• Акция
• 25 Қараша, 2016

«Мустәқиллик мевиси» Әмгәкчиқазақ наһийәсидин башланди

Қазақстан Җумһурийити Мустәқиллигиниң 25 жиллиғиға мунасивәтлик елимиз тарихиниң сәһипилирини варақлап, Қазақстанниң чарәк әсирдә қол йәткүзгән утуқлирини әлгә тонутуш, хәлиқләр достлуғи һәм милләтләрара разимәнликни техиму мустәһкәмләшни тәрғип қилиш мәхситидә җумһурийәтлик Уйғур этномәдәнийәт мәркизи билән җумһурийәтлик «Уйғур авази» гезити тәһрирати тәрипидин уюштурулған «Мустәқиллик мевиси» акцияси өткән җүмә күни Әмгәкчиқазақ наһийәсидә башланди. Тәркивидә җумһурийәтлик Уйғур этномәдәнийәт мәркизи рәисиниң орунбасари, «Уйғур авази» гезитиниң баш муһәррири, Қазақстан хәлқи Ассамблеясиниң әзаси Ершат Әсмәтов, Қазақстан Язғучилар иттипақи Уйғур әдәбияти кеңишиниң рәиси, Қазақстан Җумһурийитиниң хизмәт көрсәткән әрбаби, Хәлиқара «Алаш» мукапитиниң саһиби, язғучи-драматург Әхмәтҗан Һашири, Қазақстан Җумһурийитиниң хизмәт көрсәткән әрбаби, нахшичи-композитор Шәмил Әбилтай, Қазақстан Җумһурийитиниң хизмәт көрсәткән әрбаби, мәдәнийәт саһасиниң әла­чиси, Қазақстан Рәссамлар иттипақиниң әзаси Әхмәтҗан Әһәт вә ҖУЭМ йенидики Жигитбашлири кеңишиниң рәиси, ҚХА әзаси Абдурешит Мәхсүтов бар. Тәшвиқат топи алди билән Ишиктә региониниң турғунлири билән Ишиктә шәһиридики наһийәлик Мәдәнийәт өйидә учрашти. Учришишни ҖУЭМ рәи­синиң орунбасари, Әмгәк­чиқазақ наһийәлик Уйғур этномәдәнийәт мәркизиниң рәиси Сулайман Мәхсүтов ечип, Қазақстан Җумһурийити Парламентиниң депутати, ҖУЭМ рәиси Шаһимәрдан Нурумовниң рәһбәрлигидики ҖУЭМ тәшәббуси билән башланған акция иштракчилирини Қазақстан Җумһурийитиниң 25 жиллиқ тәвәллуди билән тәбрикләп, сөзни тәшвиқат топиниң рәһбири Ершат Әсмәтовқа бәрди. – Елимиз Президенти Нурсултан Әбиш оғли Назарбаев ейтқинидәк, Қазақстанниң байлиғи қезилма байлиқлирида әмәс, бәлки 130дин ошуқ милләт вәкиллириниң дост­луғи билән разимәнлигидә екәнлиги барлиғимизға мәлум. Елимиздә барлиқ хәлиқләргә өз мәдәнийитини, тилини вә урпи-әдәтлирини тәрәққий әткүзүшкә мүмкинчиликләр яритилған. Мана шу мүмкинчиликләргә бола Қазақстанни маканлиған милләтниң һәрқайсиси мустәқил елимизниң тәрәққиятиға өз үлүшини қошуп келиватқанлиғи шубһисиз. Шуңлашқиму Дөләт рәһбириниң дана сәясити түпәйли еришкән утуқ­лиримизни «Мустәқиллик мевиси» акцияси арқилиқ көпкә тонутушни дурус көрдуқ, – деди Ершат Моллахун оғли бу акцияниң мәхситигә тохтилип. Новәттики сөзгә чиққан Әхмәтҗан Һашири өзиниң Қазақстан кәби азат һәм әркин әлдә туғулуп, яшап, иҗат қиливатқан бәхитлик язғучи екәнлигини йәткүзди. ЮНЕСКОниң мәлуматлиридин мисаллар кәлтүрүп, Қазақстан уйғурлириниң дөләт тилини 87 пайиз өзләштүргәнлигини қәйт қилди. Новитидә, уйғур тилини үгинип, «Уйғур авази» гезити билән язғучи-шаирлиримизниң китаплирини оқуп жүргән қәләмдаш достлири Ерлан Ғайып вә Қалихан Ысқақниң исимлирини пәхирлиниш илкидә тилға алди. Әхмәтҗан Әһәт «Алтун адәм» тепилған Ишиктә шәһириниң хасийәтлик зимин екәнлигини тәкитләп, қедимий уйғур дурданилиридин болған «Миң өй» һәққидә, Қазақстан уйғур рәссамлириниң мустәқиллик жиллири еришкән утуқлири һәққидә әхбарат бәрди. Абдурешит Мәхсүтов болса, елимиз тарихидики чоң сәнә – Мустәқилликниң 25 жиллиғи билән җумһурийәтниң барлиқ жигитбашлири намидин челәкликләрни тәбрикләп, жигитбеши вәзиписиниң әһми­йитигә тохталди. Җама­әтчилик ишлириниң активистлирини «Уйғур авази» гезитиниң тиражини 20 миң данигә йәткүзимиз дегән шиарни қоллап, мәхсәткә қол йәткүзүш үчүн күч чиқиришқа чақирди. Әмгәкчиқазақ наһийәлик һакимийити ички сәясәт бөлүминиң башлиғи Мөмүнҗан Исламов наһийәдә Қазақстан Җумһурийити мустәқиллигиниң 25 жиллиғиға беғишлинип нурғунлиған иш-чариләрниң уюштурулуватқанлиғи һәққидә ейтип, бүгүнки акцияниңму наһийә тарихида ярқин сәһипә болуп қалидиғанлиғини билдүрди. Елимиз Президенти Н.