- Йеңилиқлар
- 22 Қыркүйек, 2016
Сүрәтләрдә өтмүш намайән
Силәр көрүватқан бу сүрәт буниңдин 60 жил илгири, 1956-жили Ташкәнт шәһиридә чүширилгән. Сүрәтниң бешида В.И.Ленинниң турушиниң сәвәви, униңдики студентларниң бесим көпчилиги шуниң намида атилидиған Оттура Азия дөләт университетида оқуйдиғанлар. Сүрәттики жуқурқи қатардики оңдин иккинчи вә үчинчи Турсун Турдиев – география, Яқуп Рәхмәтуллин химия факультетиниң уйғур бөлүмидә оқатти. Оңдин биринчи Қадир Тохтахунов – биринчи, башқилиримиз алтинчи курста едуқ. Әслидә университеттики оқуш бәш жил. Биздә бир жилни қошушиниң сәвәви – өзбәк тилини, униң грамматикисини мукәммәл билиш һәм халиғучиларға өзбәк мәктәплиридә хизмәт қилиш имканийитини яритип бериштин ибарәт еди. Лекин алтинчи курста оқуғанлиримиз һәммимиз өз жутлиримизға — Реһимҗан Реһимқулов Яркәнткә, Илияс Семәтов, Абдурешит Турдиев һәм мән Челәккә қайттуқ. Бәзиләр Реһимҗанни яркәнтлик дәп ойлап қелишиму мүмкин. Амма Реһимҗан өзиниң ейтишиға қариғанда, униң ата-бовилири Челәк тәвәсидики Қаратуруқтин болуп, у шу мәлидә дунияға келип, андин Яркәнт тәрәпкә көчүп кәткән екән...
Биз, жуқурида исимлири аталғанлар Ташкәнткә 1950-жили кәлдуқ. Әслидә биз алтә едуқ – йенимизда Абдуғәни Бәрибаев, Тохтахун Сетиев болди. Абдуғәни емтиһанлардин өтәлмиди, Тохтахун аилә шараитиға бағлиқ оқушини иккинчи курста ташлаветишкә мәҗбур болди. Аримиздин Абдуғәниниң мәңгүгә кетиши бизгә бәк еғир кәлди. Чүнки Ташкәнттики университетта уйғур бөлүминиң бар екәнлигидин хәвәр тапқан һәм бизниң шу йәргә беришимизға сәвәпчи болған нәқ шу ағинимиз еди. Униң аниси рус болғанлиқтин, бизгә қариғанда, рус тилида «сайратти» һәм Ташкәнткә йәткичә, тилға бағлиқ мәсилиләрни у өз үстигә алған еди. Әслидә бизниң сүрәткә чүшүштики мәхситимиз — пәқәт университетта оқуватқанларниңла бешини қошуш болидиған. Амма студентларниң һәммисини тизимлап көрүведуқ, уларниң сани йәтмиштин ешип кәтти. Сүрәтчи-фотограф билән мәслиһәтлишип көрүведуқ, у һәммиңларни бир «қәғәзгә чүширишкә болиду, лекин һәрбириңлар интайин кичик көрүнүсиләр», дегән гәпни қилди. Шунда биз умумий әмәс, наһийәләр бойичә айрим-айрим чүшүш қарариға кәлдуқ. Чонҗилиқлар оттузға йеқин, яркәнтликләр жигирмә бәш, челәкликләр жигирмә екәнмиз. Шундақ қилип, Челәк тәвәсидики мәлиләр бойичә қариғанда, мән, Илияс Семәтов, Яқуп Рәхматулин, Мусин Ибрагимов, Марс Насиров, Рабик Исмайилов, Шәмшинур Бақиева, Реһимбүви Мәсимова, Иззәтбүви Тохниязова, Т.Җаппаров, Турсунбүви Тохтахунова, Хасийәт Насирова – Челәктин; Қадир Тохтахунов, Өмәрҗан Рәхмитуллаев, Реһимбүви Мәсимова – Байсейиттин; Турсун Турдиев Турғанҗан Турдахунов – Қарайотидин; Реһимҗан Реһимқулов, Абдурешит Турдиев – Қаратуруқтин; Нур Мәсимов – Ғәйрәттин. Челәклик жигирмә студенттин он төрти университетта, қалғанлар һәрхил техникумларда тәһсил көрди. Университетни тамамлиғанлар, худди келишивалғандәк, йәттимиз маарип саһасини, қалған йәттимиз илим-пәнни таллидуқ. Илияс Семәтов, Рабик Исмайилов, Яқуп Рәхматуллин, Марс Насиров, Қадир Тохтахунов алим болуп йетилди. Әнди маарип саһасидикиләргә кәлсәк, буларниң һәммиси жутлириға қайтип, өзлири оқуған мәктәпләрдә паалийәт елип барди. Улар шундақла жутлириниң тәрәққиятиға, һәссини қошти. Атмиш жил – бу йерим әсирдин ошуқ вақит. Шуниңға бола сүрәттикиләрниң йеримидин ошуғи бақилиқ болуп кәтти. Мән бу сүрәтни гезит сәһиписидә елан қилиш арқилиқ бақилиқ болған сәпдашлиримни хатириләп, уларниң ичидики һаят кәчүрүватқанларға мустәһкәм саламәтлик тиләшни нийәт қилдим, халас.Сәйдуллам ӘМИНОВ.
Әмгәкчиқазақ наһийәси.444 рет
көрсетілді0
пікір