• Йеңилиқлар
• 29 Қыркүйек, 2016

Муәллимләргә һөрмәт

Абай намидики Қазақ миллий педагогика университетиниң доценти Қастер Сарқытқан Abaі.kz  торбетида Япониядә муәллим болуп ишләватқан хитай қизиниң әслимилиридин үзүндә кәлтүриду. Төвәндә шуни диққитиңларға һавалә қиливатимиз.Бирдә кәсипдишим, япон муәллими Ямамотадин «Япониядә муәллимләр күни қачан нишанлиниду? дәп соридим. «Биздә «Муәллимләр мәйрими» дегән чүшәнчә йоқ» дәп җавап бәрди у. Униң бу гепигә һәйран болдум. Шу чағда маңа «ихтисат, пән-техника тәрәққий әткән әлдә муәллимгә, униң җапалиқ әмгигигә нисбәтән шундақ һөрмәтсизликниң болуши һәҗәплинәрликқу!» дегән ой кәлгән еди.

Бир күни Ямамота мени меһманға тәклип қилди. Биз метроға чүшүп, униң өйигә қарап йол туттуқ. Хәлиқниң иштин қайтқан вақти болғачқа, вагон ичи адәмгә лиқ толған. Шуңа достум иккимизгә өрә турушқа тоғра кәлди. Шу чағда йенимиздики орундуқта олтарған бир бовай маңа илтипат билдүрүп, орнини бәрди. Хиҗаләт болуп, қанчә қаршилиқ билдүрсәмму, у өз дегинини қилди. Мән достумдин чоп-чоң адәмниң немә үчүн маңа орнини бәргәнлигиниң сәвәвини соридим. У маңа «Ақсақал мәйдәңдики «Муәллим» дегән бәлгүни көргәндин кейин шундақ қилди» дәп қисқичила җавап бәрди. Метродин чиққанда, йеқин җайдики дуканларниң биридин достумниң аилисигә соға еливалмақчи болдум. Шунда Ямамота анчә жирақ әмәс җайда пәқәт муәллимләргила хизмәт көрситидиған мәхсус имтиязлиқ дуканниң барлиғини ейтти. Униң гепигә қариғанда, Япониядә муәллимлик — әң  һөрмәтлик кәсип. Һә, муәллим — әң һөрмәтлик адәм. Мабада муәллимләр сода мәркәзлирини зиярәт қилса, уларниң ғоҗайинлири бәк хошал болуп кетидекән. Җәмийәтлик транспортлардиму устазларға алаһидә орунлар аҗритилған. Аһалиға хизмәт көрситиш җайлирида муәллимләр һечқачан новәттә турмайду. Достум маңа мошу сөзләрни ейтқач, «Көрүп турғиниңдәк, муәллимләрниң һәр күни мәрикилик өтүватса, уларға алаһидә мәйрәмниң немә кериги бар?» дәп қошумчә қилди.

Шәхсән өзәм бизниң җәмийәттиму муәллимләргә нәқ мошундақ мунасивәтниң шәкилләнгинини, өз новитидә, муәллимләрниңму өз намиға лайиқ хизмәт қилғинини халиған болар едим.