Ә. Назарбаев тәрипидин илгири сүрүлгән һәрхил стратегиялиқ планларниң әмәлгә ешишида наһийәлик Уйғур этномәдәнийәт мәркизиниңму салмақлиқ төһписи бар екәнлигини қәйт қилди. Муштири топлаш кампаниясигә тохтилип, уйғур миллитиниң 70 миңға йеқин вәкили истиқамәт қиливатқан наһийәдә «Уйғур авази» гезити тиражиниң 6000ға йетидиғанлиғиға иши­ни­диғанлиғини билдүрди. Новитидә, «Уйғур авази» сәһипилиридә наһийә һаяти вә адәмлири һәққидә мақалилар көпирәк нәшир қилинса, дегән пикирни билдүрди. Көрнәклик қазақ композитори Шәмил Әбилтай: «Қазақ билән уйғурда «Дуа билән әр көкирәр» дегән сөз бар. 1966-жили 18 йешимда Гурьев музыка мәктивини тамамлап, Алмутиға оқушқа кәлгинимдә, Қуддус Ғоҗамияров консерваторияниң ректори екән. Қурманғазиниң «Ақбай» күйини орунлидим. Шу чағда Қуддус аға орнидин туруп: «Молодой человек, Вы – феномен музыки» дәп, устазлиқ дуасини бәргән еди. Шуниңдин бери 50 жил өтүпту. Исми дунияға тонулған композиторниң дуасидин кейин мән оқушумни муваппәқийәтлик тамамлидим, иҗадий вә әмгәк йолум утуқлуқ болди. Шуниң үчүн мән өзәмни бәхитлик шагирт дәп билимән. Қуддус ағамни болса, Моцарт, Чайковский вә Бетховен охшаш улуқ композиторлардин кам көрмәймән. У консерваториядә рәһбәрлик қилған 10 жилни ушбу билим дәргаһиниң алтун дәври дәп һесаплаймән. Шуңлашқиму мән өзәмниң шагиртлиқ борчумни ада қилиш нийитидә устазимға атап күй иҗат қилдим» дәп, «Қуддус», андин Дөләт рәһбири Нурсултан Назарбаевқа беғишлиған «Қазақстан-Нурсултан» күйлирини орунлап бәрди. «Мустәқиллик мевиси» акцияси әзалириниң новәттики учришиши шу күни чүштин кейин Челәк регионида давамлашти. Меһманларни Челәк региониниң чоң жигитбеши Һебибуллам Абдуллаев, Челәк йезиси Анилар кеңишиниң рәиси Җәннәтбүви Абдурешитова вә региондики йеза округлириниң җамаәтчилик ишлириниң активистлири, оттура мәхсус оқуш орунлириниң студентлири қарши алди. Бу йәрдиму тәшвиқат топи әзалири асасән қазақ вә уйғур хәлиқлириниң достлуғи, иҗил-инақлиғи нәтиҗисидә Дөләт рәһбириниң тапшурмилири билән вәзипилириниң оңушлуқ әмәлгә ешиватқанлиғи, ели­миз­ниң иҗтимаий-ихти­са­дий җәһәттин тәрәққий етиватқанлиғини мәмнунийәт билән атап өтти. Акция давамида Әмгәкчи­қазақ наһийәсиниң баш жигитбеши Турсунмәһәмәт Абду­семәтов, Ишиктә шәһириниң турғуни, әмгәк ветерани Туйғун Илиев вә башқилар сөзгә чиқип, «Уйғур авази» гезити һәққидики пикирлири билән бөлүшти. Улар жутдашлирини муштири топлаш ишиға «бир яқидин баш, бир йәңдин қол чиқирип» қатнишишқа чақирди. «Мустәқиллик мевиси» акциясиниң әзалири Әмгәкчиқазақ наһийәсидин башлиған сәпирини қоллиған Әмгәкчиқазақ наһийәлик һакимийәт билән наһийәлик Уйғур этномәдәнийәт мәркизигә миннәтдарлиқ изһар қилди. Ахирида наһийә сәнъәт­карлири билән Челәк йезиси Абдулла Розибақиев намидики вә Ыбырай Алтынсарин намидики мәктәпләр оқуғучилириниң ихчам концерти акция иштрак­чилириниң диққитигә һавалә қилинди. Рашидәм РӘҺМАНОВА, Әмгәкчиқазақ наһийәси.