тәклип қилиду. Җамалдин келишиду. Йеқинда Җамалдин Хоҗаниязов билән Интернет торида сөһбәтлишишкә муйәссәр болдуқ. Сөһбәт давамида башқа чәт әлләрдә яшаватқан уйғурларму униң тоғрилиқ яхши хәвәрдар екәнлигидин мәмнун болуп, мухлислириға отлуқ салимини йәткүзди. – Дания чемпионати саңа яқтиму? – дәп соридим униңдин. – Әлвәттә. Европида ойнаш — һәрқандақ футболчиниң армини. – дәп башлиди у сөһбитини. – Дания чемпионати наһайити кәскин өтиду. Қизиқ йери, турлар давамида командиларниң чемпионат җәдвилидики орни ойлимиған йәрдин өзгирип кетиду. Мәсилән, җәдвәлдә ахирқи орунда турған аутсайдер лидер командини йеңивелиши учришип туридиған әһвал. Оюнчилар арисидики риқабәтму күчлүк. – «Орхуста» узақ вақит қаламсән? Яки... – «Орхус», раст, яхши команда. Лекин, башқа футболчилар охшашла, мәнму өсүшни халаймән. Шуңлашқа Европиниң Германия, Голландия қатарлиқ мәмликәтлириниң чемпионатлирида ойнашни арман қилимән. Җамалдин һазир Данияда яшаватиду. У яқниң хәлқиму униңға кәң қучақ яйди. Уйғур жигити футбол ишқивазлириниң сөйүмлүк оюнчисиға айланди. Интернеттики униң шәхсий сәһиписигә қариғинимда, мухлислириниң униңға билдүргән тиләк-истәкләрни көрүп, хошал болдум. Җаһанға териқтәк тариған хәлқимиз вәкиллириниң мундақ утуқ-муваппәқийәтлиригә йетиватқанлиғини көрүп, алаһидә мәғрурландим. Спорт алимидә Җамалдинниң келәчиги алдида. Һә, бу йолда униңға пәқәт яхшилиқлар тиләймиз! Абдулҗан АЗНИБАҚИЕВ.